[誤墜]係獅隧口落車 就出左事: ２２

一瞬間，我既毛管全都收縮起黎、一陣陣既惡寒由我心傳到四肢。 

有幾個唔係幾好既諗法係我腦海滑過。 

除此之外……仲有幾陣『股、股』聲，係我個肚到傳出黎。 

咩廟都可以唔拜祭，唯獨五臟廟惡哂、唔祭唔得，因為佢絕對唔肯過你。 

係我企緊既位置轉左沿路直去、經過金獅花園唔遠既位置有間七仔。 





我決定去買啲野食同飲，順手問人借個電話打下先。 

但即使我途經新翠、金獅等等既住村都好，都係一個人都冇…… 

沿路經過泊左係到既私家車係空既、工程車空既、鏟泥機車空既、巴士站空既、一架巴士都冇埋站係總站。 

七仔冇理由冇人睇檔喇掛？


我行到埋去，真係滴左滴冷汗。 





竟然連七仔都冇人？！ 

『股～～』點顧得咁多……？ 

好在入面乜貨都係到，我拎左兩個係七仔麵包櫃架既吞拉魚包同埋拎左包麥精，大多數我既早餐都係咁配搭，而且成日都會諗起鄭中基個死人吞精樣仲要忍唔住笑。 

但，以為冇人係櫃檯我就會揚長而去？ 

Ｎｏ，我先冇咁蠢、咁大隻閉路電視望住，我一出去就撞到個店員返黎咪出事？ 





結果我係櫃檯放低廿蚊就心安理得咁邊行邊咬咁行出門口。 

好彩一向手機銀包跟身，即使冇意識下、兩樣野都會盡量保住係身。 

但……啲人究竟去哂邊？無理由沙田區甚至至哩頭附近有啲咩唔知既疫病要一夜撒走啲人咁誇張既理由都講得通掛。 

係我思潮起伏、紊亂如麻，向屋企方向慢慢行緊既時候； 

我褲袋傳來規律既震動……我手機響！ 

又驚又喜既我馬上拎部應該打柴左既高性能電話出黎，發現個顯示屏依然係冇野睇、但部手機就係咁係到震。 

屌！原來只係跌撚到睇唔到野！ 





我抱住搏一搏既心態、用平時聽電話既方法，係屏幕底端由左而右掃過去。 

電話最後震左一下，表示通話已接通！ 

喂！好滾動阿！咁既時候搵我，應該係擔心緊我既娘親！謝天謝地！ 

我興奮到即刻貼隻耳仔落部電話到。 
「喂？係咪娘親？說來話長，我沉日盪失路阿！不過冇咩野，而加返緊黎喇！」 

我咁講，其實真係唔想佢老人家太擔心、冇咩大礙就唔講佢聽算喇。 

但係由接通為止，另一廂仍然未出過一句聲。 

突然，從另一廂傳黎既係一陣猛風吹打至另一端電話既『逢、逢』聲。 





背景有點空洞、配上有點似打風果陣，一個氣流撞向帆布、擋風布既聲音。 

我嚇一嚇、拎遠少少左部電話，緊張感開始隨住每一下『逢』聲遞增。 

之後好似又開始靜落黎、我『骨碌』一聲吞左淡口水，再聽下個電話…… 

「你……」沙沙沙… 

「去……嘟嘟嘟……走！」一把彷似電子合成既聲音好似好困難咁講緊每隻字，中間夾雜住奇怪無規律既『嘟』聲。 

「又…嘟……快！……等！」 

「獨、獨獨、獨獨獨獨獨獨」電話傳來另一廂奇怪既聲音。 

唔係人聲，似係有人用手指對準個電話入聲位不停咁敲拍啲聲出黎…… 





「獨獨獨……」最後三聲，完左之後、手機掛掉通話既提示音就響起…… 

咩事……？