我係LKF做Party Girl: （六）「L，我想你陪我去巴黎。」 （已修改）
今日晨早，JC Whatsapp我，
「L，我好唔開心。」JC
「發生咩事？」L
「我識左一個男仔，佢同我講好多浪漫野，令我以為佢係真心既，點知原來佢有女朋友。」
「下，咁仆街。」
「佢係我Part Time 同事黎，我地──上左床，
之後有同事問我做咩同佢行得咁埋，人地有女朋友架。 」
JC 有時雖然睇落好MAN，但內心佢都仲係個女人仔黎，
猶其是當比人Hurt完之後，佢既戰鬥力可以變到得返副數。
－－－－－－－－－－－－－－－－－－－－－－－－－－－－－－－－－－－
JC 的日記
很久很久沒有寫東西了，自從2015年畢業之後，真正的投入社會工作，每天大部分的時間就是工作，吃飯，還有工作，偶爾出去約個會什麽的，人生不過就是如此而已，因為一次公司聚會，認識了一個叫Sam的男生，31嵗，算是打自娘胎後第一個一見鍾情的男生，樣子挺帥氣的，大概一米七五，雙子座，挺喜歡影人矚目的那種，那時候，大家在不同團隊工作，雖然經常在同一個辦公室，同一個活動碰面，不過内心的我覺得自己配不起他，而且潛意識裏告訴我：一般來説，帥的男生都是花心的。然後，就盡量不要和他接觸爲妙，免得覆水難收，直到有次小組會議結束了，他請她一起吃個飯，戀情就是從這裏開始的，2月。。 每一段感情，剛開始時總是很甜蜜的，無論對方為你做什麽，即使是買杯飲料，也會覺得很幸福，雖然知道他是個【媽寳】但覺得沒所謂，反正又不是一輩子，不就是一起拍個拖而已，可是漸漸地， 一起的日子久了，想到一起走將來了，問題就來了，開始對他那全部東西都依賴媽媽，有事找媽媽，上至所有財務，下至底褲襪子，打從心底咒駡：都已經是成年人了，是不是有點過分了。爭吵就這樣開始了。。 如是者，直到那次她意外地懷孕了，這下才清清楚楚地看到這個男人是如此無能，如此狼心狗肺，做錯事，連承擔錯誤的勇氣都沒有，卻一味地要女孩子守秘密，想辦法打胎，女孩子只是一個22嵗剛畢業出來的無知少女，面對懷孕，身體上的各種變化已經是措手不及，還要幫忙隱瞞身邊家人好友，這樣的壓力，試問，哪裏能面對得了？然而他，卻讓她一人承擔了。。。 當天，她來到：母親的抉擇，帶著複雜的心情，承受旁人鄙視的眼光，强忍著内心的糾結和痛苦，一個人面對了，醫生問；爲什麽他沒來？心裏多想說，他死了。可最後還是幫他找藉口；因爲新公司太忙了，不好意思請假。醫生不耐煩地搖了搖頭，長嘆了一聲。。。 經過上午的落藥和一輪不斷地出血，等待子宮差不多擴展到適當的時候，護士下午就過來安排推進手術室。整個過程是禁止飲食的，中途出現發高燒，嘔吐幾次，都屬於正常反應，心裏的不安和難過，相信衹有她心裏明白，從來都沒進過手術室，沒想到第一次竟然會是這個原因—墮胎。合上眼前最後看到的是麻師下麻藥，然後就暈過去了，過程中沒有太大的疼痛，因爲都是全身麻醉的，但一醒來就像發了瘋一樣地尖叫，痛苦，因爲，我親手，殺了一條生命，那刻，我的心跟隨它也一并死去了。。。
－－－－－－－－－－－－－－－－－－－－－－－－－－－－－－－－－－－－
個日我無意係JC屋企睇到佢篇日記，睇完之後，我為佢感到傷心，
為一個曾經選擇愛情而受傷害既佢喊左好耐，
命運，你點解將所有既厄運都比晒佢，咁樣公平咩？
This is what makes us girls
We don’t stick together ’cause we put love first.
Don't cry about him, don't cry about him.
