Welcome to Knot ~ Season 2: #137. 樂少

難得可以準時放工，梗係嗱嗱淋返屋企，執返正個人，跟手過埋中環等青放工啦！
 
我係IFC行咗好耐，麥記又坐完，又入咗蘋果玩咗好耐電話同iPad，又走去八下究竟幾時出iPhone6，咁當然係八唔到啦。就算人哋知，都唔會話俾我知啦。
結果無無聊聊，我就學啲電視劇咁，走咗去碼頭一邊飲啤酒一邊坐。
 
9:45pm，青終於放工過到嚟。
「Sorry呀樂，我一放工就趕過嚟架啦。」青上氣唔接下氣咁跑過嚟。
「傻豬，駛咩跑啫。」一開口，連我自己聞到個陣酒味。
青一手就係凳上拎起咗一罐啤酒，一開就飲咗一大啖：「嗄～咁你嚟接我，我唔想你等咁耐呀嘛。」
面對青呢番咁體貼嘅說話，我真係覺得好窩心。


 
「係呢～你今日約得我咁急，做咩呀？」青輕倚係我膊頭問。
青嘅髮香淡淡咁飄咗入我嘅鼻入面，面對自己嘅女神，呢一刻少啲定力，都真係會忍唔住。
「呀…冇。我…我有啲嘢想問下你。」我飲咗啖啤酒，為自己壯壯膽。
「嗯…我估！」青突然調皮起來，坐直直咁問我「你…想問我，今晚可唔可以上我到過夜？！」
我又再一次O住咀，抬頭望住面紅紅嘅青。
究竟佢係因為飲咗而面紅，定係佢自己都覺得自己大膽而面紅呢？
 
「我…我唔係想問呢樣嘢。」點解我咁不知所措架？我一早諗定嘅台詞，同點不失霸氣嘅問法，去咗邊？
「你…」青又再講嘢「唔係想問我今日著咩色？」


「嘩！你係咪飲醉呀？」面對住面紅紅嘅青，我唯有咁樣估啦。
「邊會呀？我飲咗幾啖咋。」青又再輕倚係我膊頭。
「呀…乜你以前成日飲架咩？」我試探式咁問。
「我咪話過以前我會同friend去飲囉，落下bar開下party、食下飯，咁都會飲架。你都會啦！」青又飲咗一大啖啤酒。
 
「嗯…咁又係。咁…你以前啲partner呢？會唔會陪你去一齊飲？」我再問。
「一時時啦。咁有時佢哋唔想陪我，我咪自己去囉，大家都有自己嘅自由同空間嘛。」青繼續率直咁答，唔似講緊大話喎。
「咁…我係你第幾個partner？」終於開始入直路。
「樂，做咩你今晚問我啲問題咁奇怪？你係咪有咩想知呀？不如直接問啦。」青今次唔單止坐直個人，重瞪大對眼望住我。
我明白，嚟到呢個位我唔可以怯，一怯，就咩勢都蝕晒架啦。