【練膽大法】我每日迫自己搵一位陌生人傾偈《陌樂偈》: 《陌樂偈》第34天－黑暗中「傾偈」光明中「復仇」
《陌樂偈》第34天－黑暗中「傾偈」光明中「復仇」
今天我傾了一場陌樂偈，放下了多年來的心頭大石
公園內，一位年紀與我相約的男生，獨自坐在亭內
戴著耳筒，全神貫注地玩手提電話遊戲
我坐了在他旁邊，開始猶豫
看到他完成了一個關卡，準備開始下一個關卡
機會來了～陌生人！
「Hello～可唔可以同你傾兩句？」
他錯愕地拿下了耳筒說：「做咩呀？」
「我每日都會搵一位陌生人傾偈，你係咪等緊人？」
「係呀，我等緊人，你係做功課嘅？」
「唔係，呢個係我自己嘅一個嘗試」
我告訴了他我是一名演員，解釋了進行陌樂偈的原因
我問：「以前有冇試過，有人好似我咁同你傾偈？」
「有，通常係Sell嘢囉！我頭先都心諗你做乜㗎？
但你話係演員，有呢個計劃，我咪聽住先囉！」
我失笑了：「見我未拎份保單出嚟，咪聽下先囉呵」
他也笑著說：「係呀～」
「放心，真係冇嘅～唔係Sell嘢，傾完就各散東西」
他問在哪裏可以看到我的演出，我說了一套電視劇
他說有看過，但沒有追看，現在很少看香港的電視節目
看外國的劇集比較多，例如是美劇The Walking Dead
我也是這套劇集的Fans，我們馬上便開始討論劇情
最近有陌生人在Facebook 跟我說：
「想搵陌生人傾偈，但不懂得打開話題」
其實任何兩個人，也一定有共通點，只是看你能否找到
可能是看過同一套劇、有同一種嗜好、到過同一個地方
只要你有心跟對方傾偈，一定能找到共同的話題
然後，我問他的職業
原來他是一間機構「在黑暗中xx」的員工
我以前有聽過這間機構，覺得很有意思
這是一間讓視力正常的人，體驗盲人生活的機構
他們會帶你進入漆黑的地方，進行各種活動
「我有聽過呀！我都想去好耐，但係未去過
係咪有啲人，負責帶人入去體驗盲人嘅生活？」
「係呀，叫導賞員」
「聽講入面嘅導賞員，全部都係盲人
喺黑暗嘅地方，對佢哋嚟講就好似日常生活咁
但對我哋嚟講，就好唔方便，係唔係真㗎？」
「我哋有三十幾個導賞員，唔係全部都係盲人」
「你係其中一個？」
「我唔係，我負責招呼客人同準備活動」
「咁三十幾個導賞員入面，有幾多個係盲人？」
「呢樣我唔可以講太多，要保持神秘感
如果你玩過我可以話畀你知，但你未玩過就唔講喇」
「咁你自己有冇入去體驗過？」
「做Intern（實習）嗰陣我已經入去玩過㗎喇！」
「你覺得有咩感覺？」
「賣感動囉～」
「咁有冇感動到你？」
「玩完嗰陣感動，依家諗番就唔感動，都係包裝嚟啫」
「個主旨係要其他人，體驗下盲人嘅生活？」
「明白佢哋嘅生活困難，佢哋只係有視覺上嘅障礙
如果撇除咗呢個障礙，其實佢哋同普通人冇乜分別
我哋唔係要直接去幫佢哋，係要幫佢發揮到個力量
例如佢跑步好叻嘅，咁你咪當佢正常人跑步囉」
「算係慈善機構？政府機構？定私人機構？」
「我哋係社會企業，同普通公司一樣，都係要賺錢嘅」
「即係申請牌照嗰陣，講明要做社會企業
賺錢得嚟都要負社會責任嘅，唔可以齋賺錢？」
「主要都係想賺錢嘅，其實同普通公司冇分別」
「咁點解要做社會企業？有咩好處？有資助？」
「冇資助，全部都係自資嘅」
「即係「社會企業」只係個名嚟？係個名好聽啲？
其實「社會企業」同「有限公司」係冇分別嘅？」
他點頭說：「係喇係喇！」
「咁你做耐咗，有冇覺得間公司係賺錢多過有意義？」
「入面啲員工真係好有心嘅，間公司嘅老闆係為咗賺錢
賺錢係主要嘅目的，然後順便做啲有意義嘅事」
「聽講可以自己揀，入去做咩活動？」
「係呀係呀～」
「我有個朋友入去慶祝生日，成班人黑媽媽咁食蛋糕
係咪個個客都唔同？你就係負責準備呢啲活動？」
「類似喇類似喇～我要問曬佢哋想點搞呀咁」
「啲活動可以自己定嘅？」
「其實都係大同小異，大部份時間做嘅嘢都係一樣
可能係最後嗰幾分鐘，先有少少唔同咁樣
通常問下佢哋想點慶祝呀，播下音樂呀咁」
「遇過最特別嘅要求係點？」
「包曬成個場唔畀人哋入嚟，有班家長約埋一齊嚟
然後叫啲細路入曬去玩，自己就喺出面傾偈
佢哋唔想俾人騷擾，所以就要包曬成個場」
「啲家長自己唔入去體驗嘅？」
