《精武．黑俠》: 第五章：挑釁

我一看到瀅瀅，便心知不妙，但是我仍需要裝作鎮定去面對。
「Hello瀅瀅，乜拍緊拖都唔同呀哥講啊？」我故作輕鬆地說。
瀅瀅初時呆若木雞，然後彷然大悟地說道：「呀哥你又話自己無事嘅…但係咁都係好事嚟架！起碼肯去面對係一個好開始呀，同埋呀Ken佢好犀利架，佢一定好快就醫得好你啫！」
這時關醫生看過來對著我笑著說：「原來你係呀瀅個哥哥呀，佢成都同我講起你架，估唔到今日你會做咗我個病人，我地真係有緣份。不如你join我地食lunch呀？」
難得有個再度接近他的機會，我又豈能輕易放過，我開口便答應。
來到了一個高檔的日式餐廳，瀅瀅和關醫生很快便點了菜，而我則隨他們發板。
為了打破悶局，瀅瀅開口便道：「係喎呀哥！尋晚你咪問我學生見社工之後啲嘢嘅？呀Ken佢接手咗好多呢類case架啦！我都係去幫手pass返學生情況俾佢嗰陣先識架咋！好有緣呀可！」
說罷，瀅瀅就甜笑著箍實關醫生的笑。
關醫生似乎已經察覺了我到他醫務所的目的，他戚戚眉說：「哦自殺嗰班學生呀吓…」
關醫生實在比常人聰明，只需數個線索便可把他們串連在一起，而他的聰明亦成為了我的一大煩惱。




在我仍在沉思中的時候，關醫生忽然說到：「呀瀅哥哥呀，我聽呀瀅講呢話喺你細個嘅時候親眼睇住你呀爸俾人殺死架喎，會唔會係呢件事而導致你患上抑鬱症架？」
我瞪一瞪關醫生，發覺他已經看著我半笑著，胸有成竹般的眼神表露無遺。
這次對話我完全處於下風，況且相信他已經掌握到我到此的目的，不用再談下去，他也能夠估計到我到底是誰。
當我打算作離場之意：「唉呀我唔記得咗原來我下畫約咗朋友出嚟聚舊，真係忘記咗，好對唔住呀我諗我要走先啦。」
此時關醫生亦站起來：「咁等我送你出去啦，反正我要去入錶。」
走到告別之時，關醫生忽然對我說：「陳真呀，仲記唔記得當年殺你呀爸個黑衣人呀？」
我停了下來，慢慢地轉過身說：「呢件事我無同呀妹講過…」
他半笑著道：「係呀你的確無。我勸你呢七年無見難得返到嚟就唔好搞風搞雨啦，俾你搵到佢又如何啫，就算你報到仇呀，都難保你屋企人唔會出事架嘛，睇吓你仲有個妹，有個呀媽。仲有呀，唔好妄想可以搞到政府啲咩啦，諗住幫班學生討回公道呀？」
他把口靠在我耳邊輕聲說：「打死你都得呀。」
說罷，他便轉身離去。




此刻我獨個兒站在大街上，手中握緊拳頭，怒火急速地湧上心頭，但我又不能魯莽行動，只好眼睜睜看著這個殺人兇手慢慢步進餐廳，和我的妹妹親熱。
這般痛苦而又無可奈可的感覺，實在難受。
終於要面對我的殺父仇人，我心情實在是萬分複雜。這是家仇，固然要報，但他亦是瀅瀅的男友，若然把他殺了，那又會傷了瀅瀅的心。但若果不除關偉和，又會繼續有學生作無辜犧牲。



我坐在振聲家中大廳的梳化上，與振聲一起與師傅開著視象對話。
師傅得知這個消息之後，問道：「嗯…喺你打算去報仇之前，你要諗清楚後果。如果你成功咗，無錯你的而且確可以為父報仇，但我地唔知嘅係喺背後仲有幾多好似佢咁厲害嘅殺手，咁樣落去你地處境會好危險。而萬一你失敗咗嘅話，你可能會連命都無架。」
振聲語重心長地對我說：「師傅講得無錯架呀真，今次嘅行動有太多未知數，我覺得你唔應該去。」
「七年，我等咗呢個機會七年啦，到今日終於都俾我搵到究竟係邊個殺我爸爸。我應承過自己一定要為我爸爸報呢個仇。振聲，師傅，對唔住，不過今次真係無商量餘地。」我看著振聲和電腦中的師傅說。




振聲沉默了一會，待我和師傅中斷對話後對我說：「無論你決定係點，我一定會企喺你身邊。萬事小心。」
振聲查好關偉和的住址後便交給我，拍著我膊頭說：「要平安返嚟。」
我開玩笑地說：「做咩個個都覺得我好似會死咁啫？」
夜深之時，我懷著滿腔怒火，決定要去為父親報仇了。