黃鼠狼特務II 赤地(搬家原故,本站停止更新): 章八:籠中鳥

    一張洪又達死亡的照片被放在檯面,一只粗糙的手撿起,西裝男過目後,點燃打火機燒掉.
​「我依足指示,搞掂左目標.」黑曜說.
​「有冇咩特別事咁.」
​「.....」黑曜想了想,隱瞞遇上顏影寒的事:​「冇.」
​「走甩左嗰個你唔需要理,有其他人跟手.」
​「明白.」
     與此同時,凌晨四點的街道上,落著微微雨點.戴著斗篷帽和口罩的洪再明插著褲袋,兩步併一步的走,瞻前顧後確保沒有埋伏後,掏出事先換上太空咭的手機.
「喂....我book左四點十五分船.....到左未....好....」他速速收起手機.
     向碼頭的必經路段,剛巧遇著洗街工人在洗地,洪再明避開濕滑的路段,繞旁邊路走.
   一個撐著傘的人從前面路口走出來,洪再明打了個激靈,腳步開始放慢.那人與他擦肩而過,甚麼事情也沒有發生.




    洪再明鬆一口氣,繼續往前走.是我太多疑了,根本沒有人要殺我,哈哈~

    ''滴——————''鞋子忽然出現鮮紅血點.

    "滴———滴———''
    
      整個人在顫抖.

  ''滴—滴滴———滴滴滴滴滴滴滴滴————————''





     洪再明摸摸自己的頸項,暖暖的液體沾滿手掌,低頭一看,鮮紅色的.......
「Shit.」倒地,再也不醒.

    幾個洗街工人提著用具走至,包裹屍體,搬走,清理現場.這裡回復半小時之前的樣子,沒有人殺人,也沒有人被殺.

----------------------------------------------------------------------------------------------------------------------------------------------------
  Woodpecker據點的一家網吧

    顏影寒和齊家尚挨在牆邊,一言不發.
「熱死.」齊家尚擰開支裝水樽的蓋,一口氣倒入口裡.顏影寒左手伸向:​「我都要D.」




​「嗯.」
    顏影寒接下水樽,剩下的水量只夠濕一濕口.
​「嗰個,係你識嘅?」
​「佢叫黑曜.」
​「我知道同唔同求爺合作係鳥嘴人話事,但係當下我只係想件事快D結束.....對唔住.」
​「洪又達嘅死係整定嘅,冇人阻止到.」顏影寒撐起身子,坐上電腦椅:​「我擔心嘅係,洪又達死左,原先嘅計劃會落空.」
​    ''砰窿————''門被撞開的聲音刺激到顏影寒和齊家尚同時注意同一方向.MK仔氣吁吁地趕至兩人眼前,手上持著的急救箱還在搖擺.

​「睇下新聞!!」


                                          -------------------黃鼠狼特務II 赤地------------------------

                                        -----------------------章八:籠中鳥------------------------






「清晨五點十七分,警方接報喺奮銳黨辦公室門外發現一具屍體,屍體嘅身份證實係奮銳黨召集人洪又達.而死者嘅細佬,洪再明下落不明.」記者報導的同時,攝影機正對著一群受驚的奮銳黨成員,有的向警察錄口供,有的在坑渠邊嘔吐.在警車旁邊,數十個咪高鋒爭先恐後,幾乎要貼上警長的嘴唇.警長忍住心中滿滿的髒話,開始向記者交代:「警方初步懷疑洪再明為向其兄長報復,有計劃地逃獄,然後謀殺事主.警方已經向洪再明發出通緝令.」

