中左六合彩頭獎四千八百萬，依家唔知點算?: 38
「...歌手？唔拿係吖嘛！歌手搵到食架咩？」占士好質疑咁問。
「...緊係搵到啦，我以前做影相果陣，成日幫啲大明星、大歌星影野，
佢地搵果啲數，一年都多過你搵廿年呀！」我都未離得切反應姐，
阿榮已經衝口而出啦，估唔到平時唔多點出聲嘅阿榮今次又會咁積極喎，
講到勁興奮咁。
唔長唔短...同佢地兩個共事左都有成兩年幾三年啦，雖然占士份人好口臭，
又成日比多兩單野佢做都牙痛咁聲，而阿榮份人就好cool，
不過喺依段日子裏面，大家都相處得好融合，唉...真係有啲唔捨得，
但係天下無不散之筵席，希望第日我地可以有緣再聚啦。
出去做野果陣，占士同阿榮兩個喺whatapp群組度，依然係繼續傾我做歌手嘅話題，
占士又話第時要做我髮型設計師喎，而阿榮就話叫我有相影記住介紹佢喎，
兩個你一句佢一佢咁，眨下眼就已經食飯時間啦，估唔到我要做歌手依單野傳遍左成間公司，
好多同事都私底下whatapp我問我消息嘅真實性，連一啲平時冇乜兩句嘅同事，
都忽然間蒲哂出離，最正嘅係有一個做跟單文員嘅肥仔姓鄧男同事，
一聽到我話去做歌手就即時打電話比我了解，好似仲緊張過我咁，
之後問返啲同事先知，依個肥仔鄧姓男同事，原來係歌唱發燒友離，
有去上堂學唱歌不突止，依十年八年內，仲經常去參加各式大大小小嘅歌唱比賽，
之後仲成日將自己啲唱歌片放哂上YOUTUBE比人欣賞添。從第二個同事口中得知，
依位鄧姓肥仔男同事聽到我話去做歌手果陣，個樣葡萄到呢...
心裏面可能已經講埋：「無可能架，我學藝十年，你只係去左一個月，無理由咁勁？」
哈哈...不過呢啲野，好講天份嘅！！！er.....佢有啲天份嘅，不過去整整形先啦.....
因為我仲有好多大假嘅關係，所以返埋下個星期就可以離開公司。
唔知點解呢，辭左職之後成個人輕鬆哂，可能係終於都唔洗再留喺度對住佢地，
唔洗再受良心嘅責備掛，點都好啦...第時我做歌星做到飛黃騰達，一定會關照你地嘅。
輕輕鬆鬆又到收工，今日我收工之後...再一次揸左部車去跑馬地諗住接阿瑜收工啦，
但係今次我又係遲左一步，去到跑馬地打比阿瑜，佢又話約左啲同事去唱k喎，
搞錯呀！！次次都遲一步嘅，下次真係要一早book定囉...嬲呀！
唉...冇辦法之下，我又要揸返部車走啦。思敏今日好似要返夜間，
即係話連唯一嘅飯腳我都冇埋，咪住先...諗諗吓，仲有小苑喎？
橫掂順路...一於搵佢食飯！
於是我就揸左部車過太古城搵小苑啦。揸到過去泊好部車已經差唔多八點鐘，
其實我係唔知小苑到底幾點收工架，但係又咁啱得咁橋，
佢又真係收八點鐘喎，等佢執埋啲手尾，
我地又去返上次佢帶我去果間cafe度食野。
「...點呀，成唔成功呀？」一坐低我就急不及待咁問。
「...洗唔洗咁急呀！！比我叫埋野食先答你啦，唔該寫野！」小苑有啲不滿咁回應，
之後仲叫左個侍應埋離添，冇計啦...鬼叫我求佢咩，點都要順吓佢意架啦，
唯有唔出聲...等佢叫埋野食先啦。
「...仲有冇其他需要？」侍應問。
「...冇啦，唔該！」搞完一輪之後，終於都落哂野食同野飲啦。
「...嘻嘻，講得未姐？」我笑到烚熟狗頭咁問。
「...嘩，你睇你幾狗！」小苑串我。
