中左六合彩頭獎四千八百萬，依家唔知點算?: 87 沒有陳詠恩的日子

沒有陳詠恩的日子 第七日 晴

又係寫日記嘅時候啦，已經七日冇見過詠恩啦。唔知佢而家做緊咩呢？今日天氣好好呀，雖然有小小凍，但係陽光好充足，依家我通常朝早都會返老豆舖頭幫手送貨，但下午之後呢…就會係私人時間，嘻嘻…太子爺係咁架啦，咁我要準備演唱會嘅野吖嘛，加上離緊唱片公司果邊都會開始有野做，所以老豆公司果邊我都幫唔到幾耐架啦。

因為天氣好，所以今日我送完貨之後，一個人走左去香港仔水塘行山，睇吓會唔會多啲靈感可以寫好啲歌詞。因為今日係平日，所以行山人士比較小，多數都係啲公公婆婆、嬸嬸姨姨，後生嘅就冇乜啦，但係沿途竟然都有唔少嘅人認得我喎，有啲會同我打招呼、點點頭，有啲就會望住我之後同朋友咬耳仔，令我對我自己嘅人氣同知名度增加左唔少信心。行到一個交匯點，我忽然諗起詠恩，當年我地一齊喺呢個位，我又唔怕死咁走左去爆林，詠恩又戇居居咁跟喺我後面喎，依家諗返起真係有驚無險，當時詠恩仲係著住條裙，萬一出咩意外都真係不敢想像啦。

望住個好藍嘅天，騰雲萬里…景色真係好靚。但係依一刻只係得我一個人喺度，耐心不禁會有種失落感，就好似再完美無瑕嘅嘢都有缺陷咁。









沒有陳詠恩的日子 第八日 晴

已經係第八日啦，詠恩當晚喺燒烤場走嘅情景依家我仲係歷歷在目。雖然我外表好似冇乜野咁，喺人面前依然有講有笑，但係其實內心非常空虛，夜闌人靜嘅時候，都會不禁落淚。今日天氣依然好好呀，朝早送完貨之後，我走左去游水。嘻嘻…雖然係冬天，但係屋企樓下會所個泳池係室內恒溫泳池所以一啲問題都冇。因為係平日所以依舊係冇乜人，我游得好舒服。記得第二次撞返詠恩…就係喺呢度。世事真係奇妙…一對曾經由相識走到共處接近同步嘅人，點估到下一步就變成陌路，而且仲一別就七年，明明住喺附近都竟然可以一次都撞唔到嘅人，喺七年後竟然可以喺咁短嘅時間內撞到幾次，而且重遇嘅地點同方式亦都係匪夷所思咁巧合，所以我覺得個天有咁嘅安排，我同詠恩嘅緣份一定唔會到此為止。

游完水之後呢，我又收到joey姐助手Sandy姐電話啦。原來joey姐演唱會嘅綵排已經開始咗啦。計落應該仲有三日左右演唱會就會正式開show，所以Sandy姐就約咗我聽日去紅館為我特別嘉賓嘅環節進行綵排，希望聽日一切順利啦。

張敬聰日記完。