[誤墜]係獅隧口落車 就出左事: ４３
其實我由踏入白祠一刻已經滿頭問號。
太多野我想知既，究竟點解班人要追我？消失左既人去左邊？點解白大叔會係到、究竟我惹左啲咩事出黎？如果我唔乜都唔理、個世界會點？定係我做咩都好已經唔會改變到個世界？
但係，岩岩先係我耳邊悄悄話既小白令攤係張床既我點都集中唔到精神。
望住佢喜形於色、塊面紅彤彤既樣行過黎講野，一步一足小舞步咁行返出去。
之後係房門前背向我，條裙花盈翩翩般起伏、隨小白轉動又轉左一圈。
果個情境係我腦內揮之不去，好似一節你突然愛上既旋律咁、不停重迴。
其實真係好難聯想到，第一眼見到既冷豔美女、啊爸面前既乖孝賢女、口語都唔識既細路女、同埋岩岩塊面紅卜卜行出去既小白－－全部都係同一個人。
照情況睇，可能我係到目前為止、唯一一個接觸過佢既同年人……
但都不至於令佢突然間對我既態度突然有咁大轉變……可能，我做左啲野令到佢咁、自己都唔知。
以上種種問題我完全得唔得任何結論，但碗筷佈係餐桌既聲已經開始係廳傳黎。
馬上，即使我諗唔出個因由、亦都會有人為我解開疑惑！
＊
為左唔好踩死白大叔啲唔知乜鬼『推宮蟲』。
小白幫我拆左腳上面既繃帶先叫我出去洗手食飯。
而佢就走去收返果兩隻野……頂，諗起又毛管棟多次！
中途我地冇咩講過野，小白好似有啲尷尬咁、我發誓我係完全唔知點解……
我問完佢個名佢就變成咁。
出到廳、見到餐桌上三碗飯、湯，一條魚、半邊雞、一道小菜。
魚既色澤光圓、通體出煙傳黎一陣魚鮮味。
半邊既雞本來平平無奇、奇在白大叔隨手淋上幾殼豉油，竟然令雞光滑泛黃既雞皮發出『咋咋』聲。
最後道小菜竟然先係真人不露相，原來係生菜包黎既！
喂！我係咪上左飲食節目？
白大叔比一比手勢：「坐啦後生仔。」
恭敬既野我都唔多識，我就一屁股坐左係佢對面。
冇幾耐、小白出返黎幫佢啊爸同我拉左兩下茶之後，就坐埋台一齊食飯。
其實我慣左對電腦食飯，無啦啦對人真係好唔慣、仲要唔熟既。
成程飯佢兩個都冇出過聲，我諗、佢地平時既氣氛、習慣就係咁……
『啪！』一聲，白大叔放低左碗筷，望住左我：「後生仔，得未？」
佢咁講到，我唯有學佢『啪』一聲擺低哂啲野……
件事終於開始入正題……
「你記唔記得我提過你唔好亂開人啲野？」無論白大叔既聲線同氣氛都開始沉重。
我點點頭：「記得，所以我冇打開到屋入面既衣櫃、但我點諗到原來道門先係伏！」
白大叔鈍左鈍，可能唔係太明個『伏』字點解。
「唉……」佢嘆左口氣。「咁，我諗你要聽我講一件差唔多成百年前既事先。」
白大叔講左個故事我聽，故事大概係講係二戰期間有兩個家系既日本人搬左去隨田村附近住。
分別係『白家』同埋『黑家』，佢地家系既特徵係雙眼只有純色－－全黑、全白，同普通人好唔同。
亦係因為咁，佢地先打算成個家系搬遷、搵個人唔多既地方開始新生活。
當初除左佢地兩家人之外仲有唔少原住民係到，但因為二戰香港被日本佔領、所以原住民都唔敢出啲咩聲。
『黑家』既其中一群年輕人好似留意到原住民對佢地心生恐懼、仲左有異於常人既雙目，仲有佢地聽唔明既日語。之後，就由青輕人與青輕人第一件欺凌事件發展到，差唔多整個『黑家』橫行霸道既情況。
當然，有讀過書既大家都知道－－『黑家』一定係好景不常。
日軍無條件投降，所有軍人面對佢地既"日不落帝國"剖腹自隊。
雖然，黑家、白家兩家基本上已經同日本全無關係……但日本人戰敗，佢地就馬上遭受當地原住民既反撲！原來只係敢怒不敢言既佢地，將滿腔既怒火完美地發洩出黎。
「妖怪！黑色既眼代表不祥！代表邪惡！我地係去降魔伏妖！唔洗驚架！」類似既說話係果一晚不停重複。
每一家姓黑既果晚都不得安寧，死傷枕藉。
白家本來祭師既族人後裔，當時既白家家主為黑家施左一個界，一個外人睇唔到佢地既『界』。
但黑家既人亦都絕對唔可以越『界』一步，否則會承受唔到界外既空氣。
件事好似就咁解決左，但自此黑家既家主就終日不出家門，獨留係房怨天尤人。
佢唔甘心整族人係佢手上帶領下、以後都唔見得光，佢不忿整族人受到侮辱。
好快黑家家主就得到當時既不治之症，係佢臨死前一個月、佢吩咐黑家既族人，以後世代都要跟佢既一個『儀式』－－將一對母女隔離佢地係一間屋入面、然後每日做重複一個動作，直動適當既日子再做一個動作，咁樣就可以詛咒所有人。
個動作係咩就連白大叔都唔知，好似只係得黑家既人先知道。
當時白家既家主知道左件事，知道事態嚴重、因為佢知個『儀式』叫『禁后』。
成功比佢完成到既話，可以令佢詛咒既人全部送到『另一世界』。（＊有一說是極樂
所以白家家主以佢既靈魂同身體，鑄左道鐵門封住果間儀式用既屋，黑家所有人都唔可能再出入間屋！
其後，黑家就不停依佢家主遺願重複個儀式、過住只可以係條小小村落活動既生活。
白家後代則負擔監視黑家既『儀式』。
講到咁，我已經啞撚哂。又咩黑家、白家，又死人又冧樓咁。
「咁，我可以點做？」我呆左好耐消化件事。
「只有你可以入去破壞個儀式，因為就連白家既人都唔可以開到道門、更加入唔到去！」
原來係咁！唔怪之得黑家既人想捉起我，就係怕我搞破壞！
「係咁既話，佢地直接殺左我唔係仲乾脆咩？」我問白大叔。
「我諗同樣同個『儀式』有關。」
「咁你講到你地白家咁把炮，點解唔收左個爛尾佢？」
「的確個結界仲係到，但只係一代傳一代既『維持方法』，去到我地果代已經冇能力再增減任何野。」
白大叔無奈咁講。
……咁我呢？我點入黎架？
「你身上係咪仲帶住妹頭比你既野？」
屌！原來係個御守令我轆撚左落黎！
我見小白面有難色、就忍住不發作，而加講咩都冇用啦反正。
「其實可以用你個御守入黎既只兩個口，你當一條直線通過左個圓咁睇、果兩端就係個口。
一個係你細個見到妹頭既地方，另一個就的確係你轆落黎既地方。」
屌，有冇咁撚好彩阿？