中左六合彩頭獎四千八百萬，依家唔知點算?: 16
「...Fa Fa Wong向你發出一個關係邀請。」咩離架？撳入去睇吓先。
「...交往關係。」吓...咁快殺到離啦？即係要逼我向全世界公開我地嘅關係姐，
但係佢見到我在線上，唔回佢實知架喎，況且我個facebook其實都冇咩朋友架姐，
冇辦法啦...確定左先算啦。
「...～誰都只得那雙手靠擁抱亦難任你擁有～要擁有必先懂失去怎接受～」
當我一撳完確認，電話就突然響起，我望一望原來又係思敏。
「...喂...！」我接聽左。
「...嘻嘻...聰哥，做緊咩呀？」思敏好開心咁問。
「...冇...冇野做呀，差唔多訓啦！」我答。
「...哦....！」
「...有冇掛住我先？」思敏哦完之後問。
「...嗯...！」我唔知點答好，唯有嗯左一聲。
「...嘻嘻...星期三晚呢，得唔得閒呀？」思敏聽完之後好開心，之後再問。
「...er...得嘅，咩事呀？」我講，唔知佢想搵我做咩呢。
「...冇呀，星期三晚呢...約左文蔚佢地喺（調景嶺體育館）打籃球呀，聰哥你可唔可以陪我呀？」
哦...原來約左阿妹佢地打籃球，咦...落去比佢睇到我雞手鴨腳咁都好喎，
話唔定比佢啲friend笑吓，思敏會覺得尷尬而嫌棄我喎！
「...應該都...ok嘅！」我答。
「...嘻嘻...好野，你知唔知呢...我頭先食飯果陣喎.....」就係咁，
思敏好開心咁繼續分享佢嘅晚餐趣事....，其實佢唔去（寂莫的心電話熱線）果啲做真係嘥左，
就算想自殺嘅人，同完佢傾計之後都會即時改觀。
同思敏傾到差唔多十二點左右，我就收線訓覺啦。之後果兩日都冇咩特別事發生，
好快就到左星期三，今日喺公司...依舊乏味，好唔容易終於都捱到收工時間。
拿拿臨衝到停車場攞車之後，就揸住部愛驅落左去跑馬地接阿妹再返返去將軍澳啦。
一返到去...阿媽啱啱開飯，而老豆就要處理新公司啲野唔返離食。
我地食完飯...坐左一陣阿妹就叫我出門口啦！
其實（調景嶺體育館）就喺我屋企樓下，基本上...一落樓行五分鐘就到。
阿妹因爲以前係校隊而且一直都有打開波，所以依家全套武裝上陣。
但係我中三之後就冇掂過籃球，所以而家著住一件去街著嘅Jordan 波衫，
加一條訓覺著嘅波褲。差唔多行到（調景嶺體育館）門口，
離遠見到同樣係全套武裝嘅思敏，已經企左喺門口度向我地係咁揮手。
「...蔚蔚！」
「...Fa Fa！」阿妹行先已經跑左上前同思敏傾緊計啦！
而我就仲係龜速咁慢慢行緊前去，身形矮小嘅思敏，
今日著左套籃球波衫褲，上身再加件白色t恤完全逼爆，
搞到附近嘅男仔行過都會不斷回頭。
「...嘻嘻...聰哥！」到我行到埋去果陣，思敏行左埋離啦。
「...哈佬！」我講。
「...er...文蔚牙，不如你上去先囉，我同聰哥轉頭上離！」
思敏有啲怕羞咁望一望阿妹講。
「...吓...哦...咁....咁好啦，咁我上去先啦。」阿妹打左個突，
之後同我打左個眼色就自己行先啦。而怕羞嘅思敏一見到阿妹行左入去，
就即時轉mode雙手捉住我條腰攬左埋離。
「...嘻嘻...好掛住你呀！」思敏好開心咁講，我同思敏嘅高度其實相差好遠，
我有成178cm，而思敏就只係得150左右，大約高佢一個頭，
所以而家我只係望得到思敏嘅頭頂，但係淨係聽把聲，
我都feel到佢開心到極點，到底佢鍾意我啲咩呢？
比思敏佢攬左幾分鐘之後，佢就翹住我隻手一齊行左上去體育館啦。
行到上籃球場門口果陣，我開始有小小想走囉，因為原來除左我見過嘅阿妹啲friend之外，
仲有一堆唔拿識嘅男仔囉。
「...做咩呀？」思敏見我停低所以問我。
「...冇...冇野呀！」我硬住頭皮回應，其實好淆底囉！
「...嘻嘻...入去啦！」終於思敏都拉左我行左入去，沿途果班男仔都對我上下打量，
班男仔睇落都係同我咁上下大，全部著住同款波衫，個個都勁pro咁，
應該係一隊球隊離，再望真啲其中一個正正就係思敏嘅阿哥，
咁睇離果班九成係佢阿哥啲朋友。
「...嘻嘻...阿哥！」思敏翹住我，好風騷咁走向佢阿哥。
「...嗯...！」佢阿哥嗯左一聲，再望一望我。
「...你男友...點稱呼呀？」佢阿哥好鬆容咁問。
「...嘻嘻...佢係阿聰呀！」思敏有啲怕羞咁為我介紹，之後我地互相都點一點頭示好。
「...阿哥！」喺廁所行緊返出離嘅阿妹離遠叫我。
「...乜佢係ivy阿哥離架？」思敏哥見到之後，好驚訝咁問思敏。
「...係呀！」思敏回應。
「...哦...打波...打波！」思敏阿哥哦完之後，就交左個籃球比我啦。
思敏幫我張我個袋放喺場邊，試吓先...
