Welcome to Knot ~ Season 2: #145. 樂少

終於好唔情願咁撐大對眼。
嘩~ 駛唔駛咁刺眼呀？
望一望床頭鐘，11:46，有太陽，即係朝早啦。
 
再望望四週…咦？！呢到邊到嚟架？
琴晚…我唔係同Scarlett Orange入咗佢房…即係Sky間房架咩？
但係宜家呢到…咁似客房嘅？
嘩~ 頭好痛…究竟發生咩事呀？
 
「叩叩！！」


邊個呀？咪叩門啦，愈叩個頭愈痛。
「入嚟啦。」我用我把沙啞得嚟好sexy嘅聲線，對門外嘅人講。
 
門打開，真係我嘅「汪明荃」！
「汪明荃？！」Scarlett 係我衝口而出之後，好天真無邪咁問。
「冇…冇！」唉，係女神面前已經冇執過個樣嘅我，宜家搞到重狼狽，唯一可以做嘅，就係轉移話題「係呢，點解…我會係客房架？」
「你琴晚飲醉咗嘛，咁我就俾間客房你瞓囉！」Scarlett 講到好理所當然咁。
「吓！？咁我…同你…」唔通琴晚真係咩事都冇發生過？點解我一啲記憶都冇架？
 
「咳嗯~」門外又有一把聲「其實呢，我下面人手就唔係好夠，同埋Knot不嬲都好似冇room service嘅服務。」


係靖！
係喎，宜家Knot係佢管喎：「所以呢，Scarlett 你可以返落去幫手未？樂少，琴晚房租就免，但係如果你休息夠，就唔該你幫手執返好間房喇。」
 
係Scarlett好可愛咁伸一伸利走返落去，同靖轉身走開嘅同一時間，我終於明白到點解靖可以變做一個小富婆，佢嘅管理理念，一個字：「好強」。
 
我足足用咗一個鐘去梳洗同執好間房，所以落樓嘅時候，就正正係Knot最忙嘅lunch time。
靖企咗係工作枱到，一邊幫手整嘢食，一邊好有系統咁叫楊言同Scarlett照顧舖面，又好有條理咁幫Kwan仔處理咖啡嘅order。
我真心覺得，如果Knot由靖去打理，應該好快可以發揚光大。
 
我同靖示一示意，就離開咗Knot喇。


問題係，我可以去邊呢?
屋企，唔想返；舖頭，今日off無理由返；我更加唔想去潛水班，要面對一啲我根本唔想面對嘅事。
路經Jerry's Bakery，我決定入去搵個兄弟吹下水，避下難。
 
入到去，就見到強嫂係到一腳踢，根本都唔得閒理我。
「強嫂，啫喱呢？」
「啫喱？佢唔係到喎。」強嫂一都冇望過我一眼，只係好努力咁同啲客收錢。
我行咗入餅房，就只係見到強哥同另一個師傅仔係到。
「咦？！啫喱呢？」我轉為問強哥。
強哥抬頭望一望我：「佢冇同你哋講咩？佢話要行開幾日，叫我哋睇住間舖咋。」
「行開幾日？」我問「咁有冇話去邊？」
強哥慫一慫個膊頭，就再次底抬搓佢嘅麵粉喇。
 
我立刻send咗個whatsapp問King，佢同啫喱咁老死，冇理由唔知。
可惜…連King都唔知，重問返我轉頭！


 
奇怪，咁究竟啫喱去咗邊呢？