Welcome to Knot ~ Season 2: #151. 樂少

「呼~」我一飲，就K.O.咗半杯mint mocha。
薄荷冰涼的感覺，由我喉嚨直到我嘅心肺，我再長長咁呼咗一啖怨氣，舒服晒。
 
「點呀？有冇舒服啲呀？」魚魚關切咁問。
「嗱，雖然咖啡我唔在行，但Kwan仔嘅手勢，應該都有Sky8成嘅功力架。」靖邊講，邊好自然咁拖住Taz隻手。
「咩呀？﹗」Taz先係啤一啤我，再轉頭甜甜咁望住靖「佢夠膽話唔好飲？我頭都擰斷佢。」
面對呢一啲威嚇，我點敢唔服從？「好飲，拍得住Sky呀﹗我點敢話唔好飲呀﹗」
 
小卒都費事理我同Taz：「咪講咁多廢話，搞咩你今日冇理神氣？唔似你喎。」
「重駛問，實係情傷啦﹗」連同我唔係太熟嘅師太，都一眼睇得穿我，我諗我真係好嚴重。


「唉~」我眼角不期然咁飄向係另一角落、著住工作服嘅Scarlett。
「唔係俾師太講中呀？」King望住我，好似已經知我想講咩咁。「你同青唔係好地地架咩？」
「青…」我眼神開始放空「我諗，我俾佢呃咗…我好有可能其實係小三、或者小四五…唉~」
「唔係啩？﹗」Taz好大反應咁企咗係到，令到全枱…唔係，係全場嘅人都向佢投以奇異嘅眼光。
「你坐底先啦，駛唔駛咁大反應？」靖係咁拉Taz坐底。
「講﹗有咩我實撐你架。」Taz義正詞嚴咁講，我真係好感動呀﹗
「嗚…Taz，我估唔到你咁鍚我架。由細到大你都係蝦我多過食飯…嗚…估唔到…」
「妖~ 我話你知，」Taz一手推開想攬住佢嘅我「係呢個世界，就只有我、King同Oppa可以蝦你，其他人？問過我先啦。」
「吓？﹗」我都唔知俾咩反應好。
「講啦，亞青做咗啲咩呀？」連師都忍唔住喇。


 
我開始慢慢咁由前幾日，係Wilson到聽到嘅事，再講到琴晚，再到今日…當然啦，有關我同Scarlett嘅事，我當然係刪減咗唔少啦。
「兄弟﹗」King我講完之後就一手搭住我膊頭「總之有咩事，我哋成班都會撐你。你想問清楚搞清楚嘅，我哋會陪你；你想劈想飲，靖實俾個場你玩；你想重新嚟過去溝女，路比唔陪你，我都陪你喎。」
「多謝你呀King哥﹗」對住呢班好朋友，我重可以講咩喎。「咪住先﹗你陪我溝女？我唔想亞嫂炸我型喎。」
「…」King突然面色一沈「亞咩嫂呀…散咗喇。」
「吓？﹗」今次我地全部人都成功捕獲全場嘅目光。
「咪咁大反應﹗坐底﹗全部坐底﹗」反觀亞King，佢係尷尬多過難受。「我冇嘢喎。頺咗幾日，啫喱陪咗我啦。我宜家ok喎﹗」
 
「Oppa一早都知？佢做咩唔同我講呀？」Taz問。
「Oppa…講開啫喱，我有嘢講呀。」我開始再將我見到森木嘅事，都一五一十講俾大家聽。


「Sorry﹗打斷一下。」師問「呢個森木，係乜水？」
「森木係日藉華僑，係啫喱以前條女，都散咗三四年架喇。」King似乎好似做咗啫喱嘅代言人咁「當年佢成日都同啫喱一齊，學整包學整甜品蛋糕，啫喱都諗住可以同佢拍住一齊做，兩口子開開心心咁。點知冇耐森木話要返日本，要同啫喱分手。本來啫喱都冇咁傷架，覺得做唔成情侶，咪做朋友囉。點知後尾先知森木其實只係返咗日本三個月，返到嚟香港就開咗間日式甜品店。」
Taz繼續講：「Oppa本來都覺得算。好衰唔衰個森木返咗嚟，又想食回到草喎。但係後尾俾我哋知到，原來森木已經同另一個有錢tb一齊。Oppa咪堅嬲﹐覺得森木返嚟搵佢係有目的。」
「聽講佢時不時都纏住Oppa，所以我哋都好唔鍾意佢。」我重申我哋幾個嘅立場「點知佢宜家重嚟咗呢區開店，都唔知佢想點。」
 
「咁真係好煩咁喎﹗」師太若有所思咁回應，忽然又拍一拍佢身邊唔算肥嘅師：「係喎，肥師，你又話啫喱有嘢同你講底嘅？」
「哦？﹗」師好似如夢初醒咁「呀﹗係呀。我琴晚…其實係今朝4、5點，係附近見到啫喱，佢叫我有機會就同你哋講，佢要去一轉台灣喎。叫你哋唔駛擔心佢，一切搞掂好，佢自然會聯絡你哋喎。」
 
「台灣？」靖問「唔通去搵Sky？」
「Sky…唔知宜家佢點呢？」獅問咗一個，大家都好想問嘅問題。