Welcome to Knot ~ Season 2: #147. 樂少

究竟Oppa去邊？
玩神秘失蹤咁堅？
 
「樂少~」就係我離開咗Jerry's Bakery，沉思緊Oppa可以去得邊時，身後突然有人叫我。
回頭一望，OMG~ 唔記得咗佢好有可能係呢頭出現添！！
「呀…Hi！好耐冇見喇！」避無可避，咁就唯有面對囉。
「好耐冇見！你幾好嘛？」眼前女子客氣咁講「我都諗緊，幾時會有機會同你哋打個招呼。」
「哈哈哈~ 係囉，又會咁啱係到見到你。」我明顯係皮笑肉不笑咁應付住佢。
「都唔算啱架喇，我係後兩條街到準備開間日本菜，宜家都裝修緊架喇。」此女子笑得咁燦爛，反而令我覺得佢做一齊係早有預謀。
「係咩係咩？又會咁啱揀返呢區，你應該唔會係想近啲啫喱啩？哈哈哈~」既然係咁，我又同你玩下語言偽藝。


「哈哈哈~ 樂少你真係，仍然咁搞笑！咁冇話舊情人係呢區，我就呢世都唔可以嚟呢區架﹗好喇~ 我重要去睇下啲裝修點，遲啲開張，請你哋嚟啦。」連拜拜都唔講，好明顯係想嚟同我落個下馬威啦。
 
哼！以為我會驚你咩？
森木，你咪以為自己係我前亞嫂，我就會驚你，出賣我兄弟呀？我先唔會呀。
當年你害到Oppa咁慘，你唔好以為我唔知呀！
我先唔會同你friend呀！NEVER！！
 
我繼續懷住忿忿不平嘅心情，沿頭想去睇下見唔見到Oppa。
點知…「樂少！」
咩事，做咩今日咁多人係我後面叫我！


 
原來係Willson。
一見到佢，又令我諗返起琴晚嘅事…
嗚…嗚…好衰架！做咩要又撩起人哋嘅傷心事喎~
 
「樂少！做咩呀你？垂頭喪氣咁嘅款？」Willson已經行到埋嚟我身邊，想扮睇唔到都唔得。
「我…啊…Hi~ 咁啱呀？」為咗掩飾我嘅失落，我只好係到強顏歡笑。
「吓！你企咗係T.Y. Salon門口，我要返工，好難見唔到你喎。」明明係寸緊我，唔知點解由Willson把口講出嚟，我又覺得好似好有道理咁。
「呀…係喎。唔好意思呀吓。」都係嗱嗱淋hea咗佢，走人好過。
「By the way樂少，上次我同你講嗰啲嘢，你當冇聽過啦。我唔想影響到人哋嘅感情！」Willson點起咗支煙，再遞咗支俾我。


我完全莫視咗佢嘅動作，只係好大反應咁話：「人哋？！你講嘅人哋，係指我同亞青，定係Teddy同亞青呀？」
「噢~原來你已經知道咗。」Willson淡淡咁呼出煙圈，成件事好似同佢冇關咁！
「咁其實你可唔可以講清楚啲，究竟你知道啲咩呢？」見到佢咁嘅樣，真係愈嚟愈火！
「我？我知道啲咩重要咩？最緊要係你知道事實幾多，同知道自己想點啫。」Willson好chok咁對我笑咗一笑，就自行轉身走咗入T.Y. Salon喇。
 
想點啫？係咪厭我平日用腦用得少，宜家一次過要我用盡佢？！
究竟Oppa去咗邊？
究竟森木想點？
究竟青同Teddy係點？
究竟我同青係點？
究竟…我同Scarlett又係點？