「荒謬!」
     一記拳頭擊穿那張囂張的臭臉,壞掉的螢幕冒出煙來,顏影寒收起青筋湧現的拳頭:「殺完人仲要咁張揚,得紅槍客先做得出.」
「扭曲事實係佢地最耍家嘅,無謂激氣.」齊家尚頭轉向MK仔:「發生D咁嘅事,鳥嘴人呢?佢一D反應都冇究竟想點?」
​「我會幫你轉達.」
「我受夠喇....每次都要經過你,我今次要自己搵佢.」齊家尚走到一台電腦前,點擊Tor瀏覽器,輸入''http://sonetwm7543249607.onion/''
「自己搵佢?」顏影寒看著螢幕顯示名為''MOONNET''的暗網論壇網站.
「冇乜事嘅話....我走先?」
「唔該哂你.」顏影寒目送MK仔離開,然後走到齊家尚旁邊.
「對黑客嚟講,網絡世界先係真實.現實世界只係幻想.」
「你想?」
「我要揭開鳥嘴人嘅面具下究竟係乜人.」輸入帳戶密碼後,齊家尚按下登入鍵.





      無數的0和1從身邊飛揚,逐步構成光怪陸離,色彩繽紛的電子世界.

    來自世界各地的奇人異士雲集,然而在這個彼此也看不見面目的地方,人人彷似置身化妝舞會,以各式各樣的姿態示人.流亡犯,武裝分子,殺手,黑客,毒販,還有走私客,人販子,嫖客,五毛等等都可能出現在論壇上.
「幫襯本公司有八折優惠喎~」說話的八爪魚每只觸手也持著不同武器,可齊家尚一點興趣也沒有,直接把牠推開.
   
     在現實世界的顏影寒只看見冷冰冰的留言板,搞不清齊家尚在幹甚麼.
​「身份可以係假嘅,任何人都可以係鳥嘴人.」齊家尚推開無關的資訊,從人群中穿插:「佢唔俾組織成員知道自己嘅真實身份,一定係隱瞞緊D乜.」
「你意思係鳥嘴人唔信得過?」
「你信佢?信佢會睇漏眼唔知道洪又達會俾人殺?」齊家尚見只有他們兩個,才敢說出自己的假設:「假如.....鳥嘴人係政府嘅傀儡?」
「冇可能.」顏影寒邊搖頭邊退後:「你諗太多喇.咁對佢地有咩好處?」
「我唔得閒同你嘈住.」齊家尚不想與他在這些話題上糾纏.顏影寒靜靜挨在一邊,就看他搞甚麼東西!

     齊家尚停下腳步,朝迷霧中的黑影子望去:「搵到喇......鳥嘴人.」,他嘗試穿過迷霧,不出所料,任何靠近的人也會遭無形的牆彈開:「國家級防火牆.....」
「需要幫忙嘛?」從齊家尚身後走來一個不速之客.
「你係邊個?」




「馮佩妮.」

。。。。。。。。。。。。。。。。。。。。。。。。。。。。。。。。。。。。。。。。。。。。。
    兩星期前 格里諾克小縝 

  ''咚咚咚''門外有人敲門.
「Cindy返嚟喇~」Michael放下報紙,高興的前往迎接,怎料一開門,持刀的手臂高舉——————————血花噴在牆上,刀尖穿透脊椎骨而出.目睹丈夫死亡的Anna逃向後門,可是門緊緊鎖住.她絕望地趴在門前,黑影由腳覆蓋到胸口,把Anna整個人擋住.刀舉起,然後————————
   
     時間來到現在.
   大霧彌漫四周,張穎琳和勇仔對著一片空地,原本的房子消失得無影無蹤.
「我地冇嚟錯地方嘛?」張穎琳望向灰䑃䑃的天空,靠河邊的馬路沒有甚麼車駛過,行人路連人影也不見幾隻.
​「冇嚟錯.....係呢度....」勇仔認得周圍的格局,肯定就是這裡.
      張穎琳親身踏進這片空地,鞋底卡了一些瓦礫,她撿起看看:​「係拆卸嘅痕跡.」
「附近一帶嘅閉路電視俾人做過手腳.....」勇仔轉身面向鄰近那間屋:「唯有就問人.」
     兩人跑到鄰居家敲門,主人探頭出來,是個白髪老翁.




