一個書生既Player故事: 三五零

原來一單Project run要經過咁多既部門同努力。

Design、Marketing、PR、Finance、Purchasing、當然仲有偉大既Management。。

我主要既工作係做Research同埋Admin野，有時做下飛鴿傳書隻飛鴿送文件，認識下各部門既人。吹下水，同其他人打好關係。

呼。

經過咗漫長既一個星期，終於又放假。



拍拖既人又約唔到，又懶得出去認識新既朋友，我約邊個好呢？

約既人要滿足以下既條件：住得近、單身、有聯絡易約出黎、又想見大家既人。

阿婷、靜宜呢類平時疏於聯絡朋友唔會特別想見面，肥傑、Parsons、Wade等等都有各自既生活，可能一兩個月食一次飯，亦不至於會每星期要見面既頻率。

可以亦都願意經常見面既人，我個腦海裡淨係諗起一個人。

佢就係江柏琪。



返工之後既生活，都只係想留返空餘既時間比最重要既人，我無咁多時間可以浪費。

慢慢地，我同江柏琪聯絡同見面既時間愈見頻密。

我：【今個星期想去邊？】
琪：【諗唔到。】
我：【帶你一個神秘地方。】

「車，仲以為係乜野神秘地方。原來係赤柱。」江柏琪話。



「我本來諗住自己一個人黎嫁。見同你咁熟，咪帶埋你囉。」我話：「我都幾鐘意黎呢度，喺銅鑼灣轉車坐半個鐘好快就到。」

我同江柏琪一路沿住海皮散步，泛紅的晚霞照亮喺江柏琪既面上，使到不施脂粉既佢非常好看。

去到廣場中間，有好多人帶住狗仔散步。

「超得意阿。」江柏琪同啲狗仔玩。

有一隻松鼠狗擔咗骨頭玩具放喺我面前，我摸摸松鼠狗：「你想我陪你玩？」

松鼠狗好開心地吠。

「好啦。」我將骨頭玩具掟向廣場既中心。

幾隻狗仔一齊衝過去搶骨頭。



松鼠狗又將骨頭擔去另一個人度。

「好搞笑，白色果隻狗好蠢，次次都delay幾秒。」

「讓下佢。」我揮手，示意松鼠狗過來。

松鼠狗好聽話，叫佢就會將骨頭擔過來。

我將骨頭掉去白色狗仔既旁邊，但慢半拍既佢360度轉咗一圈先至發現，佢既骨頭早已俾其他既狗仔搶咗。

終於白色狗仔有啲傷心，返回主人既旁邊，唔玩了。

「哎呀，好慘呀，玩咗咁多場一場都無贏過。」江柏琪話。



「咁可能要搵你幫佢照一照個腦。」我話。

「咁黑心既。」江柏琪話：「照下又真係安心啲。我有朋友都話養咗隻懷疑智力有問題既倉鼠，唔識剝瓜子。」

「倉鼠都有得check到佢係咪弱智？」

「如果本地有獸醫學校，我都想讀。」江柏琪話：「我話過，第時住間屋一定要養狗。」

「養囉養囉。第時我出去返工，你日日做少奶奶撚狗湊B。」我話。

「講到你同我結婚咁。」江柏琪話。

「我想嫁。不過唔知仲有無咁既機會。」

「哎又講呢啲。」江柏琪紅都面晒。



「第時你搵唔到人結婚，記得要搵我。」我出自真心，如果江柏琪玩夠想同我一齊，我一定會接受佢。

我唔介意什麼埋唔埋單。

我介意既係我重視既人喺我身邊同埋覺得幸福。

「埋單？你有咁想結婚，放棄成個森林咩咩？」

「睇下對象係邊個姐。」

「嗯。」

「我地行上山睇日落影相，再落去食好西。」



我同江柏琪對住個日落自拍。

我突然覺得，喺咁浪漫既氣氛應該做啲野。

我抬起佢個頭，錫咗佢一啖。

然後我靜靜地攬住佢。

今次江柏琪無拒絕我。

我唔知道咁樣係默許我咁做，係咪代表想同我一齊。

我無問佢。

我諗，如果佢有心繼續落去，到我決定咗再正式表白會更認真。

廢時佢覺得我對佢係玩玩下。

「我送你返屋企。」燭光晚餐既過後，又要回到日復一日既日子。

由閒日食一晚飯，到星期六日放假都會約出來街街、9 hea。

江柏琪既存在就一如以往喺我生活中有一點甜。

每個星期返工都好期待Weekends可以見面既日子。

就好似以前期待放工可以返屋企見到佢一樣。

江柏琪就好似一個差電器咁幫我打氣。

有咗江柏琪，我對工作亦都特別努力，希望可以追趕到佢既尾巴，雖然佢應該唔知道佢對我依然咁重要。