《精武．黑俠》: 第十二章︰原則
回到地牢，便看到振聲原來早已回來，但他沒有走過來，只是坐在電腦前默不作聲。
過了一會，振聲瞪著我，開口問道：「兩個問題。」
我瞧一瞧他示意他繼續發問。
「第一個問題，點解你要沖入去救佢，佢係生係死根本影響唔到我地嘅任務。第二個問題，你殺咗個殺手咪算囉，點解要咁虐待佢，你明知咁樣唔符合我地嘅道德。」振聲語氣有點憤怒地問道。
我把外套脫下來，慢慢地道：「你知唔知點解佢地想殺胡克勤？你仲記唔記得，上次新聞報係邊個入過佢間屋打傷佢，係我地。今次佢地嚟到對胡克勤郁手嗰陣，打佢嗰陣同我上次打佢嘅方式一模一樣，我諗好明顯佢地係想殺胡克勤之後再嫁禍俾我地，再透過新聞大肆報導，利用傳媒嘅壓力去捉我地，我地到時想出去搵料都難。」
振聲依然顯得有點不滿地問：「咁個殺手呢？有必要咩！」
明顯這個才是振聲真正想問我的問題吧，看來振聲還未明白我們所做的事。
「而家係講道德嘅時候咩！佢職業殺手嚟架，把口有冇咁易撬得開呀！唔係咁你想我點樣攞佢料呀！請佢飲茶同佢平心靜氣咁傾呀！？」我大聲反駁到。
振聲激動得站起來說：「你開頭話你會返嚟幫你呀爸救香城。我信你，我無一刻質疑過你。但係而家呢？你做嘅嘢同你呀爸同班殺手有分別咩！你咁樣做同佢地一樣！都係一班無恥嘅犯嚟咋！你咁嘅心態仲救到香城咩！？無可能呀我同你講！你只會同佢地一樣！喺香城一直沉淪落去！」
我不服氣地說：「你想我地同佢地有分別？你同我都知由上嗰座爛鬼山嗰日開始，我地就已經係罪犯啦！我地由day one開始就預咗返唔到轉頭架啦！」
「如果你要跟你呀爸嘅方式做嘢嘅話，我話你知，你一定會失敗，到時你唔只救唔到香城，成個香城會因為你變得更差更無藥可救！」振聲破口大罵。
「治亂世用重典，我有咩錯呀？呢個時勢唔通你期望可以就咁交俾班差佬佢地慢慢同佢chok口供呀？七年前或者仲得，而家佢地唔包庇返班殺手都算偷笑啦！」我反駁道：「振聲，你要明白呢個城市而家究竟變成點，我以前同你講香城有幾好，都已經係七年前嘅事啦。唔洗我講，就咁睇新聞你都知香城而家係發生緊咩事啦？為咗香城我可以不擇手段，只要我可以救返呢個城市，你要我做咩都得，我根本唔會介意整污糟自己對手。」
振聲停了下來，沒有再跟我吵鬧的打算，他走過來，淡淡然說道：「我希望你會記得返轉頭。」
說罷，他便獨個兒離開了地牢。
我實在不明白這句說話當中的含義，只是看起來，振聲對我好像有點失望。
第二日我一早便起了床，走去打開電視機，期望電視新聞能報出我預期會報之事，但新聞居然隻字不提。
坐在電視機前看完整個早間新聞，但報的全都是雞毛蒜皮的新聞。
我立刻開電腦看網上新聞，去查找到底昨晚之事到底發展如何。
看完大半個港聞版，連丁點有關胡克勤的新聞都看不到。
到我無意之間看到港聞版的最後一個標題：「青年醉駕 魂斷金山」
懷著好奇心，我點下了這篇新聞的連結。
一點進去就看到了一張司機撞車的案發現場照片。
從相片中清晰可見，肇事司機的樣貌根本就是昨晚跟我打鬥過的殺手。
看到這段新聞，我怒上心頭。
原本我還抱有一點寄望，希望警察會起碼盡少少力去調查一下，但看來全都是我的奢想。
我save下了這段新聞的link，便駕車一路往振聲家去。