​「MI6.」勇仔向老翁展示軍情六處官員證件.老翁由上而下打量他們,目光充滿訝異.
「I am busy.」門秒速關上,吃閉門羹的兩人無奈地嘆氣.

      克萊德河被霧籠罩著,河的另一邊若隱若現,猶如海市蜃樓.張穎琳挨在長椅上,實在想不到再有甚麼可以做:「毀屍滅跡,掩飾真相,果然係紅槍客嘅作風......」
「一定有乜嘢蛛絲馬跡,我唔信佢地辨事咁完美.」勇仔雙手叉腰,挺起胸膛:​「我地一定會搵到BB囡,救佢出嚟.」,話剛剛說完,引擎的聲音從路的一邊傳來,是每週來一次的垃圾車.
​「垃圾車.....」張穎琳從木椅起來,眼睛跟著垃圾車停下,清潔人員把一個一個的綠色桶子推到車後,由車子自動進行倒垃圾的程序.
​「出事當日,都係星期二.....」勇仔的嘴角微微揚起:「行車記錄儀!」

------------------------------------------------------------------------------------------------------------------------------------------------------
「你係馮佩妮?」齊家尚沒有料到她的出現,顏影寒聽到後從電腦椅彈起來:「馮佩妮?問下佢喺邊度?」
「我喺一個比你更安全嘅地方.」馮佩妮正身處於中央圖書館的語言學習室:「你喺Woodpecker嘅地方調查Woodpecker,實在太機智喇.」
「你點知我喺邊....」這句不夠兩秒,對方便傳送出從電腦攝像頭拍攝的相片檔,清晰可見齊家尚在鏡頭前的樣子.顏影寒露齒而笑:「冇錯,係馮佩妮.」
「你有咩大計咁話呢?」齊家尚顯然對馮佩妮有點不爽.
「世界上冇一個系統係安全嘅.」馮佩妮伸手道:「作為黑客,除左電腦技術之外,社會工程學都係重要嘅一環,最大嘅安全漏洞,係人.」,齊家尚開始明白她的意思,退後小步做出恭讓的姿勢.
「鳥嘴人最有興趣嘅,莫過於情報.」馮佩妮在論壇上傳一則文章,內容是出售中國空軍的數千份文件,然後放開滑鼠,耐心等候獵物上吊.

     過了二十分鐘,鳥嘴人主動聯絡馮佩妮.
   ''Detail.''
   
   ''1700 documents,13.62BTC.''

    ''Deal.''

「最後一步.....」馮佩妮傳送一份附木馬程式的檔案給鳥嘴人,祇要等待檔案被打開....

      陷阱夾中獵物,IP位址無所遁形——————————
「見到喇.」馮佩妮把地址交到齊家尚手上,齊家尚馬上拿齊裝備出發.

     準備關上網頁的馮佩妮忽然收到鳥嘴人的信息,她頓了一下,點擊對話框.

''你騙不過我.''

