中左六合彩頭獎四千八百萬，依家唔知點算?: 22
「...點呀...生哥？」過左半分鐘之後，我終於都忍唔住出聲問啦。
「...唉...占士又搞咩呀？」生哥有啲悔氣又無奈咁嘆左一口氣。
「...吓...er...！」睇離占士又比人投訴啦，因為條友啲藝術家卑氣經常都同啲跟單文員嘈，
人地好聲好氣問佢啲貨幾點送到，佢都可以小人地老母...話人地催佢嘅，有時仲會串啲客添，
頭先食飯果陣聽佢講過話今朝去到搵唔到個客問啲保安啲保安唔理佢都可以話人地仆街，
又話人地睇佢唔起又盛咁，大佬人地保安都係打份工姐，唔係事必要理你架嘛...都唔知條友諗咩架，
睇離今朝單野又比客投訴啦。
「...叫佢收吓把口啦，成日比人投訴。」估中左。
「...er...我同佢傾吓啦。」我答。
「...公司生意唔好呀，早排你老細已經話想cut一個司機架啦，占士成日搞風搞雨，
老細叫到我唯有交佢出離架咋，你叫佢自己好自為之啦。」生哥講完之後，
我就返左入倉執貨，下午送貨亦冇咩特別，收工之後...我如常返屋企，
食飯、沖涼，思敏依然打比我，傾到咁上下就上床訓覺。
之後兩日相對平靜，根本上只係星期一嘅copy。但係到星期三晚就例外，
因為每逢星期三晚思敏阿哥黑仔都會book左調景嶺體育館嘅籃球場，
所以其實我都跟左思敏出席左一段時間架啦。做左運動一排，
個人真係明顯咁高左、大隻左，自信心都返返哂離呀！！吖！！！
講吓笑姐，大家唔洗咁認真，不過做左運動之後呢，個人都真係精神左好多嘅。
今日亦都唔例外，返屋企食完飯抖一陣之後，我同阿妹就準時行到去體育館。
思敏同樣係企左喺體育館門口等我，之後就翹住我隻手好開心咁一齊行上去啦。
入到去...黑仔同佢班friend已經到得七七八八，其實我同佢地已經熟絡左，
黑仔同另一個都係住將軍澳嘅肥恆，仲會間中搵我落街食飯同飲杯野咁。
場入面射波嘅射波、換衫嘅換衫、玩電話嘅玩電話，拉筋嘅拉筋，
同平時冇太大分別。正當所有人都差唔多換好衫行返哂出離之際，
門口突然有個人行左入離...一個熟悉嘅身影。
離遠睇到喺一個女仔，身穿t恤legging，咩住個黑色背囊，
一步一步咁越行越近，三十秒過後，我終於知道佢係邊個啦。
「...好耐冇見啦阿瑜，快啲換衫先啦。」阿珠大叫，
因為離左嘅竟然係人間蒸發左個兩個月嘅阿瑜。
等阿瑜換完衫出離，我地就正式開波。阿瑜嘅出現令到我神不守舍，
今日嘅阿瑜同兩個月前好似有小小唔同左樣咁，紥左條馬尾，依然陽光氣息。
打完之後...我地坐左埋場邊，思敏依舊照顧周到、無微不至，又遞水又遞毛巾咁。
思敏喺我隔離，就算我有再大嘅膽都唔敢正視阿瑜啦，但係每當我眼尾及阿瑜果陣，
阿瑜竟然都係同樣咁及緊我同思敏，而且眼神仲帶點不忿，到底佢個心諗緊啲咩呢？
打完波返到去，我成晚都訓唔著，心入面對阿瑜嘅傾慕，全數咁射返哂出離，
無聽錯係射返哂出離...因為我覺得用個湧字已經不足已反映到我心入面嘅果種百感交集，
但係講到底我而家始終都係同緊思敏一齊，所以都真係冇咩可以做。
第二日...我照常返工，今朝啲貨真係小左好多，執完貨九點半鐘出車，
得果三四單貨...唔洗十二點已經送哂，仲可以落深水埗行一陣街添，
睇離公司生意真係差左。其實諗落...同上年同期比，生意起馬跌左四成，
難怪老細話要cut人，今朝見到老細落離生哥房果陣都西口西面咁，
又話個倉冇人果陣唔好開冷氣、又話廁紙用多左又盛咁。
今日我冇返公司食飯，喺深水埗睇完野就過左維記食豬膶麵。
之前跟思敏離食過一次之後就返唔到轉頭啦。而家間中經過我都會整返碗。
因為單拖嘅關係，基本上唔洗等位就可以直行直入。
我一邊食一邊撳電話，再試試我新買嘅藍芽耳機。
但係試試吓...電話真係忽然響起whatapp聲喎。
「...咇...！」唔通有貨收？撳入去睇吓先！
「...阿聰...做緊乜呀？」
「......！」我比個whatapp嚇左一嚇，仲deadair左幾秒添，
望左幾眼都以為自己睇錯，因為電話顯示...whatapp發送人，
竟然係阿瑜...！
「....！」一時間我唔識應對，坐左喺維記度左望右望，
就好似做左虧心事咁。冷靜落離之後...我再次拎起手機...
