中左六合彩頭獎四千八百萬，依家唔知點算?: 33
「...喂！」我講。
「...hello，聰哥！」係思敏，睇離佢應該啱啱收工冇耐。
「...hi，咦...收工拿？」我問。
「...係呀，好掛住你呀聰哥，做緊咩呀？」思敏雖然有啲疲態，但係亦都好開心咁問。
「...準備訓覺囉！」我答。
「...哦...今日返工呢，幾好笑呀....咁.....」思敏好快就啟動左佢嘅自動廣播系統，
都好嘅...聽吓野好過佢問我野啦，要我係咁講大話其實都真係好辛苦架。
最後因爲思敏自己本身都好攰嘅關係，傾左半個鐘左右我地就收左線，
收線後都差唔多成點鐘啦。我一攤上張床度就訓到不醒人事咁。
到第二朝訓醒，當然係照常返工啦。今日比起上個星期更加小野做，
真係靜到嚇q死人。晏晝果陣...返到公司個倉，見到阿頭生哥冇野做到喺度數手指咁濟，
都唔知間公司會唔會執鬼埋添呀。
因為冇咩野送，所以四點幾果陣尾站送埋銅鑼灣單貨，我就無無聊聊咁喺銅鑼灣行左一陣，
經過軒尼詩道謝瑞麟果陣，竟然撞返一個好耐都冇見既中學同學阿花喎。
果陣阿花明明係考全班第一嘅高材生離架喎，點解依家要搞到做珠寶sales架！
所以話呢...讀得書多有咩用吖，正所謂一命二運三風水、四積陰德五讀書，
你睇吓讀書排到幾後先得架，早排撞返以前中學全班考第尾果個男仔，
果陣成日比人趕出班房，又成日逃學，依家呢...咪做左老細囉，出入有司機接送，
仲成日返大陸間廠度睇廠添，我呢...以前一樣係唔讀書，依家衰衰地都叫做係幾千萬富翁啦，
所以話呢...讀書真係冇錢途囉。
唉...見阿花咁可憐，加上喺佢出盡奶力遊說低下，最後我幫嚫佢買左隻一卡嘅鑽石戒子，
阿花講都隻戒子天上有地下無咁，又咩八心八箭呀、咩九心一花咁，
仲話我粒鑽石唔知幾多個excellent ，又話e色係極品咁，最後仲話比個員工價我，
賣單都係五皮野，唉...行一行街又冇左五皮野啦，都真係有啲肉赤，
但係一諗起阿瑜收到之後個開心樣呢，嘻嘻...就咩都抵返哂。
無驚無險...好快又到收工，去停車場攞車之後，我無啦啦心血來潮想揸一揸部車落（太古城中心）喎，
因為忽然好想食章魚小丸子，公司附近同屋企附近我都真係唔知邊度有得食，
唯一知道有得食嘅地方，就係返屋企會途經嘅（太古城中心）food court，
橫掂都經過架啦，於是我就兜一兜入去太古城，將部車泊好之後呢，就行上去尋找小丸子啦。
睇吓水牌先，我記得好似喺一樓架喎。點解搵唔到嘅？
行吓行吓...行極都係啲時裝店離嘅，睇離要問吓人啦。
「...隨便睇睇隨便揀，揀啱可以試吓喎！」咦...bauhaus門口有個sales喺度喎，問吓佢先。
「...唔該，想問吓food court喺邊呀！」我一邊叫一邊慢慢行緊埋去，
本來背住我嘅sales聽到我叫之後，慢慢咁擰左個頭過離，咪住先...
點解佢...好似好熟面口咁嘅？
「...咦...靚仔哥哥...乜係你牙？」點會咁橋架？
竟然會係琴日喺淺水灣撞到，好似隻冤鬼嘅小苑，點會咁架！！！
「...吓...係...係你！」我o左咀。
「...又話有女友有盛咁，乜原來都係鍾意我...專登離搵我添。
吖...你又知我喺度返工嘅，緊係琴日問我啲friend架啦，
估唔到你都幾古惑架喎，我仲有幾個字收工啦...等多我一陣啦，
轉頭比你陪我食飯。」小苑一輪咀咁自言自語，根本冇比機會我反駁。
「...痴線...我路過咋，你諗多左囉！」我回應。
「...繼續吹吖，尷尬唔想認咪講囉，明架喎！」小苑繼續串我。
「...你...，費事同你講！」
「...喂...喂！！」我比佢激到彈起，嬲嬲地轉身走左，離遠聽到佢不停叫「喂」！
唉...再對住條友真係人都癲，唔好理咁多啦，
快啲搵吓個food court喺邊先。
搵左幾分鐘，終於搵到food court啦。不過可能係放工時間啦，
多人到呢...well...不過我一條友就問題不大嘅，睇吓先...搵到我想食嘅小丸子，
再排隊比錢、攞單，最後等左十五分鐘左右，終於食到我想食嘅小丸子啦！
因為我頭先再三強調啲燒汁要多到爆嘅，所以而家啲汁排山倒海咁湧出離，
再加埋果啲好鬼死活躍嘅木魚花....，真係令人食指大動呀，我唔客氣啦....！
嗯...真係好食到不得之了，到底點先可以煮得出咁無懈可擊嘅野食呢？
我一邊食...一邊撳電話，大約過左五分鐘左右...，隻冤鬼再一次出現....