「你究竟係邊個.....」迷霧中的黑影慢慢走近,猛風吹去迷霧,馮佩妮終於見到鳥嘴人的真面目,是——————————
   
-----------------------------------------------------------------------------------------------------------------------------------------------------
    根據IP位址,齊家尚找到了一個戰時殘留下的防空洞,打開電筒照照,前面是轉彎的落斜.
  甚麼都沒有.
「竟然俾你搵到嚟呢度.」鳥嘴人的聲音從牆角的揚聲器傳出.齊家尚敲打牆壁,是實心的,沒有暗門.
「你地好似對我有D誤會咁.」
「我冇辦法相信一個我未見過嘅人.」
「你覺得我由得洪又達俾人隊㝝,又乜都唔做,係嘛?」此時聲音從另一邊傳出,戴著鳥嘴面具的人從黑暗中走出.齊家尚掏出弓,隨時預備戰鬥:「你嘅真實身份到底係邊個??」
      鳥嘴人把手伸到面具上:「你想知我嘅身份.....好....」,他慢慢移開面具,面具下的是個二十歲左右的青年.見到此景的齊家尚慢慢鬆開手.
「我從來唔會向任何人洩露我嘅身份,你係例外.」青年深吸一口氣,拿出一個老舊的皮錶:「隻錶係嫲嫲留俾我嘅遺物,佢為左守住家園,俾黑社會鑑生打死....」青年邊說邊流淚,卸下心防的齊家尚靜靜看著他哭.
「我唔應該懷疑你.....」
「我都要守住家園直至死為止,呢個就係Woodpecker嘅意義!」青年抹乾眼淚道:「洪又達嘅死我都有責任....我唔會怪你.」,站在後方的顏影寒和齊家尚相視而笑,沒必要懷疑鳥嘴人了.

「係.....你.....」馮佩妮看清楚鳥嘴人的真面目後,眼裡盡是恨意——————————穿過迷霧出現的,是西裝男.
「你果然夠命硬,打極都唔死~哈哈哈哈~」西裝男的笑相猙獰:「正式介紹下,我外號叫騰蛇~」
「悅萌喺邊.....悅萌喺邊啊呀!!!」
「嗰位小朋友~係偉大計劃嘅一部分,你應該為佢自豪至啱~」
「齊家尚會搵到你....你邊度都避唔到!」
「你真係咁認為?」西裝男笑得更燦爛:「嗰個IP位址係假㗎~嘻嘻嘻!」
「我發誓會搵到你出嚟.......斬開十椂八椂餵鯊魚......」馮佩妮拔掉電源,按捺激動的情緒,冷靜地駭入圖書館閉路電視系統,陸續有殺手進入圖書館正門———————

----------------------------------------------------------------------------------------------------------------------------------------------------
「計劃要提早開始.」青年嚴肅的跟顏影寒和齊家尚道:「我以為洪又達嘅死會對奮銳黨造成好大打擊,點知答案係相反.」
「我地要點做?」顏影寒問.
「我地要令政府後悔佢地所做嘅一切————————」

      才剛由語言學習室走出來,馮佩妮便吃一記拳,殺手右勾拳再襲,馮佩妮前半身傾前把他撞至櫃檯處,拖住他掃光檯上的電腦和文件再抬起他整個身軀,使勁丟落地上.
   馮佩妮跨過櫃檯,步到倒地的殺手前,蹲下,扭斷頸椎.職員以呆滯的目光面向馮佩妮,不敢吞嚥口水.
「冇事喇.」馮佩妮指指詢問中途被嚇倒的大嬸:「有人問你地嘢丫.」,職員偷偷伸手到電話撥通999:「救...救命呀......」

     從護欄觀察圖書館大樓的殺手分佈,升降機有三個,電梯有四個,雕像旁邊一個.由升降機或電梯逃亡是愚蠢的選擇.有了!走火通道!她無視''非緊急時請勿使用''的告示,直接從走火通道跑下去.
​「啊呀呀!!」右小腿被射中的她失足滾下樓梯,頭部受到衝擊引致耳鳴.她帶著嗡嗡聲重新爬起來,槍口從轉角位探出頭來,馮佩妮等殺手完全露出來後由上而下撲向,殺手未及反應過來就被重擊至牆上,未昏倒的同時還能反擊,馮佩妮扯起他的衣領拳揍腹部,卻被對方抱住向前衝,兩人一同滾下樓梯.
    先爬起來的殺手被馮佩妮跘倒,再次落地.

「好痛......」馮佩妮一起身,發現身體多處瘀傷了.拾起槍枝,彈匣空空的.

