【練膽大法】我每日迫自己搵一位陌生人傾偈《陌樂偈》: 《陌樂偈》第37天－來自歐洲的滑雪高手
《陌樂偈》第37天－來自歐洲的滑雪高手
地鐵車廂內，一名啡色頭髮、啡色眼睛，
比我高一個頭的外籍男子，靠在車門旁邊站著。
機會來了～ 陌生人！
我鼓起勇氣！向前走過去！
然後......
對不起，你猜錯了。
這次我沒有猶豫。
對著「鬼佬」，總是特別容易開口。
「Excuse me, may I chat with you?」
（唔好意思，請問我可唔可以同你傾下偈？）
「Sorry?」
「May I talk with you?」
（請問我可唔可以同你講下嘢？）
「Yes~ Sure! （當然可以！）」
多麼動聽的「Sure」啊！
難怪我完全不害怕搵「鬼佬」傾偈。
（以下對話，由英文翻譯成廣東話）
「你住喺香港？」我問。
「係。」
「住咗喺度幾耐？」
「差唔多10個月。」
「你嚟自邊度？」
「Sxxxxx」他說了一個S音開頭的英文字。
他的發音有點特別，我聽不清楚 。
（其實是自己英文差吧……）
「Sorry?」
「Sxxxxx，一個歐洲嘅國家。」
他解釋完後，我只聽得懂那是一個歐洲的國家。
為免尷尬，我決定先假裝明白。
「Oh~ I see~（哦～我知喇～）」
我後來用另一個方法，知道了他從哪裡來。
各位讀者，先猜一下他來自哪個國家吧。
「你係香港人？」他問。
「係。」
「Nice to Meet you~」
「Nice to Meet you too~」
「What’s your name?」（你叫咩名？）
我呆了。
根據我自己訂立的《陌樂偈規條》第3條－
「不問對方名字，不交換聯絡方法」
（詳情請閱第12天）
出於禮貌，我還是說了自己的英文名。
正常情況下，我應該反問對方的名字，
但當時固執的我，沒有這樣做。
回想起來，自己真的有點「陌樂偈潔癖」了。
反正不會再見，交換個名字，有甚麼大不了呢？
沒有反問對方名字，反而令自己變得沒禮貌了。
大家傾陌樂偈時，千萬不要學我這樣啊！
我馬上問：「你喺度做嘢？定旅遊？」
「我本來拎旅遊Visa，去過日本、韓國、新加坡，嚟到香港搵到工，就拎咗工作簽證，留喺度做嘢。」
「你鍾唔鍾意香港?」
「鍾意，所以我先喺度做嘢。」
「你嘅工作係？」
「工程師，你呢？」
「鬼佬」比較懂得禮貌地反問別人，
因為人類總是喜歡談及關於自己的事，
香港人要學習一下這個傾偈技巧了～
（自己連名字也不反問別人，還好意思教人？）
「Actor（演員）」
「Sorry?」這次到他聽不明白。
「演員，即係電影、電視⋯⋯」
「Oh~ I see~（哦～我知喇～）」
然後，他靜了。
有點懷疑他也在假裝聽得懂。
我說：「唔好意思，係咪我啲英文太差？」
「我聽英文都唔叻，只係明一半。」
「你本身唔係講英文？」
「我本身講xxx German（xxx德文）」
「德文？」
「似德文，但有啲唔同。」
「即係你細個唔識英文，大個先學？」
「係，主要喺日本、韓國學。」
這個故事告訴我們，「鬼佬」不一定識英文。
大家要記住啊！
「你好鍾意亞洲？」
「係，我好鍾意亞洲人。」
「點解？」
「因為亞洲人好友善同Open-minded（思想開放）」
我錯愕了！亞洲人思想開放？
「Really?（真的嗎？）」
「對我嘅國家嚟講，亞洲人思想好開放。」
這個故事告訴我們，「鬼佬」不一定思想開放。
「咁你個國家嘅人係點㗎？」
就這樣試探一下他來自哪兒吧！我真是聰明啊～
「Depends……（要睇情況……）」
然後，他說了一大堆我完全聽不懂的英文。
