中左六合彩頭獎四千八百萬，依家唔知點算?: 27
「...哈哈...仲捉你唔到。」思敏一枝箭咁標左過去，從後拍左黑仔膊頭一野。
「.....！」而黑仔就好驚訝咁嚇左一嚇。
「...吓...阿妹，咁啱嘅！」黑仔表情相當之尷尬，
望一望思敏之後再望一望我。
「...嘻嘻...拍拖都唔話我知，都收得好密實吓喎！」思敏繼續講。
「...吓...你地見到哂啦？」黑仔面色一沉，仲成個人標哂冷汗添。
「...嚓～！」說時遲 那時快，更衣室門突然打開，
終於都可以見到黑仔女友嘅廬山真面目啦。
「...吓！」
「...吓！」
「...吓！」我同思敏，仲有依個人同時大叫，因為估唔到佢竟然係....
「...文蔚！！」思敏大叫，因為原來係我個妹文蔚，
唔怪之頭先見到個背影熟口熟面咁啦。
「...吓...fafa，er....阿...阿哥！」阿妹一樣係不知所措，
口窒窒咁望一望思敏再望我，而我就冇出聲，
只係望一望佢兩個，之後粒聲唔出咁。
之後我地都係分開行街，到差唔多六七點，我地就各自返屋企食飯啦。
食完飯之後，我照常咁返左入自己房沖涼，沖完涼之後就坐左喺電腦枱前面hea吓，
但係heahea吓....
「...咯...咯...嚓！」有人敲門之後仲扭開度門推左入離添。
「...嘻嘻...阿哥！」係阿妹，而家佢笑到四萬咁口行左入離。
「...做咩呀？」我問。
「...嘻嘻，冇野呀...好耐冇同阿哥你傾過計啦，咪入離搵你傾吓囉！」阿妹邊講邊坐埋我床邊。
「...做咩呀，冇錢洗牙？」我問。
「...阿哥你咁睇我架，我似咁貪錢咩！況且你之前比我果十萬我都未用。」阿妹講。
「...哦！」我繼續敷衍。
「...喂呀，唔好咁敷衍我呢，係咪仲嬲緊我呀？」阿妹無奈回應。
「...嬲你咩？」我講。
「...頭先喺商場，見到我同黑仔之後你就冇出過聲啦，仲話唔係嬲？」阿妹講。
「...邊有姐！」我講。
「...阿哥你唔鍾意我同黑仔拍拖牙？」阿妹口窒窒咁問。
「...你咁大過人有你自己選擇架啦，我邊理得咁多。」我有啲悔氣咁講。
「...唔好咁啦！」阿妹有啲無奈。
「...真係冇野呀我...傻妹，不過唔知點解硬係覺得有啲怪怪地咁姐！」我雙手搭住阿妹膊頭講。
「...真嘅？」阿妹講。
「...真架，係呢...你地一齊左幾耐呀？」我問。
「...er...一個星期左右啦。」阿妹諗一諗之後答我，依家諗返起，
琴日喺旺角快餐店果度唔怪之得撞完阿妹之後又撞到黑仔啦，
原來佢兩個當時根本就一齊緊。
「...阿哥你覺得黑仔佢點呀？」阿妹再問。
「...咩點呀？」我講。
「...個人囉！」阿妹繼續追問。
「...er...幾nice嘅，但係份人點就唔係太清楚啦，
此終都係識左兩個月左右，好難知得哂佢為人架喎！」我邊諗邊講。
「...其實佢份人好好架！」我未講完阿妹已經衝住出離護航啦。
「...吖...咁快就幫住佢啦！」我講。
「...嘻嘻...邊係喎，咁其實我都識左佢好耐架啦！」阿妹嘴角含春咁。
「...好耐？」我問。
「...你唔記得我同思敏喺中學同學啦咩，中學果陣已經間中會同埋黑仔佢地打波，
都叫做識左十年八年架啦。」阿妹講。
「...你果陣已經鍾意佢？」我問，
因為我忽然諗返起思敏話果陣已經鍾意我，
所以聯想埋一齊。
「...緊...緊係唔係啦，只係想講我識左佢好耐，所以知道佢為人係點姐。
果陣我掛住讀書，邊會諗住拍拖吖，係近排佢知道我同男友散左之後，
就開始對我展開追求姐。」阿珠講到含羞答答咁，dup低左個頭。
「...哦...原來係佢追你！」我點一點頭。
「...嗯！」阿妹嗯左一聲。
「...唉...諗落自從搬左離新屋之後，我地家人嘅關係真係生疏左。
以前我地兩兄妹逼埋一間房度，雖然係好逼，但係成日都會傾計，
記唔記得細個果陣訓唔著，我就會叫上離同你玩句子接龍呀？」
我講，因為忽然諗起以前。
「...嘻嘻...記得...，仲有睇完（大唐雙龍傳）我地兩個就會扮埋識功夫喺度對打添。」
阿妹一邊諗一邊傻笑。
「...哈哈...哈哈！！」阿妹講完之後，
連我都忍唔住笑埋一份，唉...諗落到係以前開心啲。
「...唉...！」笑完之後，我嘆左一口氣。
「...唉咩呀？」阿妹問。
「...自從老豆開左間公司之後，都好小返離同我地一齊食飯啦，而且日日都早出晚歸，
我都真係好耐都冇同老豆講過兩句野啦。」我好感觸咁講。
「...你咁講又好似係喎，晚晚都好夜返。」阿妹和應。
「...係呢，最近返工返成點呀？」我忽然醒起。
「...都係咁啦，個位係幾悠嘅，但係就真係冇咩野學同冇前途囉。」阿妹講。
「...咁你自己知就好啦，阿哥就話冇咩點讀書姐，你話哂都係大學生，冇理由唔發揮一下多年離學到嘅野架嘛，
唔通你忍心睇住你苦讀咁多年嘅室內設計白白咁荒廢哂啦喎！」我用心良苦咁講。
「......！」而阿妹就冇出聲，喺度消化緊我講嘅野。
「...我唔係逼你，只係覺得咁太可惜姐，聽完就算啦，好啦...夜啦早啲返房訓啦，
聽日仲要返早工架...早抖！」我見阿妹唔出聲，於是打完場一邊講一邊推左阿妹出門口啦。
過左無耐之後，我就上床訓覺。第二日...返工依然係冇咩特別事發生，
但係到收工之後，黑仔竟然會約我喺屋企附近食飯喎！咁朋友係要見吓嘅，
於是我就冇返到屋企，泊好部車之後，就直接行左去屋企樓下商場嘅一間泰國餐廳度搵黑仔啦。
一行到入去，已經見到黑仔同肥恆兩個坐左喺度，
黑仔仲揸住枝泰象啤喺度倒緊。
「...喂...聰哥，依邊呀！」肥恆叫我，於是我就坐左埋去啦。
「...整返杯先啦！」黑仔倒左杯啤酒比我。
「...喂...唔該唔該。」我講。
「...做咩咁得閒搵我食飯先！」我拎住左杯啤酒講。
「...冇事唔搵得你食飯架咩，好肚餓呀...肥恆，叫啲野食先啦！」
黑仔笑笑口同我講完，再隊左個餐牌比肥恆。
「...肚餓...食屎都得啦，生蝦食唔食！」肥恆邊講邊接餐牌，再好認真咁睇，
而黑仔就拎住杯啤酒再拉一拉張櫈將個人貼近我，好似有啲野要同我密針咁。