其實，我只係一個普通MK妹: 好奇害死貓(2)

唔係講笑，如果有一種自殺唔使痛嘅方法，我真係死左好撚耐

無任何大事令我傷心欲絕，應該咁講

呢個世界上，無嘢可以牽動我嘅情緒

有無人明白呢種感覺? 好似個世界唔關你事，你又唔關個世界事咁

政治? 都係咁架啦，邊個做都係咁架啦。





愛情? 男人係咁架啦，做人係咁架啦。

親情? 人係咁架啦，都係會死架啦。

人地係只知感覺失了蹤，我係從來都無感覺呀你老未! 

夾硬要搵樣嘢嚟怪的話，我諗我會怪我老母

係咁架啦，死廢青，有飯你食有書你讀仲要心靈安慰，玻璃心到丫





要講慘嘅，其實真係唔到我

我同班幾乎半數單親，老豆爭落一街街數走左佬又有，老母派帽派到番屋企搞嘅又有，由細到大都未見過老豆老母嘅都有，我輸晒啦!

世界上真係存在有令人唔失望嘅關係? 我唔信，因為我未見過

我算係好好，老豆係仆街，但係佢總會定時定候出現，一般大時大節都會同我地扮晒幸福小家庭，我老母又會post晒D家庭相上facebook呃下like，打一兩句【爸爸幾忙都會陪梓童玩---覺得幸福】

唉! 我想嘔呀.jpg





無人會知，事實上條仆街成日玩失蹤

細過時，每逄知道老豆會番屋企，老母就會一早起身化妝整頭，又幫我扮靚靚，提我見到daddy要話好掛住佢，問佢多D番嚟得唔得

然後我地就好似妃子等皇帝寵幸咁，係度等，一直等

十次有六次佢會話臨時有事唔得閒

我老母宣佈左佢唔嚟，就會開始鬼上身

瘋狂咁扯我頭上嘅辮仔，得登拎洗碗液落妝，然後入房喊

初頭幾次我都會因為嚇親而一齊喊，我一喊佢就會出嚟打我［喊喊喊，就係咁你daddy先唔要你呀！]

媽咪，你到底話緊我定話緊自己





我老豆其實好愛我，記得小學時有次我發高燒，佢即刻番嚟睇我，坐係我床邊成晚，不停換毛巾，餵我飲水

［BB你快D好番好唔好？爸B好心痛。]佢滴左滴眼淚落我細細手臂，嗰刻我知佢係真心嘅。

無幾耐我病好，佢又再失蹤。

換嚟我媽咪坐係床邊，佢一邊摸我額頭一邊講［不如你病多D，病多D爸爸就會番嚟架。］嗰一刻我都知佢係真心嘅。

好彩佢無咁變態特登整病我，但係嗰種心寒，你明未？

我從來只係一個女人用嚟綁個男人嘅工具。

仲要係失敗嗰隻。