[前傳]是咁的，我嘅職業係幫想自殺嘅人寫遺書: 88.咁你阿媽點？

「我都覺得奇怪架喇，有咩理由死左個女都仲咁冷靜丫。」

「大半年之前嗰單家暴我有跟過，個女仔咪就係依個咯。」

你死咗，咁你阿媽點？

我假設咗bobo嘅家人會關心佢，唔想佢死。

但事實又係點？點解我地總係以為家庭、朋友、愛情係美好？





如果家庭之中只有暴力、朋友之間只有出賣、愛人之間只有背叛⋯⋯

我仲叫想自殺嘅bobo去顧及一個施暴者嘅感受，同親手將佢推近懸崖有咩分別？

重要嘅唔係有無家人，家人只係一個名，如果當中無愛嘅存在，永遠無可能成為避風港。

可能因為我父母已經唔喺度，但佢地喺度嘅時候，我實在太幸福，所以先會假設其他人嘅家庭都係咁幸福。

但無愛存在嘅屋企，「爸爸」、「媽媽」只係無實嘅虛名。





我幻想bobo翻到屋企，因為失戀而喊嘅時候，得到嘅唔係一個擁抱，而係一陣謾罵同毒打。

炸彈嘅引信，被我對bobo嘅無知所點燃，最後將第一個客人炸到粉身碎骨。