Welcome to Knot ~ Season 2: #117

雨停咗，但個天仍然陰陰暗暗，真係非常配合我嘅心情。
星期一嘅9：00am，Knot仍然由我呢個老闆娘主理。
 
琴晚同Scarlett一直傾到十點幾，講到最後，我自己已經唔想再沈淪落去。
「Sky，it's OK if you want to stop！I know it's so hard，但我好多謝你同我share你嘅故事。」Scarlett輕搭我嘅手「我知你聽日要飛，呢盒memory係好沈重，但你暫時帶係身邊都係件好事。Remember，memory should be in your mind and heart！有時Let go，唔等於真係let's forget！」
Scarlett讓咗我留係自己房到休息，佢就過咗客房。
我好多謝佢有咁體貼嘅安排，因為琴晚…我覺得自己連行返過客房嘅氣力都冇。
 
我有問過Scarlett，要佢係到做waitress，會唔會太委屈？
點知佢話：「Whenever you see your client can untied their knots by themselves and open their heart，呢份回報唔係錢可以衡量到！」


所以佢選擇返美國前，都會留係Knot去慢慢觀察、研究，就係為咗呢份滿足感。
 
有靖同我睇住Knot嘅運作、有啫喱幫手睇住食物嘅供應、有Kwan仔幫我睇住Knot嘅咖啡、有楊言同我睇住舖面嘅服務，宜家重有Scarlett幫手睇住，我真係可以安心咁走喇。
 
10:32am，路比推門入咗嚟Knot。
「早晨路比！」我將一杯Mocha同埋一個Banana Muffin放咗係佢面前嘅吧枱「咁早嘅你？你啲行李呢？」
「唔該。」路比呷咗一啖咖啡「起咗身，咪早少少過嚟食個早餐。我頭先過咗啫喱到先，啲行李放咗上佢架車架喇。」
「嗯~ 咁你慢慢先，我做多陣。我約咗啫喱11:30過嚟接我哋，應該都唔會太趕架。」我望一望錶，計清楚啲時間。
「OK呀，你慢慢啦。班機2:45，實夠時間架。不如你諗下有冇帶漏嘢好過啦。」呢一刻我同路比嘅性格就好似調轉咗咁。
佢嘅輕鬆同我嘅謹慎，根本就唔似一個水瓶同人馬嘅性格。


有時我都會諗，點解呢個明明行為同真實年齡都細過我嘅人，往往都做咗一個大哥哥嘅角色去照顧我架呢？
 
我初初認識嘅路比，同宜家嘅佢嚟比，真係成熟、穩重咗好多。
以前嘅佢係冇咩目標，唔知自己想點，有學就返、有工就做、有女就溝；宜家，佢好清楚自己係事業上同生活上想點。唯獨就係感情上，仍然令我好擔心。
 
不過，我宜家已經冇空間去理到咁多其他人嘅事。
或者…等我真係可以放開咗個心結嘅時候，我先好好咁幫我呢個好「大」佬物色返個亞嫂啦。