「...冇呀，返緊工囉！」聰13:45pm。
「...乜你仲有返工架？」阿瑜13:50pm。
「...緊係有啦！」聰13:52pm。
「...我仲以為你中左六合彩之後會冇做野添！」阿瑜13:55pm
「...唔做野好悶嘅，係呢...咁得閒嘅，唔洗返工咩你？」聰14:00pm
「...放緊大假！」阿瑜14:03pm
「...哦！」聰14:05pm
「...我心情不好，你收工可以來陪我嗎？」阿瑜14:15pm ，阿瑜竟然主動約我，唔知咩事呢？
我deadair左十幾分鐘都唔知點答佢好！
「...唔阻你啦！」阿瑜14:15pm，阿瑜見我十幾分鐘都唔應，再次send離短訊。
「...都ok嘅，但係你想去邊度？」聰14:20pm，我失守啦，始終都係忍唔住應承左佢，
咪當係陪個朋友囉，...我比左個咁嘅籍口自己，希望大家唔好話我衰啦。
就係咁...放工之後我就瞞住思敏走左去搵阿瑜。
阿瑜約左我喺香港仔中心等，我大約七點左右，
就揸住我部車準時到達。
我將部車泊左喺香港仔中心百佳門口，較低左車窗，晾住隻右手喺車窗出面，
觀望緊周圍嘅事物。開始天黑...因為依個位係市中心，所以而家周圍都好熱鬧，
好多啱啱收工嘅人，諗落我都成兩個月冇返過離啦，所有野都冇咩改變。
等左幾分鐘之後，就見到阿瑜從遠處嘅（舒適堡）門口走出，再向住我部車行緊埋離。
阿瑜同上次籃球場一樣紮左條馬尾，上身著住件運動背心，
下身就著住條運動短褲再加波鞋，咩住個背囊...應該係啱啱做完jym出離。
個頭濕濕地，再加果塊做完運動紅紅地嘅臉珠仔，真係好鬼死吸引。
「...嘻嘻...等左好耐牙？」阿瑜行到埋離我部車度。
「...唔係...一陣姐！」我答。
「...哦！」
「...上...上車先講啦！」我趷左起身，用左手推開左我左邊車門，
阿瑜就順勢行左上車啦。點解咁奇怪嘅，阿瑜喺電話度明明話心情唔好架，
但係而家見到佢又唔覺得喎，阿瑜面帶笑容咁一上車就笑，一啲都唔似唔開心囉。
「...er...你想去邊呢？」我口窒窒咁問。
「...好肚餓呀，去食飯先啦！」阿瑜好開心咁講，於是我就開車車左佢去食飯啦。
佢提議去食壽司，而且仲話要去堅尼地城食添。
於是我載住阿瑜沿住薄扶林道去到西環，阿瑜帶住我左兜右兜，
兜到去加多近街，阿瑜指示我將部車泊埋去路邊，
再指一指右手邊嘅一間舖頭。
「...依間？」我問。
「...係喎！」阿瑜輕挑回應，之後我就同阿瑜一齊落車啦。
間野個門面完全唔似壽司舖，成間黑蚊蚊咁，個名單字一個（濤）。
阿瑜好似好熟咁帶頭行左入去，而我就緊隨其後。
「...靚女又離拿，兩位係咪？」一個中年男待應好熱情咁招呼我地，
而且聽佢地嘅對話，阿瑜應該間中都有離幫嚫。
男待應安排左張雙人枱比我地坐低，之後阿瑜就開始點野食啦。
「...海膽手卷、三文魚子軍艦、拖羅.....」阿瑜叫左好多野食，
仲叫埋清酒，叫完就坐左喺度望住我微笑。
「...做...做咩望住我笑呀？」我口窒窒咁問，因為實在太尷尬啦。
「...冇呀，想望咪望囉！」阿瑜回答。
「...你唔係話...唔開心架咩？點解...仲係咁笑嘅...？」我有啲疑惑咁問。
「.....！」阿瑜靜左落離，個頭稍為dup低左小小，好似滿懷心事咁，但係過左幾秒之後....