Welcome to Knot ~ Season 2: #104

結果，Taz唔敢郁手去拎杯橙香咖啡。當然，其他人都唔敢亂嚟。
我轉身再次盡量投入工作，並無再理會佢哋。
可憐嘅咖啡就係咁呆呆留咗係吧枱到，無人敢碰。
 
3:00pm，樂少比平時早咗嚟tea。
「喂！乜咁齊人呀？Buddy你都係到？少何喎。」樂少嘅輕佻，同宜家嘅氣氛有好大嘅落差。
可能因為大家都坐係吧枱，樂少今日嘅選擇都有所唔同。
「Hi。」路比拉開身邊嘅凳，邀請樂少坐「今日有啲事，要同Sky傾下啫。」
「哦…OK。」樂少係輕佻啲，但佢份人一啲都唔八卦。既然大家都無意慾去講多啲，樂少都唔會去問。
 


「楊言，照舊。」樂少揚一揚手「咦？！咪住！！點解有杯咖啡係到？重要咁香喎…邊個架？！」
三人都慫慫肩，Taz甚至遞手示意樂少可以飲。
「新產品？」樂少有小小遲疑。
三人一致咁點頭。
「咁我唔客氣喇！」樂少開開心心咁拉咗杯咖啡埋自己前面「楊言！咁淨係俾件cake我得，今日我要…士多啤梨蛋糕！唔該。」
樂少呷咗一啖面前嘅咖啡，三人全神貫注咁望住佢。
「嗯～」樂少一臉大師嘅樣「有橙香味、咖啡味…應該用咗豆奶，有豆味…重有酒味…酒？Knot賣酒咩？Sky終於肯申請酒牌呀？咁咪好囉，以後唔駛自己去買酒過嚟party！喂！Buddy做咩踢我啫？搞咩呀？嘩～」
樂少俾路比㩒住咗個口，同一時間Taz就由座位到跳咗落嚟，一手拍咗樂少個頭一下。
 
兩人同樂少耳語咗一陣。


只係見樂少塊面一陣紅一陣青，最後只係吐一吐舌，就冇再講任何嘢，默默咁處理緊佢件蛋糕。
 
3:30pm，啫喱補貨過嚟。
整理好蛋糕展櫃，我繼續一言不發咁工作。
啫喱並無返過去自己舖頭。
「喂~ 你唔駛返過去咩?」樂少好奇咁問。
「我同強哥強嫂講咗，今日送完貨過嚟唔返過去，佢哋會幫我睇住架喇。我反而好擔心Sky。佢點呀？」啫喱查問住路比，似乎佢重未知靖同Taz、甚至可能樂少，都已經知道咗我嘅故事。
 
「佢咪粒聲唔出，笑容都唔多個囉。」靖出聲。
「Oppa，佢重要冇食過嘢呀。」輪到Taz係到打小報告。


「唉～」啫喱嘆咗一口氣「有冇人可以話我知，究竟發生咩事呀？個電話…邊個打嚟架？」
所有人都對路比行注目禮。
「唔好咁望我，我只係估到係台灣打嚟啫！」路比立刻落定閘，保障翻自己「咁佢搵得我咁急，一定同台灣有關啦，可能係…有Ocean消息？！」
 
「其實呢…究竟今朝個電話講咩架啫？」Taz終於都忍唔住，問咗一條其實路比、靖、啫喱、同樂少都好想知嘅問題。