「...啪...！」一拍個波即刻彈左落隻腳度轆左出場邊啦。
唉...冇計啦，讀書果陣因為身形比較高，通常都係打低，所以拍波已經唔係好架啦，
再加上十幾年冇掂個個籃球，而家仲更加衰多兩錢重添，拍左幾分鐘都仲係甩手甩腳，
平均十球就有七球都係拍拍吓個波唔知飛左去邊嘅！
阿妹見到我咁都冇眼睇啦，到正式開波果陣，我就同阿妹、思敏、思敏阿哥、
同另外一個好高、好大件嘅男仔一隊，而另一隊就有阿妹同學阿珠，同另外四個唔識嘅男仔。
其實都唔係啲咩正式嘅比賽，都係普通打廿一分嘅友誼波，因為我本身都有成178cm高、
中等身形黑黑實實咁，所以比人叫左落去打籃底。
一開波大家都打得好hea，我亦都唔例外...行行企企成個（行街明）咁，
但係打打吓...對面隊我負責防守嘅果個男仔，忽然間對我有啲微言喎！
「...foul！」已經係佢第三次叫foul啦。
「...喂...哥仔，打左三次手啦喎！」個男仔有啲唔好老皮咁向我投訴，
老實講...我真係唔係好識打，所以都唔知到底係咪自己問題。
「...sorry囉，我都唔知有打你手。」我有啲無奈咁回應。
「...吓....！喂，黑哥...條友真係唔識架喎！」男仔聽到我講之後，
更加嬲...仲同思敏阿哥講出一句（頭文字d）入面，余文樂串杜文澤嘅經典對白。
「...算啦...玩吓姐，唔好咁認真！」思敏阿哥可能都驚個妹尷尬啦，
盡量幫我解畫...之後我地繼續打果陣，我都專登同果條友保持距離，
盡量都唔同佢有身體接觸，到最後我地緊係輸啦...不過玩吓姐...冇咩所謂啦。
不過就唔明點解果條友硬係針對住我，全場都睥到我行一行，好似殺左佢全家咁。
「...呼...呼....！」打完一場之後，冇做開運動嘅我就緊係叫換人啦，
依家死唔斷氣咁坐左喺場邊扯哂哮咁。
「...知死啦咩，平時叫你做多啲運動又當我耳邊風，你睇吓你依家連女仔都不如呀！」
同樣換出嘅阿妹依家坐喺我隔離挖苦緊我。
「...呼...呼....點知你地原來約埋思敏阿哥果啲friend一齊打架姐，我諗住離嬉戲架咋嘛，
思敏阿哥佢地仲要咁q勁，成班都好似打職業咁嘅...都痴線架！」我講。
「...你唔知思敏阿哥以前係校隊離架咩，佢地果陣攞個學界亞軍架，
我地中學果陣有個打過港隊姓周嘅女教練，都係佢地啲friend離嘅。」
阿妹講，而家諗返起，阿妹中五果陣打過校隊大後備，唔怪得識啲人都咁勁啦。
「...仲有呀，頭先你mark果個又高又大隻、黑古勒突，成個賓仔咁好大隻眼果個男仔呢！」
阿妹嘅形容，相信就係頭先話我打佢手果個。
「...果個叫做阿盤，追左思敏好耐架啦，不過思敏一直都唔so佢，
依家見到你係思敏男朋友喎，仲唔嬲到爆咩！」哦...原來係咁，
唔怪得條友一直都仇視住我啦。
喺場邊坐左一陣之後，佢地場比賽就打完。有啲人就繼續留喺場度射波，又
啲就行返埋離，思敏當然係行返埋離我度啦，不過連思敏阿哥都一齊行左埋離喎。