［短篇］香港都市傳說: 傳說一：不能觸碰的四不像（二十一）
「咦？呢度係……」阿強看著四周，發現自己身處一個陌生的空間。
「小人！偽君子！」一把陌生而刺耳的聲音，不知從哪裏傳進阿強的耳內。
「邊個？」阿強嚇了一跳，立即四處張望，卻看不到有任何人在這裏。
「小人！偽君子！！！你以為你俾晒啲錢人，以為扮晒做好事，就唔駛死咩！你一樣要死！」那刺耳的聲音又再響起。
「唔係！我無咁諗過，我只係想死之前做一啲想做嘅事！我無其他諗法！」阿強被那聲音弄得有點頭暈目眩，但仍堅定的回答。
「你無其他諗法？唔好扮嘢啦，你出世就俾老豆老母拋棄，之後俾人收養又俾佢地虐待！就算喺學校，喺出面做嘢，你都無朋友！你會唔憎呢個世界？我話你知你諗緊乜啦，你根本就唔想死，你仲想生存，生存之後仲想報復呢個世界！你就承認啦！」那刺耳的聲音毫不留情。
「我無朋友？我唔想死？我想報復呢個世界？唔係咁……唔係咁架……」阿強掩著耳朵，不想再聽到這些說話。
「你根本就係小人，偽君子！你連自己都呃埋！連想生存都講唔出口！！！！」刺耳的聲音穿透阿強的手掌，傳到他的耳內。
「唔係……唔係咁架……我，我有朋友！阿良，佢係我嘅好朋友，無論幾時佢都會幫我！無錯！我唔係你所講嘅小人，我唔係！！！」阿強大喊了出來，那陌生的環境開始轉變，他以為終於能從夢裏清醒過來。
但……四周的景色再一次變換，眼前出現的，正正是四不像。
兩頭四不像，此刻並不是在石壆上，而是站在他的眼前，和他距離不到一米。
阿強發現自己完全動不了，其中一頭四不像慢慢走向他，張開了口，慢慢的咬向他的頭部。
阿強知道自己逃不掉，便閉上眼睛，靜待死亡的來臨。
而在迎接死亡的瞬間，他再次聽到那刺耳的聲音：「你既然咁想死，我成全你！」
他感到頸部突然一陣劇痛，使他不由自主的睜開了雙眼。
「吁吁！吁吁！我……我無死？」阿強張開眼後，發現自己身處宿舍房內，根本沒有甚麼四不像。
然後他輕撫自己的頸部，沒有，連一道傷痕都沒有。
他這才想起，筆記簿裏提及過，那些遭詛咒的同學，在死前一晚都夢到類似的情況。
「即係……我聽日會死……」想到這裏，阿強反而有一點釋懷，可能，他為了終於能擺脫詛咒而感到輕鬆了吧。
然後，阿強再次進入夢鄉，這次，大慨是他整個人生裏，睡得最為舒服的一次吧。
阿強再次醒來時，已是第二天的下午三時了。
他悠閒的伸了伸懶腰，洗好澡後，便離開了宿舍，然後到了又一城一家意大利餐廳，享受了非常豐盛的一頓飯。
然後，他漫無目的四處逛著，從未如此輕鬆，從未如此悠閒。
諷刺的是，這種幸褔而又舒服的感覺，竟然只能在死亡前的數小時享受得到。
「估唔到，都就嚟要死啦，都唔知有咩好做……咦？唔係喎，阿良成日都無返過宿舍，唔係有咩事啩？打俾佢都好喎！」阿強一念及此，便打算拿出手機，才發現自己根本沒有帶著手機。
「吓？原來我無帶手機喺身，唔怪得成日都咁靜啦。依家……九點鐘，仲有三個鐘……好啦，話晒都識咗阿良咁耐，同佢講聲再見都好嘅。」阿強想到這裏，便馬上乘搭的士回宿舍。
打開宿舍門後，房內依然是空無一人，他的手機好好的放在桌子上。
「呀，仆街，無晒電！」拿起手機，才發現電源已經耗盡，只好先把它拿去充電，而阿強則襯空檔整理著書桌上的東西，大慨不想在死後留下一個不好的印象吧。
不消一會，電話的螢幕突然亮了起來，而畫面上顯示著，有無數的未接來電和訊息，全部都來自同一個人 － 阿良。
「喂，你喺邊呀？」
「見字即回！」
「衰仔你係邊呀？」 11:02
「快啲覆我啦，Daniel話搵到新方法救我地呀！」 16:41
「十二點前你一定要覆我呀，我唔想你死呀！」 19:04
「喂，搞掂啦，Daniel講咗個方法俾我知啦，你收到Message即刻去上次我同你燒嘢食個公園啦，我會準備定啲工具架啦！」 20:32
「你一定要嚟呀，Daniel話，過咗十二點就搞唔掂架啦！」 21:44
阿強快速看了那數十個的訊息，去到最後一個時，他不自覺的叫了出聲：「吓？唔撚係呀？依家幾點呀？十點半，仆街，呢度過去起碼要一個鐘！屌，唔理啦！」
阿強立即拿起電話跟充電器，便離開了宿舍，從宿舍到坐上的士，這期間他用了不到五分鐘。
「十點四十分……好在，應該趕得切！」阿強在的士上看了看手機，立刻放下心來。
就在乘車途中，由於他已經從剛剛那激動的情緒中冷靜下來，加上車程頗長，這使他有很多時間去思考。
