[前傳]是咁的，我嘅職業係幫想自殺嘅人寫遺書: 116.比卡超
翻到屋企，打開大門，空無一人嘅單位冷冷清清咁迎接我，連招呼都唔想同我打。
算，都慣咗。
我諗住將個火機放去床頭邊嘅一個有蓋小盒，打開之後，我呆一呆。
永遠記住我一扭就中你想要嗰隻！
百變怪版嘅on9比卡照，靜靜喺盒中等住我。
我拎佢出嚟，上鏈，睇住佢喺枱上面兀吓兀吓咁行，終於忍唔住喊咗出嚟。
用盡我嘅全力，為一段已經逝去嘅愛情喊，有咁大聲喊咁大聲，有幾多眼淚就流幾多眼淚。
窗外隨風飛揚嘅紙碎，飄入我枱面，喺喊到無力嘅我面前徐徐落下。
我伏喺枱面靜靜入睡，將自己嘅情感一點一滴清空。