「你都睇到嗱？」剛到地牢便看到振聲坐在電腦前，而屏幕上顯示著剛才那段撞車新聞。
振聲不回應，只是從椅上轉了過來，抬起頭看了看我。
我接著說：「而家你信，我嘅做法係無可避免啦？」
「你根本就唔明…」振聲低下頭來輕輕地說到。
我不明所意，靜下來看著他。
「你根本就唔明，你啲做法其實殘唔殘忍，道唔道德，I don’t care！我在意嘅係你呀！你明唔明呀！？你話你會去拯救呢個城市，我明呀！我信你有呢個能力。但我唔想見到嘅係你為咗救呢個城市而變咗第二個人呀！我相信你到最後會救到香城，但係無必要搞到自己滿手鮮血啫吓嘛？到第日如果成個香城都知你曾經做過啲咁嘅嘢，佢地會點諗呀？」振聲站起來瞪著我說。
振聲指著屏幕說：「香城需要嘅係一個佢地可以依賴嘅救世主，佢地需要嘅係希望，而唔係多一個人令佢地每晚返屋企都要擔驚受怕呀！你覺得你而家所做嘅嘢可以俾到呢啲嘢佢地咩？如果你堅持要去救呢個城市嘅話，絕對會係一場硬仗。如果無人支持你，你係絕對會輸…你明唔明呀？」
「我真係無其他方法啦…」我一臉泄氣地說。
振聲走近我說：「點會無啫？佢地想用群眾壓力去逼我地埋牆呀嘛？我地就同佢地玩群眾壓力。」
「群眾壓力？」我問道。
振聲接著道：「我地係時候要話俾香城嘅人知，已經有人企咗起身，願意去作出改變。要令佢地醒覺，係時候拎返屬於自己嘅嘢。」
我反對道：「唔得，如果到時班殺手殺雞儆猴，咁盞令到市民更加人心惶惶，我地唔可以押佢地上場做籌碼。」
「咁咪由我地去保護佢地囉。你要明白，佢地會係我地最大嘅籌碼。」振聲提議道。
我再反對道：「我地邊有咁多時間…」
還未說完，振聲便道：「由我去。以後你負責對付班殺手，班市民交俾我。」
「但係，呢場係我嘅戰鬥，我唔想搞到你都身陷險境。」我懷著內疚的心情對振聲說。
振聲微笑了一下：「我地係兄弟嚟，呢件可以話係你呢一生人到而家做過最大嘅一件事，而且呢件又係一件正確嘅事，我點可能袖手旁觀？」
「兄弟…」我無言而對，只能夠拍了拍振聲膊頭，以示我感激之情。
振聲回道：「在心中。」
這一晚，振聲獨自一人在地牢裡喝著酒。
忽然電腦屏幕右下角彈出了一則通話請求，振聲用手指點一點鍵盤，按下確認。
「啱啱陳真打咗俾我，話你地決定留喺香城繼承佢呀爸嘅遺願，你知唔知呢件事。」師傅從畫面問道。
振聲嘆一口氣，應道：「我知。」
「我點解事前收唔到任何通知。」師傅似乎有點怪責的意味，令振聲都開始有點嚴肅起來。
振聲定一定神說道：「呢件事我都有勸過佢，但師傅你都知陳真份人有幾硬頸架啦，何況嗰個仲要係佢呀爸…」
「陳真又係…咁樣都唔同我商量吓先。」師傅語氣比之前淡了下來。
振聲跟著說：「師傅有件事我的確係想話你知。」
「咩事。」師傅應道。
振聲沉思一下道：「自從陳真佢開始練佢呀爸留俾佢嗰本迷蹤拳之後，我覺得佢份人好似比以前暴戾咗，做事都比以前激進咗，好似變咗第二個人咁，我驚佢咁落去會出事。」
「嗯…呢件事我會了解吓。」師傅回應得比想像中冷淡。
師傅面對鏡頭嚴肅地說：「振聲，應承我，無論佢想做啲咩，你都要陪住佢，仲要定時同我匯報。佢個性衝動，我擔心佢遲吓唔知會闖咗咩彌天大禍。」
「我會架啦，師傅。」振聲點頭道。
屏幕中斷了對話的畫面，振聲摸著酒杯，緊皺著眉，細聲說到：「我保證…」