一個書生既Player故事: 三三九

同江柏琪一齊既時間真係好快樂，即使我地乜野都無做，只係簡單食個飯，傾下計，心入面已經感到甜絲絲又幸福。

最令我興奮既事，係知道原來我喺江柏琪心目中一直佔有住一個特別既位置。

人類係好犯賤，得到過又毀於自己身上既人未必懂得去珍惜；最令你最念念不忘既，一定係果位無疾而終未曾開始過既人，俗語都有云：得不到的總是最好。

果種似有若無，好似得到過，又唔肯定自己係咪得到過既曖昧，加埋回憶濛朦美加乘，諗下都心動。

我有信心江柏琪講既野唔係哄我既假話。



有幾多個男仔會係佢既青梅竹馬？會一齊喺廢校渡過？（其實會出現喺廢校已經唔係正常人會經歷既野）又有幾多人中學雞年代已經同居，而兩個人唔係拍拖，仲要無搞過？

就好似《那些年》年沈佳宜同柯景騰講過，因為你對我太好，以後再遇到既男仔，都好似無你對我咁好。

我做咗江柏琪心裡面既指標，而佢都一樣。

我理解點解人地咁驚另一半去搵自己既EX，因為你永遠唔知道，佢喺對方身上，留住幾深既夢魘。

江柏琪既一番說話足以令我陷入情緒既地獄。



早已將江柏琪放喺回憶既人既類別，又抽出來。

我不禁諗，我同江柏琪，仲有無再續前緣發展既機會呢？

咁等咗三年先出現有Feel既Stephanie呢？我應該要點樣去取捨？

我對Stephanie就來半年既觀察期，完結咗未呢？

我決定好要追佢未呢？



等咗咁耐我都仲咁猶豫不決，係咪已經代表我根本未Ready同Stephanie一齊？

我同Stephanie既問題係乜野？

係覺得佢太隨便同我扑野？

呢個都唔係真正原因，因為江柏琪都有同佢既男朋友扑野，我無咁嚴重亦都無資格有精神潔癖。

我心底有把聲音，話我同Stephanie既性格唔適合。

例如喺商院O Camp，我同林敏兒會一齊嘻嘻哈哈打鬧，但Stephanie只會好尷尬咁企起角落，希望無人會注視到佢。

佢係一個極需要保護同埋照料既女仔，而我唔太有耐性照顧洋娃娃。

所以我覺得江柏琪既倔強同智慧係幾吸引到我，加上我地既相處，實在更勝一籌。



Quit Hall加上畢業將會係我人生重大既轉捩點。

我估，到時自然會有答案。

個天會幫你揀。

可能到最後單身終老，兩個都無得一齊。