「係，佢哋當嗰度係遊樂場咁，放曬啲細路入去玩」
「我聽過一個好浪漫嘅故事，有一對男女本身係網友
未見過對方，佢哋想約出嚟見面，於是去咗你哋公司
喺黑暗中見一次面先，傾下偈，之後再出返嚟見對方」
「咁奇妙嘅經歷我未聽過喎～
但有未一齊嘅人會嚟玩情侶版，然後喺入面示愛」
「係咪成日都有㗎？」
「間唔中啦～ 但係全部都係失敗㗎！」
我大笑了～
「啲男仔平時唔夠膽示愛，所以要喺入面黑媽媽示愛
然後靜雞雞捉住人哋隻手咁樣呀？」
「係呀！」
「有冇聽過有人成功？」
「冇！好尷尬㗎～」
我又笑了～
「咁下次有人要求你咁做，你會唔會同佢講
『唔好制呀！100%失敗㗎！』咁呀？」
「唔會，咁都要畀啲假希望人哋嘅」
「咁又係，冇理由有生意唔做嘅」
「哈哈～咁要畀人哋試下㗎麻～」
「重有冇啲咩有趣嘅客人？」
「冇喇，我都係返咗三四個月，同之前暑假做過Intern」
「點解你會揀呢份工嚟做？因為覺得好有意思？」
「我大學嗰陣讀社會科，要揀Intern
有好多機構畀我哋揀，例如「綠色xx」
全部我都唔係好想做，冇話對呢份工特別有興趣
只係喺咁多舊屎，揀舊冇咁難食嘅，我依家都想轉工」
「咁點解你讀呢科？」
「之前讀完高級文憑，得呢科收我，所以就讀呢科」
「你怕唔怕自己唔鍾意讀呢科？」
「邊有得怕？有得讀就讀㗎啦，最緊要有個學位」
香港的教育制度，提倡學位就是真理
學生們為了得到學位，不惜一切
入學後，讀著不知道為了甚麼的科目
畢業後，做著不知道為了甚麼的工作
一輩子，過著不知道為了甚麼的人生
「咁點解你咁唔想做呢份工？呢份工有咩唔好？」
「其實呢行都好難做㗎喇，越嚟越少人玩
好似其他嗰啲密室遊戲公司咁，都愈嚟越少人玩
因為我之前都有做過其他呢啲公司」
「你做過邊間？」
他說出了一間公司的名字
我說：「呢間我同佢有仇口喎～」
「點解嘅？」
「佢之前搞咗一個公開嘅遊戲設計比賽
我參加咗，然後贏咗冠軍，幫佢起咗一間房出嚟」
「我有聽過你間房呀！原來個冠軍就係你呀？」
「咁你有冇聽過呢件事嘅結局係點？」
「冇，我之後先入職，最後發生咩事？」
「本身佢話贏咗比賽就會有份合約，可以做創意總監，同埋免費請你去幾個國家，參觀人哋嘅同類型遊戲。我嗰陣重打緊工，用公餘時間好畀心機咁參加比賽。
贏咗個比賽之後，我同嗰間公司嘅老闆簽咗約，然後辭咗本身份工，準備去佢哋間公司度做。但嗰陣我未過通知期，要繼續返原本份工。
於是，我每日收工就去幫手起嗰間房，好努力咁去準備材料，同設計師傾要點樣整。到間房開張，我專登請假，出席佢哋嘅記者會，幫佢哋做宣傳，招呼啲藝人同嘉賓入去我間房玩。
嗰段時期，我一蚊都冇收過，但我好享受，因為我覺得自己搵到一份好鍾意做嘅工。有客人玩完之後過嚟同我握手，話我知呢間房好好玩，嗰種滿足感係我出咗嚟做嘢幾年，從來都未感受過。
除咗做演員，我一直都好想做一個遊戲設計師」
他留心地聽著我的過去
「當我幫佢哋完成晒所有工作，離開咗原本間公司，滿心歡喜準備返新工嘅時候，個老闆搵人打電話同我講，依家決定唔請我，然後用幾千蚊打發我走，重拎埋我條橋去其他地方賺錢」
他忍不住說：「咁撚仆街嘅！」
「跟住我就失咗業，嗰下嘅心情真係好似失戀咁，好心痛…
以為自己搵到一份鍾意做嘅工，全心全意咁去做，結果好似發咗場夢咁。我嗰陣諗過好多方法想爭取返我應得嘅嘢，但人哋係大公司，我呢啲小市民根本乜嘢都做唔到。不過我都好多謝個仆街，令我知道做唔到自己鍾意做嘅嘢係有幾傷心」
「同你簽約嗰個老闆係咪xxx？」
「係呀」
「而家間公司已經轉咗手」
「嗰個人冇做嗱？」
「佢經營不善，破撚咗產丫麻！
所以你放心，呢啲人個天會收佢嘅～」
聽到這個消息後，我首先是瞳孔擴大、嘴巴張開
然後出現了「半澤直樹」的招牌微笑
最後，深深地呼出了一口氣
這口氣，我翳住了很多年
沒想過，隨便跟一位陌生人傾偈，能令我放下心頭大石
我們再傾了一會，關於遊戲公司的話題
然後，他等待的朋友到了，站起來跟我說再見
不知道對方名字，沒有交換電話，就此告別
我們都是陌路人，就這樣傾了一場陌樂偈
https://www.facebook.com/ChatToStranger