根本甚麼情報也得不到！我真是笨蛋啊～
事到如今，唯有用更直接的方法吧。
「唔好意思，我想確認一下你嘅國家名，我驚聽錯咗。」
然後，我拿出電話，讓他輸入自己的國家名稱。
各位聰明的讀者，猜到了嗎？
提示：
香港人聽到這個地方，會馬上想起一種糖果。
猜中了。
答案：
Switzerland（瑞士）
「你哋點叫呢個地方？」他問。
「Cantonese is瑞士（廣東話係『瑞士』）」
「瑞士…」他跟著讀一次，讀得十分標準！
「嘩～ 你廣東話好叻呀！」
「哈哈～多謝！」
「嗰度係唔係好凍？」
「係，冬天得零下10度。」
「Do you like… ski?（你鍾唔鍾意滑雪？）」
「What?」
「Ski……」
可能因為我的發音不準，讀了三次他也聽不懂。
我只好雙手模仿著滑雪的動作，他終於明白了。
「Yes, ski, snowboard（滑雪同單板滑雪）」
「每年冬天都一定會玩？」
「係，大部分瑞士人都會。」
「瑞士人都好鍾意滑雪，個個都識滑雪？」
「細細個屋企人就會掟你去滑雪，俾人推一推就學識。」
「哈哈哈～ 我早排去日本滑雪，係咁跌係咁跌。」
「係好難學。」
「你細個學，應該會易啲？」
「係呀，小朋友乜都唔驚，Just do it~
我識啲人12-14歲先學，對佢哋嚟講就好難。」
「Snowboard呢？」
「我大個啲先學，對我嚟講都好難。」
「啱啱你話你嘅語言係…？」
「Swiss German（瑞士德文）」
「『瑞士德文』同『德文』有咩分別？」
我只知道瑞士糖和德國軟糖的分別。
「瑞士德文比較自由，冇乜規則，聽得明就得，
調亂嚟寫都得，每個人寫出嚟嘅句子都唔同。」
「Really? No grammar（冇文法）? 」
「有少少文法，但好自由，鍾意點講都得。
有啲似普通話同廣東話嘅分別，
德文似普通話，瑞士德文似廣東話。」
「點解你決定留喺香港做嘢？」
「呢度好好，啲人又好友善，好聰明。」
「喺香港，有冇陌生人好似我咁同你傾偈？」
「未試過。」
「你打算留喺香港幾耐？」
「冇諗過呀，直到我搵唔到嘢做啦～」
「你掛唔掛住屋企（Home）？」
「掛住屋企人、朋友，但唔掛住瑞士。」
「點解你想離開瑞士？」
「I don’t know, 住咗30年，
個地球咁大，我想出去睇下。」
地球真的很大，有很多地方等著我們去看。
但有多少人，願意像這位陌生人一樣，
離開自己的舒適範圍，出去看一下？
「我做緊一個計劃，係每日搵一位陌生人傾偈。」
「為咗咩要咁做？」
「為咗自己而做，訓練自己大膽啲，有自信啲，
又可以聽到唔同年紀、國藉、職業嘅人講嘢。」
「Cool idea~」
到站了，我們一起下車。
在月台上，繼續邊走邊傾陌樂偈。
「歐洲人會唔會同陌生人傾偈？」
「歐洲其他地方我唔知，瑞士人好封閉自己，好固執。」
「喺呢方面，你覺得香港人比瑞士人好？」
「例如瑞士每家人有自己嘅花園，唔鍾意俾其他人入嚟，香港人友善好多，思想開放好多。」
原來對瑞士人來說，香港人一點也不冷漠。
他準備上電梯，而我要去另一個方向，只好跟他道別：
「Thank you very much, enjoy your night~」
「Nice to meet you, goodbye~」
他站在電梯上跟我微笑、揮手。
電梯緩緩地上升，他漸漸從我的視線中消失……
慘！忘記了問他喜不喜歡吃瑞士糖！
我們都是陌路人，就這樣傾了一場各有口音的英文陌樂偈。
https://www.facebook.com/ChatToStranger