--------------------------------------------------
4 月，5月 時間一日一日咁過，
大部分時間，我都係蘭桂芳中度過，
朝早訓覺，夜晚Party party
時鐘上既時針滴答滴答咁唔知行左幾多個圈，太陽升起又落下，
慢慢我習慣左呢種靡爛既生活，對於我黎講，可以話係靡爛到回復平淡，
好盲目。
間唔中，A生會約下我，佢成為左我生活既調劑，令我個世界有番D色彩。
因為佢既約會，我會專登去買下新衫新鞋，打扮一下，
如果唔係佢既約會，我著咩都有乜所謂，
佢慢慢變得重要，等佢WhatsApp已經成為我既習慣。
呢段時間我同A先生KEEP住見面，
每一次都例牌會去IFC睇戲，我依家知道睇戲係佢最鐘要既興趣。
佢真係好鐘意睇戲，除左同我睇，原來佢冇約我既夜晚，每晚自己都會去睇一次戲。
A生話，現實好醜陋，只有係戲入面，佢先會睇到世界美好既一面。
我覺得佢講野好撚深奧、好玄，聽完之後我都係唔明佢講乜鳩。
有一日我地照舊去IFC睇戲，
睇完戲之後，佢冇同我去佢講企，佢叫我帶佢去我住既屋村，
我有D震驚，點解無啦啦要去我住既屋村呢？
屋村地方，邊岩佢去架咩？
最後我都係帶左佢去我住個屋村，我同佢講，
我中學係邊、小學係邊，同佢講我既成長故事。
「你小學𠴱陣係點架？」我地企左係我小學門口嘅羽毛球場上面，望住依間小學，
真係百般滋味在心頭，小學嘅回憶對我黎講不堪回首。
「小學𠴱陣，我出過貓，跟住比啊媽打到飛起。」
──────────────────────────
「點解今次考得咁差？」啊媽一路拎住枝雞毛掃，一下一下咁打落我到。
「我下次唔敢喇，下次會考好D，唔好打我啦。」我喊住咁求佢停手。
佢冇停落黎，佢打得更加大力。 每次我一成績唔好，佢就會打我。
兩個細佬，就企定定係格離到食花生。
「下次，下次，次次都話下次考得好。成績咁差，正一蠢過隻豬。」佢力竭聲嘶咁同
我講。
佢唔知道當佢每次話我蠢，話我冇腦嘅時候，我係有幾咁難受。我成績差，代表我蠢。
之後我好驚考得差，有一次，
我將幾個英文字寫左落條裙到，默書𠴱陣，我偷睇。
小學生嘅我諗法係好天真，以為咁樣唔會比人知道。
點知，比英文老師發現左。
「我溫書𠴱陣寫落條裙到，我唔係有心偷睇架。」我講大話，去掩飾自己作弊嘅事
實。
「李同學，我睇到你出貓仲唔肯認錯，你知唔知道誠信比起成績更加重要？一個人冇
左誠信，就唔會有人再相信你講嘅野。無論你出貓得黎嘅成績幾好都冇用。
見你初犯第一次，我唔會記你缺點。但係為左要比一個教訓你，我要通知
你家長。」英文老師同我講完之後，我喊得好犀利，因為我好驚又要受體罰。
之後我都冇再出過貓，亦都冇再比任何測驗我啊媽簽，我學識左一樣野，就係冒簽。
冒簽令我避過好多次捱打，但係因為咁，我之後都冇再認真溫過書。
─────────────────────────────────
「咁曳嘅你，小學就識得出貓。」A生話我。
我心諗，我都唔想，如果唔係考得考會比人屌到飛起，我先唔會出貓。
之後我同A生講下屋村入面嘅文化，同周不時會撞到幾個痴線佬，
拎住個汽水罐周圍行黎行去，有時佢地會跟住我，搞到我鬼死咁驚。
A先生聽得好入神，對於我既往事佢覺得好搞笑，
睇黎佢對MK會做既野又好有興趣。
我自己就覺得好無聊，好普通，MK有D咩咁特別，通街都係啦，根本就冇乜特別。
我同佢講我中學個時，
讀書又唔叻，中學既時間上堂唔係訓覺就吹下水，
仲有試過有一次去網吧打機比訓導捉，搞到要爬窗走。
A先生聽完係咁笑，我個中學時代可以話係過得不知所謂，一塌糊塗，
佢問我咁中學到底學左D咩呢？
我有D唔好意思咁同佢講──我都唔知，哈哈哈哈哈⋯⋯⋯⋯⋯
個一晚我做完導遊之後，
A先生送左我到屋企樓下，我同佢講Bye Bye，講完我就返左屋企。
返到屋企之後，收到佢既WHATSAPP，
「L，我想你陪我去巴黎。」 A
「下，認真？陪你去巴黎做乜？」L