他愈想愈覺得奇怪，便致電給阿良。
「謝天謝地啦，你終於覆我電話啦！點呀，你依家係咪趕緊嚟呀？」阿良逼切的問。
「哦，係呀，我搭緊的士過嚟。係啦，你話Daniel有新方法，點解咁突然嘅？同埋個方法究竟係咩呀？」阿強問。
「Er……無呀，其實Daniel佢今日搵過我地，話佢尋日翻睇啲資料之後，先發現當年有一個方法係未用過嘅，所以叫我地不妨一試。點知我地幾個試完之後真係有效，所以諗住即刻叫你嚟一齊解咒，不過一直搵你唔到。至於個方法都幾複雜，你嚟到我再幫你整啦！不過啲道具我已經全部準備好架啦，你一嚟到就可以進行儀式架啦！」阿良熱心地說。
「哦……係咩……咁好啦，你等我，我過多陣就到啦！好啦，拜拜。」
阿強切斷電話後，低頭沉默了好一會兒。
透過這通電話，他徹底明白了阿良的意圖。
由於所謂的「新方法」實在有太多疑點，阿強已猜到這根本是一個騙局。
但他依然選擇去找阿良，原因大慨有兩個，第一：他真的視阿良為他僅餘的知心好友，在情在理他也想跟他直接道別。第二：他曾經在Daniel家中說過，如果有人需要他的命，他願意拱手相讓，好拯救其中一人。
所以，他即使明白到，這是阿良的死亡邀請，他也願意繼續赴會。
與其被詛咒殺死，還不如獻出這條命，去拯救阿良一命，這也是他唯一能夠做的事了。
未幾，阿強下了的士，慢慢的步向燒烤場，終於，在十一時五十分，他和阿良碰面了。
「哇！阿良你搞咩呀？纏晒崩帶咁嘅？你唔係同人打交呀？」阿強關心的問。
「你嚟啦，太好啦！無呀，尋晚飲醉咗碌咗幾層樓梯，咪搞到咁囉！唔好講咁多啦，我帶你行啦，呢度過去都要幾分鐘架！」阿良熱心的拉著阿強。
「吓？個儀式唔係喺呢度進行咩？」阿強問。
「哦，原本係嘅，不過我怕有其他人睇到，陣間引咗啲唔知咩人過嚟，破壞咗個儀式就弊啦！所以啲嘢我放晒係草叢入面，你跟我去到就知架啦！」被阿強再次詢問，阿良明顯有些急了。
而阿強聽到後，不再問阿良有關儀式的事情，只是默默的跟在他後面。
「係喎，阿良呀，我原本諗住今日係我死忌嚟架，所以我睇返好多以前啲相，你記唔記得我地幾時識架？」阿強突然問。
「吓？咪中一同班果陣識囉，唔係咩？」阿良明顯有點不耐煩。
「唔係呀，原來我地中一果陣幾乎無傾過計，只係下學期考試之後，一齊俾訓導捉咗去鬧餐勁嘅，我地先開始識架！」阿強笑說。
「呀！係呀係呀！你唔講我都唔記得，果條友成日著橫間衫，個人又肥，成隻跳跳虎咁架嘛！」阿良記起了當時的情形，也不禁笑說。
「之後升中四果年，我地兩個都揀理科，點知我同你個分一模一樣，連操行都一模一樣！但理科咁啱得返最後一個位，果陣你仲話讓個位俾我，你知唔知我幾感動呀。」阿強笑說。
「係……係呀，我都記得，好在果陣有條友，唔知發咩神經話去外國讀書，理科多咗一個空缺，我地先可以繼續同班！」阿良的聲音變得有點悲傷。
「你知唔知呀，阿良，我真係好多謝你，你可以話係我呢世人入面！唯一嘅好朋友……」阿強衷心的說。
在聽到這句說話時，阿良突然停下了腳步。
「咦？到咗啦？呢度就係我嘅墓地啦？」阿強也停下步伐，對阿良說。
「你……一早已經知道？」阿良回過頭來，眼裏閃過一絲殺機。
「嗯，搭的士果陣估到嘅！」阿強並不否認。
「咁點解你仲要過嚟？」阿良手上，不知何時多了一個鐵鎚。
「我喺Daniel屋企已經講過，如果你地邊個想解咒嘅，我願意獻出我條命。依家可以幫到你，我諗呢個已經係最好嘅選擇。」阿強說的同時，打從心底裏笑了出來。
「阿強……」在聽到這番說話後，阿良反而猶豫了。
「唔好等啦，過咗十二點就真係唔知仲有無效架啦！你郁手啦，不過記住一次過，我唔想痛好多次！」阿強閉上了眼睛，等待著阿良出手。
「阿強！多謝你！我會好好珍惜你送俾我嘅呢條命！我應承你，有機會嘅話，我一定會拆咗四不像，唔俾佢再遺禍人間。」語畢，阿良手上的鐵鎚，狠狠的打向阿強的天靈蓋。
就在鐵鎚快要接觸到阿強時，阿強突然見到一個景像，四不像不知何時站在他的面前，並說：「時間到啦！」
「嘭！嘭！嘭！」硬物與硬物互相碰撞而產生的聲音，在這四野無人的樹叢裏迴蕩著。
「吁！吁！吁！應……應該死咗啦啩？」就在阿良喘息的同時，阿強的手機剛好掉在地上並碰到了開關，螢幕上顯示的，已是「00:01」。
而在這樹叢裏，某人正在用手機，把整個過程紀錄下來。
這個人，正是Keith。
到底，為甚麼Keith會在這裏出現？
而阿良，是否又已經成功解咒呢？