【練膽大法】我每日迫自己搵一位陌生人傾偈《陌樂偈》: 《陌樂偈》第10天－餘下兩小時壽命的家庭主婦
《陌樂偈》第10天－餘下兩小時壽命的家庭主婦
https://www.facebook.com/ChatToStranger
巴士下層，一位小姐在無所事事地撥著Facebook
機會來了～陌生人！
「你好，可唔可以同你傾下偈？」
「唔方便」她不問因由就把我拒絕了
如果把搵人傾「陌樂偈」的勇氣，兌換成能力值
每一天的最初，我大約有100點
受到目標的「拒絕」攻擊後，會餘下10-30點左右
(視乎陌生人所使用的招式而定)
我帶著餘下的25點勇氣值，繼續尋找下一位目標
前面有一位頭上寫著「家庭主婦」的女士(俗稱師奶)
她用電話在玩Candy Crush，我在旁邊的位置靜候時機
剛完成了一個關卡！機會又來了～陌生人！
勇氣值太低，我猶豫了
在她第三次過關時，我終於開口
「你好，可唔可以同你傾下偈？」
她呆了一呆，然後問我：「你係咩嚟㗎？」
我呆了一呆，然後回答：「我...係人嚟嘅」
她笑了笑，再問我：「你係做咩㗎？」
「我係一個演員，我每日都會搵一位陌生人傾偈
因為我覺得而家嘅人，成日都對住個電話好似著咗魔咁
我希望多啲人可以理下身邊嘅人」
「咁如果啲人唔理你咁點呀？」
「我會搵過第二個，啱啱先俾後面位小姐拒絕完」
「我重以為你係做訪問嗰啲」
「哦，唔係。我自己決定要做呢件事」
她好像很好奇「咁你通常同人傾啲乜？」
「乜都傾，通常會問下人哋嘅職業，你係家庭主婦？」
「係呀」猜中了
「傾完我會打篇文放上網，你有冇上網㗎？」
「我冇㗎」
「點解你會玩Candy Crush呢隻Game嘅？」
「人哋教我玩，咪玩下囉，玩咗好耐喇」
她不知道玩Candy Crush也要上網的，否則怎拿到「車票」
很多認為自己不會上網的人，其實每天也不知不覺在上網
「有讀者想我問陌生人一啲問題，你睇下想唔想答」
「睇下咩問題啦」
「你隨便答得㗎喇，唔想答可以唔答」
「好啦」
「你人生中最開心嘅係咩事？」
她想了一會：「...冇喎，諗唔到」
「因為你成日都好開心？」
「唔係喎，成日都唔開心，冇乜嘢特別開心」
「咁最唔開心嘅事呢？」
她馬上回答：「爸爸過身，呢種事最唔開心㗎啦」
「嗯，明白嘅」
看來人很難記起開心的事，卻對傷心的事十分深刻
我們真的沒有事值得開心嗎？
還是我們選擇記著傷心的事？
「如果你而家得返兩個鐘壽命，你會做啲咩？」
「兩個鐘？做唔到啲乜㗎喎，打畀朋友、親人囉」
「同佢哋告別，交低身後事？」
「係囉，係囉」
「咁你個人會去邊？」
「返屋企囉，瞓喺張床度等死」
「你好鐘意瞓覺？」
「唔係，得兩個鐘，都做唔到啲乜㗎啦」
「你以前一直都係做家庭主婦？」
「係呀，你喺邊度做演員？」她開始反擊了
我告訴了她我參演過的作品
「你好似TVB一個演員」
「哦～我知你講邊個，有人同我講過，但我唔係佢」
我到站了，比她先下車
「我落車喇，多謝你同我傾偈！Bye Bye」
「Bye Bye」
我們互相點頭，不知道對方名字，就此告別
我們都是陌路人，就這樣傾了一場「陌樂偈」
2017-01-08
https://www.facebook.com/ChatToStranger