[誤墜]係獅隧口落車 就出左事: ４１

＊ 

好細個我已經住係沙田，細個仲係我阿麻湊大。 

佢好中意帶住我周圍去買餸，買野我食、買野我玩好鍚我。 

果陣既沙田，果陣既新翠，同而加唔同哂。 

以前會有各式各樣既鋪頭－－漫畫鋪、文具鋪、玩具鋪、報紙檔諸如此類。 





但係而加乜春都冇哂。屌，得返啲大鋪。 

有次我阿麻去新翠附近買餸，我就去左個公園玩。 

細個既時候即使去到邊到、見到差唔多年紀既就可以玩埋一齊，根本不分你我、亦無所謂圈子。 

「喂！大家、不如去隔田村公園囉！」細路Ａ說。 

「好啊！好啊！不過有咩玩架？」細路Ｂ連有咩玩都未知已經附和左。 





「唔知架！去到睇下咪知，數三聲我地鬥快去到！」 

我好留心聽住細路Ａ倒數，點知條友數到第二聲就跑左出去。 

我地成堆公園既細路十幾個就跟住佢跑，其實真係幾歡樂。 

細個總有人天生體質好、體質差，我細個賽跑多數都前面果堆。 

跑到去一個位置、我見到個著白色連身裙既妹妹，企左係到望住我地跑。 





大家年紀差唔多，我就行左過去向佢招手：「一齊玩啦！跟住黎！」 

白裙妹妹呆一呆，然後話：「你們去哪阿？」 
個女仔稚嫩既聲音好似仲未戒到ＢＢ聲咁。 

「隔田村公園啊！果個男仔話好似好好玩！」唔好話名、其實我連個男仔點叫都唔知。 

個女仔眨了眨眼，然後指一指後面就話：「我知這條路好快就到了喔！」 

我望一望後面，發現原本跟尾既細路全部都唔見哂，可能己經跑左上去。 

不甘就咁輸左做包尾既我，諗左諗就拖埋佢跑左去佢指果邊。 

「咁就靠你喇！」心入面諗，我有秘道仲唔係最快果個？！ 





去到公園、果然一個細路都未黎到，準備威既我當然要率先玩下公園既野先。 

「小白！」我叫個女仔。 

個女仔左右望望，然後用小巧的手指指住自己：「我？」 

細個就係咁、好容易就有個名，如果條友個頭飛起哂既就叫佢飛機頭、好似好多錢好多野食既既就叫有錢仔，得一隻門牙就唔洗講都知叫崩牙仔，你叫下、我叫下就變左通名，本名果陣已經唔重要。 

「係啊，你成身白雪雪，你一定係叫小白啦！」我由滑梯溜落去，邊溜邊講。 

個女仔冇答我，只係笑咪咪咁跟上黎同我一齊溜滑梯。 

「估唔到隔田會有膠既滑梯，好犀利呀！我果到係一條好長既鐵滑梯咋！」 

就係咁、我同小白你追我逐，玩左一個下午，但係原本班細路始終一個都冇黎到。 





我見天色差唔多，就知道我阿麻應該搵緊我。

「等陣又要挨鬧喇、不過冇所謂啦，今日好開心！」雖然班人冇黎到，我冇得威比佢地睇，但就咁比我發現左個好地方！ 

「咁我走喇！」我轉身就係滑梯跳落地、打算走。 

點知一野差錯腳側身仆左係地到，成個大脾就損哂…… 

「好痛！」小白都好慌張，但仲可以係佢個袋到拎左啲繃帶出黎、好似想幫我包咁。 

我見佢好似好利害咁，就卷起褲腳比佢舞。 

點知原來佢都唔識包，笨笨拙拙咁卷左幾個圈只係勉強唔鬆。 





我見佢包唔好我個傷口，心急到眼淚淚就喊咁樣、身為男仔既我就第一時間逞強。 

「我冇事喇！我真係走喇今次！」我企左係身，佢又慌慌張張咁跟我企左係身。 

比個傷口毑緊既我死扮冇事彈下彈下就走左去，點知成程都好少出聲既小白突然拉住我衣角。 

好認真望住我咁講：「你會不會再回來？一起玩！一起玩！」我諗佢信我真係已經冇事。 

果一刻我先留意到佢雙眼都係白色既。 

細個既我冇咩覺得特別出奇，只係以為咩人都有、話唔定隔田村啲人係咁講野既呢、話唔定隔田村啲人隻眼係白色既呢。 

「會！梗係會啦！」反正之後都會見，想知幾時都有機會啦！ 

小白會心微笑，係裙袋摷左樣藍色既野、雙手交比我…… 





 

「咩黎架？」 

「御守。可以保佑你。」 

細個邊識咩禮拜、咩好唔好意思丫，我一手拎左過黎『多謝』一聲就走左去。 

眼尾好似仲見到小白好唔捨得咁同我揮手。 

記得果年，我六歲。