​「砰——砰砰砰——砰——」下層又來兩個連發幾槍,馮佩妮及時躺在梯級上躲避,計算好角度後擲出手槍,擊昏了一個.乘勢跨過扶欄,撞向另一個殺手帶落地上,對方把她甩到一邊,瞄準後才發現沒有子彈,他氣憤得丟棄手槍.兩人慢慢爬起來,架起拳頭,眼神同樣充滿殺意.對方凌空耍幾招套路,以為這樣便能嚇怕馮佩妮.
    想得美!馮佩妮前臂格下他的拳,第二拳揮來時雙手遊到對方後肩抓住,身體往外傾把他摔到下層,頭顱落地,掛掉.
​  揭起褲腳一看,小腿血流如注.她撕破殺手的短褲用作包紥,繼續上路.突然一顆催淚彈丟到馮佩妮腳邊,馮佩妮在爆開的一瞬間掩住鼻子跑回大樓.眼睛一陣刺痛,幸好及時離開,否則必定死在催淚氣體下.

   看看指示牌,這層是三樓.陸續有殺手上到來,她放慢腳步步到書架前,混入普通市民之中,隨手挑本書裝作閱讀.
    殺手穿過書架之間,雙目不放過任何一個細節.側封板的寬度剛好把馮佩妮的身軀隱藏,卻藏不往影子.注意到的殺手停下腳步,低調地掏出腰間的槍,無聲無色地裝上滅聲器,一步一步迫近.馮佩妮握緊手上那本厚重的硬皮書,閉起眼睛,由耳朵主導身體..........

     鞋跟先貼上地墊,到中底,到大底,這是一步.循環數下去,第二步....
  
   第三步.......

   第四步.
   
   馮佩妮捉住這剎那,用硬皮書揮擊殺手的頭顱,右腳掃向對方小腿跘倒,倒地的殺手馬上朝她腹部開槍——————微小的槍聲,連按鍵盤的聲音也蓋不住.

   回到戰鬥,馮佩妮摸摸中彈位,防彈衣凹陷成一個洞,雖則未崁入皮肉,可是劇痛依然.
     殺手趁這個空檔撲向馮佩妮,反被她推到側封板,馮佩妮膝撃擊走槍枝,掐住其脖子,姆指使勁朝喉嚨崁.叫不出聲的殺手拼命拉開距離,馮佩妮再使盡力氣——————骨骼碎裂的一聲,殺手再掙扎不了.馮佩妮把貼住側封板的屍體移到四方椅上,把書放到他大腿上,活像看書中途沉睡的大學生.
     撿起槍枝看看,剩餘一發子彈.
「可唔可以借嚟駛下.」她指著電腦前的筆袋,女學生認出了她,把筆袋推到她面前.
「唔該哂.」
    女學生往後面瞥一眼.提醒馮佩妮背後有兩個瞪著她的殺手.
「幫我一個忙.」馮佩妮從筆袋取出一支藍色螢光筆和一支橙色螢光筆,輕聲在女學生耳邊說:「嗰兩個人有冇武器.藍色代表有,橙色代表冇.」
    女學生瞥一瞥,食指貼住藍色螢光筆.
「好.」馮佩妮選了一支最尖的鋼制鉛芯筆,弄走裡面的鉛芯,收到身上後重新藏在圖書堆中.

   透過書架的罅隙見到,兩個殺手也跟了進來,其中一個打手勢表示分開行動.一個留在這裡察看,另一個則在特大書籍區察看,順便守著電梯口.
     馮佩妮等候一個殺手走到書架的另一邊,現在雙方相隔一個書架.馮佩妮把槍枝伸進罅隙,正好對住其中一個的心臟.扣動板機後馮佩妮移步到另一邊處理屍體,出血處用外套掩住,放置到沙發椅.旁邊的男生好奇偷望,咦!這大叔挺帥的~
  另一個殺手遲遲未聽到任何聲音,目標被他殺死了嗎?

    從後的一擊,鉛芯筆尖由左耳洞直穿腦袋,放血,又解決一個.今次隨便找個東西睹住耳洞就好.