「...吖...頭先叫極都唔應喎...無禮貌！」小苑一邊講一邊坐左落離我張枱度。
「...喂...其實都仲有好多枱架，點解要坐埋離呢？」我講。
「...車...間food court你架咩，我鍾意坐邊就坐邊架啦。」小苑串咀回應。
「......！」於是我冇理到佢，繼續食我嘅小丸子希望快啲食完快啲走。
「...係呢，邊個話比你知我喺度返工架，阿慈？Mabel？」小苑見我唔講野，於是繼續發問。
「...我再講多次，我係路過離搵小丸子食姐，絕對唔係離搵你！」我再三強調。
「...係離搵小丸子食吖，定係離搵我小苑咋？乜你想食埋我牙...嘻嘻！」
頂...又比佢入到我，小丸子、小苑，係喎，唔通整定嘅？痴線....咁橋姐...！
「...其實你係咪好得閒姐，得閒得濟就搵你啲朋友啦...咪煩我。」我講。
「...喂...係你自己離搵我咋喎，依家我離左啦，
你係咪好應該請我食餐飯呢？」小苑答。
「...仲要我請？」我回應。
「...嘻嘻...邊個請都好啦，快啲行啦好肚餓呀！」小苑嘻皮笑臉咁，
吖...唔知點解我又神推鬼擁咁真係比佢推左去喎。
小苑推左我去同樣喺太古城入面嘅一間cafe度坐低，
我都未識點回應，佢就已經好快手咁叫哂野食啦。
「...你都好熟架部喎！」我坐左喺度呆左咁講。
「...嘻嘻...喺度返左工咁耐，食離食去都係果幾間緊熟啦。」小苑一邊撳電話一邊回應。
「...笑吓啦。」小苑忽然舉起電話影住我。
「...喂，你做咩呀？」我緊張回應。
「...放鬆啲啦香港人，打吓咭姐！」小苑影完之後繼續若無其事咁撳電話。
「...你打咭還打咭，都唔係用我張相離打掛？」我問。
「...er...咦...喂，你未叫野食啊呵，咁就要試吓個（卡邦尼意粉）啦。」
小苑開始推開話題，而且仲自把自為咁幫我叫左個（卡邦尼意粉）。
等野食期間佢繼續追問，睇離佢仲係覺得我係問佢啲朋友得知佢喺度返工，
今日亦都係專登離搵佢。無論我點講佢都唔肯信，其實又係嘅...橋到咁，
我自己講出離果陣，真係連自己都覺得好唔合理，咁小苑唔信都情有可原嘅。
小苑其實係果啲典型mk妹，染左一頭長啡金髪，分側界加條馬尾，
爛爛地口...又串串貢咁，帶左大眼仔...化行裝之後，個樣都係好一般，
皮膚黑...160高左右，加上超瘦嘅身形，好似營養不良咁款。
食野果陣...我冇出聲，但係小苑就好似當我係佢啲friend咁，
不停喺我面前講是非，又話同事幾衰、又話邊個邊個friend幾賤咁，
雖然口臭...但係確實係比到一種幾真嘅感覺我。
食完之後...話哂我都係男仔，所以我都主動埋左張單佢。
但係諗住行返去停車場攞車果陣，小苑仲係賴死唔走咁，
跟住我行到落停車場喎。
「...喂...你做咩呀？」我一邊行一邊問。
「...嘻嘻...都咁夜啦，人地一個女仔咁危險，你好應該送埋我返屋企啦！」小苑老實不客氣。
「...你一個女仔上一個陌生男人車，會唔會仲危險呢？」我問。
「...車...你邊算陌生人呀，我當你係我條仔都離唔切啦。」小苑回應，
然後斯斯然咁坐左上我部車嘅副手坐上面（即司機位隔離）。
「...阿姐姐，你識左我一日架咋，連我係個咩人你都唔知呀，
一啲戒心都冇...比人熔左都唔知呀！」我亦都坐左上車。
「...唉...我咩未試過吖，十三歲出離蒲果陣乜都試過啦，...開車啦...長氣！！」
小苑心急回應，睇離佢真係飽歷滄桑咁款，講起上離真係慚愧，
我由細到大都真係冇乜點出去蒲過，依方面小苑真係完勝。
「...開車啦！」小苑講。
就係咁，我就開左車啦。我將部車駛離太古城之後.....