「...係呀，我屬狗架！嚇嚇～嚇嚇～!！咁你講得未吖？」我自嘲，仲伸左條脷出離扮狗伸脷添。
「...哈哈！！哈哈！想笑死人咩...救命，怕左你啦，講比你知啦，
哈哈...不過你扮狗堅似囉！」小苑忍唔住一邊笑一邊回應。
「...搞掂左啦！」小苑飲完左啖檸茶之後講。
「...嗯，thank you，thank you！」我合實左雙掌回應。
「...拿...我呢，同我家姐講，話星期六約左friend去（迪士尼）多左張小童免費飛，
咁咪話唔好嘥帶埋浠琳去囉！」小苑交代中。
「...哦！」我回應。
「...拿，講明先呀，千奇唔好嚇嚫浠琳呀，一陣浠琳返到去講返比家姐知，
咁我地就玩x完架啦。」小苑粗口強調。
「...就算要問野，都要扮到不經意咁，好自然咁搵機會先好問呀。」小苑再三強調。
「...得啦，得啦！」我答。
「...有啲咩想問好返去諗定藉口啦，咁呢...浠琳佢就好鍾意食.....」就係咁，
小苑講左好多關於浠琳嘅野比我知，包括鍾意食咩啦，鍾意啲咩公仔啦，
仲有平時有啲咩嗜好...等，希望我到時可以盡量取悅到浠琳，
令浠琳可以透露到一啲關於佢身世嘅線索。
好快就到左星期六，今日我晨咁早，六點幾就起左身，因為真係緊張到訓唔到，
個感覺就好似讀書果陣去學校宿營，或者陸運會前夕咁，腎上腺素不斷標升。
睇吓先...其實都冇咩需要帶，入到去有錢乜都買得到。拎起個背囊，
求其執左條毛巾同件風褸，就兩手fingfing咁出門口啦。
今日我著左全套sport look，上身一件t恤，下身一條長嘅黑色運動褲再加對kobe8，
盡量突顯我陽光氣息嘅一面。搞呢搞路...又立頭又盛咁，仲隆重過同阿瑜出街囉，
差唔多搞左成個半鐘，我先滿意自己嘅造型開門出發。
我照常揸住我部車，大概八點半左右，我就去到香港仔中心匯合小苑。
因為驚比詠恩見到，所以我一早約定小苑喺崇文街，一條後巷度上車。
停底部車之後，我就打左個電話比小苑，大概過左五分鐘左右，
終於見到小苑斯斯然咁從街角出現，而浠琳就跟住喺佢旁邊。
今日嘅小苑，同我一樣都係一身運動look，白色t恤、運動短褲，
再加一對nike波鞋，咩住個黑色背囊，而浠琳呢...同上次見佢一樣係紮住一條馬尾，
一樣係白色t恤再加一條牛仔短褲同波鞋，雖然得七歲，但係望落就完全係一個少女咁款，
可能詠恩本身都有成168cm高啦，又或者...嘻嘻...我都有成178架嘛，
咁所以呢...而家望落浠琳都真係幾高吓，而且同詠恩一樣都係
偏瘦。
「...咇！！！」我打開左左邊嘅電動門比佢地兩個上車，
於是小苑好快就跳左上車，而浠琳就緊隨其後。
「...早晨呀！」小苑坐低左之後，就同我打招呼。
「...浠琳叫人啦。」之後再叫浠琳叫我。
「...er...嘻嘻...唔知叫乜喎！」浠琳有啲怕羞咁講。
「...叫聰哥哥啦。」小苑提點。
「...哦...聰哥哥早晨！！」浠琳叫我。
「...早...早晨！！」我都有小小緊張咁回應，
話哂都係第一次同可能係我個女嘅浠琳講野喎，
係緊張啲架啦。
「...食左早餐未呀你地？」我問。
「...未呀，倒屎咁早起身邊有時間食姐！」小苑回應。
「...ok，咁我車你地去食早餐先。」我講，之後我就開車出發啦。
