[誤墜]係獅隧口落車 就出左事: ５７

望住關起左既繡花大鐵門，我先明白果晚我做左啲幾脫離常規既事。 

根本唔會有正常人無啦啦既開人地屋企道門，而且仲要係左右門併埋既時候、中間隱約會見到一個人臉。 

「返到屋企喇……好快無事。」我同個細路女講、摸摸佢頭。 

一打開大門，屋內乜人都無、只見到既係好多既鏡、好多既鏡，同第一次入黎分別不大。 

只係日光投射係屋內各角，未有加上陰沉的小屋令到恐佈感稍稍減少。 





至於我要做既野係…… 

「你咪見到個梳妝檯既，記唔記得有三個櫃筒？」白大叔。 

我點頭。 

「你要做既野：一，打開第由上而下既第一格抽屜，你應該會見到一張紅紙、寫住『紫逅』，燒左佢。」 

「二，打開中間果格，會再見到一張紅紙、寫住『八千代』，撕左佢。」 

「三，打開最大、最底果格既既櫃門，入面有咩我唔知、但同樣你要幫我燒毀左佢。」 

「就係咁簡單？」 

「就係咁簡單。」 

憶起白大叔既指示，我望向上次有一桿假髮在前、係角落既梳妝檯。 

 





今次無左枝桿係梳妝台邊，但仍然令人望而生畏…… 

我拿拿臨行過去，就拎起白大叔準備定比我既火機、打開第一格抽屜。 

果然，有一張紅紙寫住『紫逅』，我馬上燒掉。 

再黎，開第二格抽屜，我拎起寫住『八千代』既紅紙，竟然有幾隻牙跌左出黎。 

望一望身邊既細路女，佢好似剎時間表露出『諗起痛苦回憶』既表情、摸住自己小嘴。 

我無理太多，將手上既紅紙撕開好多好多份，隨手拋係地下。 

最後……我烏低身，打算開最下格既櫃門…… 

奇怪在，這個陰沈的地方令我不其然提高警覺、而眼尾則見到細路女既眼神微灣、望住我背後係到微笑…… 





我，好似忽略左啲野。 

我猛然挺身，見到鏡入面、我背後多左個女人…… 

一個著住黑裙，右手提起著一把紅鉸剪、左手不停送緊一撮大『頭髮』入口食既女人！ 

就係背後，緊緊的盯住你。 


……