「嗯，認真，我要出TRIP，需要一個女伴。」A
A突然之間約我去巴黎，
佢話，之前借比我個五萬蚊就當係陪佢去巴黎既FEE。
個晚，我訓唔著，巴黎，一個離我好遠好遠既地方，
我聽話巴黎唔知幾千百萬次，巴黎，係一個好浪漫既地方，
巴黎係法國入面，巴黎有鐵塔，巴黎有法國女人，巴黎夜景，
個一晚，我個腦入面，全部都係巴黎。
我即將會同A先生去巴黎。
A先生係我生活既調劑品係冇錯既，
佢令到我平淡又無聊既生活帶黎希望。
────────────────────────────
未出發先興奮，
唔知對上一次我咁開心咁期待係幾時呢？我唔記得左。
「2016年6月25日
今晚我同A先生就會出發去巴黎，
我咁大個女都未搭過長途機，最遠個次都剩係畢業旅行去過台灣，
個陣仲要係死慳死抵先去到，依家我竟然要去巴黎啊，
今晚一訓醒就到巴黎，好興奮啊！」
我係到寫日記。
寫完之後我抬起頭問A生，
「要幾多鐘先到？」
「13個鐘」A生好快就答到我，
夜晚10點半，班機係11點25分。
我同A生已經坐左係Boarding Gate 既排排椅到，等緊召集。
我諗其他人望住我地，應該會以為係一個爸爸帶住個女去旅行。
終於都最後召集，我同A生企起身，行去排隊準備登機。
我地冇拎D咩，因為已經Check in 左行李， HAND CARRY剩係帶左一個手袋。
上到機之後，我第一件事就係同A生講，
「我想要坐窗邊位。」我好鍾意坐窗邊位，
因為我想睇住飛機起飛同降落既時候，可以望住自己穿過雲層，
然後再由好高好高既地方俯瞰落去，望晒成個城市一幢一幢好細好細既建築物。
A生比我行入去先。
我第一次搭長途機，不過我知坐咁多個鐘，一定會有飛機餐食。
飛機起飛之後，再過多無幾耐靚女空姐就開始派餐，
由於係坐法航，空姐多數都係法國人。
佢地逐排逐排講「PLEASE FASTEN YOUR SEATBELT」
我拉開左前面擺餐個膠板，接過個飛機餐，
有舊三角形既芝士，我見A生食得津津有味，
得拆開個包裝紙，搽左D落個面包到，
點知一食就知道自己中伏，好鬼難食，成陣豬屎味咁。
「嘩，咁難食既，點解你都鐘意食？」我即刻吐返出黎，問A生。
A生話我唔識野，佢話咩法國係芝士大國，D芝士分分鐘好過意大利。
我理得佢好唔好得過意大利，總之個陣味同豬屎真係冇分別。
過左陣空姐開始派野飲，問我飲咩，
我見到格黎有一對法國夫婦係到飲紅酒，
我跟住都叫左紅酒，空姐比左一枝完整既細枝裝紅酒比我。
成500 ML，係超市有得買個種SIZE，
食完豬屎味既芝士，我拿拿聲即刻擰開左個紅酒蓋，
大啖大啖咁飲紅酒平衡返，點知未飲晒一枝就酒精已經上腦，
A生話我塊臉紅晒，之後我暈左。 （訓著左）
一訓就訓到下次派餐，今次我死都唔會再食芝士。
A生係到睇電影，我諗我訓幾耐，佢就睇足佢耐電影，
佢條友都真係幾專注一樣野，
鍾意一樣野，重覆做幾多百萬次都唔會厭。
我拎起電話想聽歌，點知電話冇電⋯⋯所以我就用A生部電話聽歌
佢聽黎聽去都係CAT POWER既歌，就冇其他歌手既音樂，
睇黎佢真係一個幾專一既人，聽黎聽去都係同一個歌手既歌，
唔悶架咩？咁我唯有聽下We’ve lived in bars, and danced on the tables。
搭咁多鐘飛機，DRY到爆，皮膚D水都就黎被抽乾晒，我想敷面膜。
係我話想敷面膜既時候，A生制止左我，
「邊有人係飛機上敷面膜架，你咁咪搞到成架機有陣味囉，
如果全機人都敷仲得了既？！」佢發脾氣，好明顯係鬧緊我。
所以我打消左敷面膜既念頭，繼續訓。
慢慢，我聽到機長講野，應該佢係話仲有30分鐘就到達目的地，
仲有講下巴黎當地時間、氣溫、天氣等等，
13個鐘訓下又醒下，終於都到左巴黎。
飛機降落個下，其他乘客拍手掌，我覺得好有趣，哈哈
就係咁，我搭左人生第一次既長途機。
---------------------------------------------------------------