Welcome to Knot ~ Season 2: #140. 樂少

點解？
點解會係咁？
呢頭先同我情話綿綿，話對我有幾真幾愛我，嗰頭就殺個TB出嚟！
係我好蝦啲，定係PURE或者不分，注定要輸俾啲死TB？
 
我講過，本尊唔喜歡當街當巷做SHOW咁俾人睇住晒，所以無論宜家個心情幾差，個人係幾想死，我都唔會係條街到流一滴眼淚。
我揚起手，截停咗部的士：「師傅，唔該你同我過海…」
「咦？！又係你呀小姐，你個朋友呢？今次駛唔駛快呀？」
頂～玩嘢呀？！點解又會截返頭先個部車架？全香港只係得一部的士咩？
 


可能見我一個人，又黑口黑面咁，個司機最後都係選擇唔再出聲，安安静静、平平穩穩咁車我返到去我最熟識嘅海邊。
 
但…問題係，我可以去邊？
返屋企？我唔想俾我亞娘見到我咁。
去Oppa到？佢自從Sky過咗台灣，好明顯自己都頺費咗，我重點敢煩佢。
去搵Taz？嗚…宜家嘅我真係唔想見到佢同靖係到卿卿我我。
King哥？斷估佢今晚都係過咗去搵Winnie。
天呀～你係咪真係要玩到咁盡呀！？
最後，我選擇坐咗係碼頭到吹吹風。
 


「樂少？！」
邊個？呢把好似天使一樣咁溫柔嘅聲音，係屬於邊個架？誰輕輕叫喚我？
「樂少！Why are you sitting here?」
講英文？！唔通係…
 
「Scarlett？！」抬頭一望，就見到呢個鬼鬼地嘅美女，俯身向前，對住我微微一笑。
「樂少！Why are you sitting here?」佢再問多我一次，但聲線依然係咁溫柔。
「我…我…」唔知點解，一感受到佢嘅關心，我就有種想喊嘅衝動。
「Are you OK？」可能Scarlett見我情緒有啲波動，所以佢都坐咗係我隔離，軟軟嘅小手輕輕放咗係我手背上面。
一被觸碰，我本來一直強忍嘅眼淚就開始缺堤：「我…嗚…嗚嘩~~~」


「It's OK 樂少，Don't worry。I'm here！」Scarlett溫柔咁安慰我。
 
雖然我宜家係好傷心，但係面對眼前嘅美女，我都不禁分一分神，心諗：「咁正嘅女仔，又點會好啲變態嘢架？不過就算真係，對住佢，死都抵啦。」
 
「如果你想喊，你喊啦，我會陪住你架。」Scarlett今次重哄個人埋嚟！！
「嗚…嗚…我…我唔想係到喊…好樣衰…嗚嗚…」我一邊飲泣，一邊用手係咁遮住自己塊面。
「樣衰？！What's that？But anyway，我哋可以去Knot啦，嗰到都冇人。」呢頭講完，Scarlett嗰頭就已經拖住我隻手，拉住我向Knot嘅方向行囉。
 
一陣有如電擊嘅感覺由指尖傳到我全身！！
天呀！呢…呢種感覺…
唔通我又中招？
天，係咪祢見我可憐，所以冇咗個桔，祢俾返個橙我呀？
Oh！My Scarlett Orange~~~~