[誤墜]係獅隧口落車 就出左事: ３９

見到白妹頭係廚房捧住一盆附住白布既熱水，仲夾住一包唔知裝住咩既白色袋。 

「行啦。」白大叔瞥左瞥頭示意我入房。 

做人老豆既佢唔覺得好似有啲問題既咩，叫個後生仔同自己個女入房喎？ 

個女仔真心仲要幾靚，係香港行出街已經係難得一遇既氣質美女。 

不過咁既時候，我都好難有其他歪念。 





我唯唯諾諾左跟左佢入房。 

「先生，脫衣吧。」雖然佢講到好易令人有其他諗法。 

但係佢認真、純潔既表情，莊嚴既氣氛渲染了我起來、令我不期然坐正左個人。

冇野既，佢係想幫我洗傷口姐。 

我除左上衣、佢就自動自覺幫我解開我身上既繃帶。 





「這是我包紮的，這還好嗎、會不會太緊，令你有點痛？」 

係未拆之前，即使經過咁耐、佢包既繃帶依然緊貼我胸口、背肌，絲毫沒有鬆落，簡直係專業水準。 

係佢毫不避諱咁控埋黎、專心幫我拆帶既時候，我聞到絲絲撲鼻既香氣，唔似平時街上面女仔果陣香水味、似係花香同體香混出黎既味道。 

隨住佢向前既姿勢，純白衣衫既領口有點下墮、誘人既曲線吸引了我眼球。 

而佢專心既手勢之下係完全毫不在意，唔係！正確黎講佢根本無為意！只係得我一個係到心邪。 





心入面馬上鬧左自己一句『人渣』！

為左唔好比自己有第啲反應出現，我強硬地將視線轉到她雙眼上。 

先發現原來純白既雙眼，一樣有瞳孔、有虹膜，仔細看紋路清晰可見、只係所有顏色部份都係純白。 

同佢面與面之間既距離好近既我，甚至感覺到佢鼻息一呼一吸。 

場面開始有啲尷尬，所以我隨便搵左啲野講…… 

「係呢，你識唔識講口語？點解你用書面語講野咁特別既？」 

一般男同男、如果係咁既情況一定係講哂粗口咁問：屌你、係咪有特殊既講野技巧，講野咁撚奇怪既？ 

但我可以話你聽、近９８％可能性－－任何男人同我處境一樣既話都會同我一樣講野文雅左咁多。 





無他，邊個唔想係岩岩至識既靚女面前留低個好印象呢？

但聽到既佢、成個人鈍左鈍，連手上既動作都停埋。 

「我……我講口……語唔……係咁……叻」佢差唔多好似係讀外語咁遂粒字、遂粒字櫈出黎。 

「我由細……到大……都係睇書……識字，好少有機會、同人……溝通。」第二句開始順好多。 

「細個冇學返，阿爸……成日唔係……屋企！我靠……字典識字。」 

原來係咁，佢細個係留係屋企又冇學返，冇同人溝通機會既人淨係睇書，就以為出面既人真係用書面語講野。 

剎那間，我覺得佢有啲可憐，返學其實係人生入面其中一個最美好既回憶。成堆同年齡既人係到一齊生活、箇中既悲喜絕對係令人係幾多年後、即使步入晚年都會懷念既時光。 





突然心生一個念頭，好想教好佢用口語講野，去接觸浪費左既美好時光。

當我想開口叫佢個名果陣，都係覺得好奇怪、『妹頭、妹頭』咁樣叫個後生女…… 

「不如你話我聽你叫咩名？」 

佢突然又停哂手、圓圓既雙眼滾滾咁望住我，面上唔知點解突然紅起左上黎。 

唔通佢發現左我『目及』佢？！應該唔係，可能只係我問人名、自己又唔介紹、佢尷尬姐。 

「我叫日京草，ＪＯＨＮ。」 

「日京草壯？」佢歪了一下頭。「四個……字咁怪既？」 

「唔係，我叫日京草、又叫ＪＯＨＮ。」 





「咁……個『ＪＯＨＮ』字點寫？」佢好奇既滾大雙眼望住我。 

我隨手點左點我身上仲有滲血既地位，係自己手背寫左四個字母Ｊ、Ｏ、Ｈ、Ｎ。 

「咁怪…既，我…從來…都未見過咁既…字、符號黎？」 

原來眼前這個女孩，除左唔識口語、連英文都未見過。