Welcome to Knot ~ Season 2: #107 啫喱

緊緊抱住Sky，我任由佢伏係我膊頭到喊。


呢個傻妹究竟係咩構造，點解可以一個人受咁多苦，撐咗兩年咁耐？
 
直到Sky平伏咗落嚟，我輕輕拉住佢坐低。
咖啡我唔識沖，但喺展櫃拎件甜品出嚟，呢啲嘢我都重識做。
「食件蛋糕先啦，食啲甜嘢可以令個人舒服啲。」放低件Double Chocolate Cake係佢面前，我選擇坐咗係Sky對面，默默咁睇住佢食。
 
只係食咗1/3，Sky已經放低咗隻叉。


「唔食多少少？你今日都無點食過嘢！」
「唔～冇咩胃口。」Sky搖一搖頭「啫喱，今晚…我想留係Knot到。我…想一個人靜下。」
「嗯～」 我相信除咗應承佢之外，其實我都無得揀「但係你要應承我，今晚唔好諗咁多，好好休息。」
 
Sky牽強咁笑一笑。
後門嘅門鐘亦係呢個時間響起。
我起身去開門，門後係已經推住Sky行李嘅路比同靖。
「咦？」我側身俾佢哋入嚟，同時亦嘗試尋找其餘兩個人嘅身影「個衰妹同樂少呢？」
靖負責解答我嘅提問：「佢哋留咗係你嗰邊，話等你返去，同你談心喎！」
我笑咗一笑。呢兩個小朋友，無論點樣胡鬧，我知佢兩個都係關心我嘅，不枉我一直以嚟都咁錫佢哋。


 
我望住靖同路比係到幫Sky執返啲杯碟。
其實Sky身邊都有好多知心好友，我完全可以放心，可以將佢交俾靖同路比照顧。
 
我同佢哋示意會拎咗個喼上去先。
一手抽起個喼就行上樓梯。
嚟到一樓，推住個喼一扭開個門把手…咦？！鎖咗嘅？
試多兩次，都係唔得。
正百思不得其解嘅時候，房門竟然自己打開！
 


我望住「自動門」嘅移動，靜待門後嘅動態。
門開。身穿鬆身上衣、同短得不能再短嘅短褲，Scarlett一臉錯愕咁望住我。
「呀！Sorry呀！我掛住諗嘢，都唔記得咗你宜家係到住。」真係尷尬到極點。除咗係因為開錯房門外，亦都係因為Scarlett身上嘅衣著。
 
我唯有別開面，唔望佢。
「Oh！You just scared me！我重諗緊邊個係到開房門。That's fine Jerry！」Scarlett 嘅輕鬆同我嘅拘謹，形成強烈嘅對比。
「你…係咪需要入嚟？Or anything I can help？」Scarlet側住頭問。
「唔…唔駛。我其實係要去1號房。呀～今晚Sky會係嗰到瞓。話聲你知啫！」
「What？！Are you sure everything between you and Sky is OK？」