問完佢地想食咩早餐之後呢，我就將部車揸左去荔枝角長沙灣道，
一間我平時返工會去食嘅大型茶餐廳，間野個名叫做...唔知咩老闆啦，
其實都冇咩特別，只係一般茶記食嘅野，因為佢地兩個都話冇咩所謂食咩都得喎，
咪去我去開果度囉，貪佢門口泊到車吖嘛，可能係職業病掛。
食完之後呢，我地就正式出發去迪迪尼啦！！！食早餐果陣，
此終同浠琳都係第一次出街，所以我全程都冇乜點講過野，
只係dup底頭咁起勢食野，間中偷望一下浠琳，搞到成個變態佬咁。
荔枝角同迪迪尼嘅距離都唔係太遠，揸左廿分鐘車左右我地就順利到達，
我將部車泊入去園區停車場之後呢，我地一行三人就沿住人群，
慢慢咁步入園區啦。
「...嘩！！！浠琳埋離吖！」去到迪迪尼門口個招牌果陣，小苑大叫。
「...聰，幫我地兩個影張相打個咭先啦。」小苑拖住左浠琳企左喺牌坊下面，
一個可能係每一個去過迪迪尼嘅人都一定會影相嘅位，
於是我接過小苑部電話幫佢地兩個影相啦。
「...吖...唔該！」我幫佢地影左幾張之後，小苑忽然叫住我身旁嘅一對情侶。
「...可唔可以幫我地三個影張相呀？」小苑問佢地，
情侶當然亦都好樂意啦，於是我就企埋去同佢地一齊影相啦。
小苑仲專登放浠琳喺我地兩個中間等我可以有機會痴埋浠琳合照，
真係有小小緊張添。合照完我地就同其他人一樣，向住入口進發。
唔知係咪因為今日天氣好呢，定係因為星期六嘅關係，都真係幾多人吓，
未行到門口入閘位，已經開始要排隊啦，大家一個跟一個咁，
準備拎個袋出離，比保安員檢查隨身物品。雖然望落條龍好似好長咁咋喎，
但係排左唔洗五分鐘，我地就順利入到場啦喎。
一入到去浠琳就緊係興奮啦，但係估唔到連小苑都成個大細路咁，
拖住浠琳走離走去咁，沿住（美國小鎮大街）東奔西跑咁，
而我就跟住佢兩個後面，睇住咁活潑可愛嘅浠琳，真係一種特殊享受。
經過美國小鎮大街之後，就到左一個中庭廣場，對住我地嘅就係果座公主城堡，
離到依啲位當然又係影相嘅時候啦，影完之後本來諗住浠琳會即時拉小苑入去城堡果邊啦，
但係浠琳竟然第一時間拉左小苑去（明日世界）果邊喎，見到ironman仲衝住過去話要影相添，
今次真係跌哂眼鏡啦。
佢地橫掃成個（明日世界），巴斯光年呀、太空山呀、ironman呀、
太空飛碟呀...全部都玩哂，之後就沿路殺落去（幻想世界）果邊，
不過可能依區有好多野都係啱再細啲嘅小童，所以我地都係走馬看花咁，
只係入左去玩左個（小熊維尼），原來浠琳係鍾意Winnie the pooh架喎，
我緊你醒目仔啦，玩完出返離紀念品店果陣，見到浠琳攬住其中一隻Winnie the pooh公仔，
我就即時發動銀彈攻勢。
浠琳開頭有小小怕羞唔敢收，但係身體真係好誠實，
一個七歲嘅小朋友又點會抵受得住咁大嘅誘惑吖，小苑叫佢收姐，
就即刻攬實開心到唔放手啦，仲即時同我friend左添，錢雖然唔係萬能，
但係都真係唔好睇小佢嘅威力。玩埋個（迷離莊園）都已經成點幾兩點啦，
於是我地就喺莊園旁邊嘅餐廳食飯啦。唔知係我應付小朋友有一手定係同浠琳佢真係夾啦，
經過左半日嘅時間，我已經順利咁同浠琳佢打成一片啦。而家浠琳對住我不知幾咁開心，
聰哥哥前聰哥哥後咁，我又間中搞吓爛gag引吓佢笑咁，睇離真係幾順利，我係時候要出手啦。