紙言

[前傳]是咁的，我嘅職業係幫想自殺嘅人寫遺書: 29.豉油





部電話最後都係開唔到，於是文傑借bobo部電話打畀屋企人。

「喂？無豉油呀，吓？買老抽？痴線打邊爐用老抽點牛肉？鹹死你呀。」

bobo忍唔住笑咗出嚟。其實距離佢上一次笑，已經係半年前嘅事。

空氣之間，好似有少少唔再一樣嘅味道。猶如灰色房間嘅角落，出現一粒彩虹糖咁。

回神嘅時候，bobo已經拎出購物籃入面最後一支豉油，遞畀文傑。