Welcome to Knot ~ Season 2: #114

午市過後，我先有時間打個電話俾路比。
真係辛苦晒佢，佢一聽到係商務機票，就拿拿淋同上頭伸請推前個假。佢話未試過坐商務，人一世物一世，點都要試下喎。
之後再通知咗靖、啫喱、樂少同Taz，話俾佢哋知我聽日下晝會飛。
再之後，當然係Whatsapp響唔停啦！
 
下晝啫喱過嚟補貨時，拎住一個大袋。
「嘩啫喱，你幾時轉埋行做藥房架？」面對Kwan仔嘅揶揄，啫喱一於好少理。
放好啲糕餅，就入咗嚟工作枱同我講：「呢到有啲日用品同藥，帶埋過去啦。」
「啫喱…」說話未完，就已經被打斷。
「乖啦！」啫喱憂心咁望住我「我應承你留係到幫你睇住Knot，你都要應承我過到去會好好睇住自己先得架！」


「嗯。」我唯有乖乖咁點頭「放心啦，台灣我大大話話都住咗大半年，真係OK架！」
「我打咗俾路比，聽日佢會早少少過嚟先，我會車你哋過機場。唔准話唔駛呀！」啫喱絕對知道我諗緊咩，我未開口，佢就已經落定閘，重要閂埋後門。
 
安撫咗啫喱，亦都算解決咗其他好友嘅叮囑同買手信嘅要求。
直到Knot收咗舖，我先有時間開始執自己嘅行李。
衫同必需品，我都只係簡簡單單咁處理。基本上，OC就係我第二個家，身外物我基本不缺。
 
但係有一樣嘢，我一定唔可以唔拎。
叩一叩自己嘅房門，同Scarlett講咗聲，就用鎖匙開咗自己嘅床頭櫃。
除咗passport 同一啲台幣之外，我重係櫃嘅最深一個角落，拎出一個鐡盒出嚟。


 
半蹲係自己嘅床邊，手輕輕撫摸住個鐡盒面。
我深明鐵盒入面所承載住嘅，係一啲我唔敢再去觸碰嘅事實。
有啲唔敢去打開個鐡盒，感覺…有啲驚去面對過去嘅一啲事實。
 
「Sky？！Are you OK？」Scarlett本來準備緊我同佢嘅沙律晚餐，但因為見到我定咗形咁，不禁叫咗我一聲。
「嘎？！哦…哦，冇事呀。」我迷迷茫茫咁，元神尚未歸位。
「Sky~」Scarlett又曉有深意咁叫住我，我知道，我逃唔過佢嘅法眼。
 
我捧住個鐵盒，坐咗係琴晚嘅位置。


鐵盒唔重，但捧係手，仍然覺得需要用好大嘅力氣，先可以拎得起。
係盒重？定我嘅心太沈重？
 
Scarlett亦都坐返係佢嘅位置，望住我溫柔咁笑。
「唉～」我輕輕嘆咗口氣「有冇人同你講過，係你面前真係冇咩可能守到秘密？」
「Well！」Scarlett慫一慫膊，不置可否「If you think you are ready， then please go ahead！」
 
我嘗試打開個鐵盒，但因為內心嘅懦怕，我雙手有啲震，而打開鐵盒嘅動作，亦顯得好手忙腳亂。
我一邊笨拙咁試圖打開個鐵盒，一邊瞄一瞄Scarlett。
Scarlett並冇打算伸出任何援手，佢只係笑坐係到望住我，一直好溫柔咁望住我。