------------------------------------------------------------------------------------------------------------------------------------------------
  玩具圖書館,大樹伯伯前坐了一群幼稚園學生乖乖聽著職員姐姐講解遊戲的玩法.五個殺手闖進來,搜索馮佩妮的蹤影,阻勸他們的保安被一槍爆頭,嚇得小孩尖叫,全部湧到職員姐姐身旁.
「收聲!唔係就一槍打爆你!」這樣再嚇一嚇,小孩開始哭哭鬧鬧.其中一個殺手忍受不了哭聲,把小孩的頭顱逐槍爆掉:​「屌你老母!嘈嘈嘈!」,職員姐姐被噴到一身血,像啞巴一樣不能發聲.

    這一幕,看在馮佩妮眼內——————————

​   一支鋼制鉛芯筆刺中最近那個殺手的右眼,馮佩妮扯緊他的雙手,起腳撐住胸腔,身體向後傾把殺手弄到半空中,背脊落地後迅速起腿夾住他的頭顱和胸腔,動彈不得的殺手被猛力一扯廢了右手.​「砰砰砰————砰————」其他殺手慌張下亂射一通,馮佩妮左轉身子把殺手的背部翻到面向槍火,為馮佩妮擋住不少子彈.馮佩妮探手取走手槍,把屍體拋向一個殺手,東面一槍殺掉一個,翻滾到西面再殺掉一個.剩下一個殺手瞄準住馮佩妮的頭顱,得意地笑著.
   剛才這傢伙用四發子彈殺死四個小孩,那樣他的槍就剩下一顆子彈.
​「砰————」馮佩妮頭向外側避過子彈,抓住這傢伙的右拳再踢擊膝蓋,左肩撞向來記過肩摔.馮佩妮取回鉛芯筆,邊喘氣邊把他扯起,朝肺部猛刺———————死不斷氣的他接住筆尖,勁力扭向馮佩妮的肩部刺向.「呀呀呀!!!!」馮佩妮被迫後一步,殺手使出九牛二虎之力把她迫至護欄,筆尖刺得深,馮佩妮右批踭轟對方下顎,左膝擊攻其膝蓋.解脫後拔出肩上的鉛芯筆,直穿對方喉嚨,放血.

    藏在噴水池後的殺手窺見馮佩妮走出正門,毫不猶豫拔槍追擊.馮佩妮閃到圓柱避過槍林彈雨,誰料右邊天橋又來一個殺手持著衝鋒槍狂轟.躲藏的空間又縮少了.
''一人一邊.''
''好.''殺手之間用唇語溝通,很快地,馮佩妮便無處可逃——————從梯級走上來的區可頤幹掉左面一個,右面欲躲藏起來,可惜還敵不過子彈的速度.

​「你點搵到我?」受傷的馮佩妮要扶住牆才站得穩:​「我唔會跟你返去烏有國度.」
​「倉庫單嘢我都未同你計.」區可頤向她遞出援助之手:​「呢筆數要開始清一清.」
     警笛聲越來越響,馮佩妮情急之下跟區可頤走,她們偷了一部的士,逃離各種牛鬼蛇神.
​「鳥嘴人嘅身份就係騰蛇,Woodpecker係一場騙局!我地要想辦法話俾顏影寒佢地知.」
​「我地攞唔到任何證據佢地唔會信.」
​「即係點?眼白白睇住佢地俾Woodpecker利用?」

     側邊路口突然殺出一部貨櫃車,狠狠撞擊的士————————的士橫向重擊行人路旁,玻璃碎灑落一地,車身撞至變形.從貨櫃車上走下幾個蒙面人,把昏迷的馮佩妮和區可頤拉出的士扔到柏油路上.
  其中一個蒙面人脫下悶熱的頭套,是西裝男.
「上次喺格里諾克俾你走甩....今次妳唔死唔得~」西裝男拍拍馮佩妮的臉,另一只手接住手下扔來的霰彈槍,瞄準馮佩妮的腦袋——————————

​「bye bye~」

〖待續,有興趣者可以追稿.....〗