一個書生既Player故事: 三三五

誓師大會就咁喺Mul房舉行，台都唔洗搭，OC們都無乜野要準備。
 
所以第二朝既七點半，我、Felix、Wade同埋Stephanie一齊落去OC集合房間拎物資，聽一次簡短既Briefing，換返件指定既Camp Tee，就斯斯然去食早餐吹水。
 
「好眼訓。　」我話：「我住Hall成年，都未試過咁早起身。」
 
「加一。」Wade話：「BBA既女質素真係高好多，你睇下十一點鐘方向。」
 
斯文白淨眼仔碌碌既組媽，將Camp Tee束起，露出小蠻腰。
 


要數全City最高質既囡囡，必然係商院或者水會。
 
商院既係靚女集中地、重裝甲，水會既女仔就性感，性格都Open D。
 
而我好幸運，有幸參與呢兩個圈子既活動。
 
「見識少，咁既質素好一般姐，間中都食到幾件啦。」
 
「食女？有肥婆俾我食，我都蒙頭入閘阿。」
 


「算啦死毒男。」
 
傾傾下閒計，林敏兒已經到咗。佢已經換咗Camp Tee，沒有改造衣服，斯文乖巧既樣子，拒住Felix既手，同我地打招呼：「Hello，我係Janice阿。」
 
「聞名不如見面，我係Felix既Roomate Wade。」Wade率先自我介紹。
 
「我知，你係Felix既Roomate。你係書生，而你呢，就係Stephanie～」林敏兒既戲非常好，彷彿我地係互不認識，第一次見面。
 
「Janice聽我講同你地玩既事，成日都想加入，今次做足晒功課。」Felix話：「Janice今日靠你地睇住。」



「夠鐘啦。我地要去搬野啦。」Felix話。佢要幫手將Freshman既袋放入紅白藍膠袋，再運上車。

Felix同Wade離咗之後，我地三個有少許尷尬既沉默。

我感覺到林敏兒既視線正放喺我臉上。

我望一望林敏兒，露出一個禮貌既笑容。

「Janice，你讀咩科嫁？」Stephanie主動問Janice。

「City Law School。」

「嘩，你好犀利阿。我從來都無諗過自己會讀Law。」

「你係我第一個認識讀Law既朋友。」Stephanie話。



「讀law既人通常會自己一角比較毒，就好似我咁。」

「你勤力溫書姐。」佢兩個女仔正談得起勁，我唔係好想參與佢地既對話。

我感覺到林敏兒既眼神經常落喺我身上，好想同我傾計。

全日既活動，包括City Hunt，我一直都故意同Freshman玩，逃避林敏兒。

終於，黎到第一晚完曬遊戲，當Stephanie執野正準備沖涼既時候，我同林敏兒有單獨相處既機會。


「Step，我同書生想去陸杯面食呀，你一唔一齊呀？」林敏兒並無問過我既意思，直接就問Stephanie。

「我想沖埋個涼先。」Stephanie話。



「咁我地幫你陸埋？」我諗，都見咗成日，都避唔到太多。姑且聽下林敏兒有咩講。

「仲好啦。」Stephanie講完，就安心地落樓下沖涼。

「我要牛肉味杯面。唔該晒～」


我同林敏兒拎住個杯面，一齊出去攞熱水沖杯面。

「你，做咩扮唔識我，又係咁避我？」林敏兒用一個同正常人傾計好Causal既過氣問：「你好唔想見到我咩？」

「都幾。」

「咁耐無見，我都想關心下你最近過成點。你拍拖未呀？」



「有心啦，拍唔拍拖，都唔關你事。」

「我見你對Stephanie好似特別照顧咁，食飯幫佢夾菜，幫佢揹水，又成日問佢攰唔攰。」

「佢係我Hallmate，同得我一齊玩，當然要好好照顧佢。」

「咁我呢？」

「你有Felix照顧。阿嫂，我唔方便做太多野，廢時俾人誤會。」

「咁耐無見，你都對我咁Cool。。我都係為咗見你，先至玩呢個O Camp。」

「咁你想點？唔通我要好熱情咁同你玩？你覺得呢個世界都係圍住你轉？」



「你變咗好多，林書生。。你以前從來唔會咁同我講野。」

「以前既林書生，死咗好耐。」講完，我就拎埋Stephanie個杯面返房，林敏兒跟隨在後。


其他OC都去曬玩房Game，整個房間就只剩下我、林敏兒同埋Stephanie。

沉靜換來既係隨之而來既尷尬。



Stephanie見狀主動亂講野發起話題：「書生，今日有無mark中邊個組女想食架？」

全日Stephanie都好努力為我地三個打開話題，努力既樣子都幾可愛。


「um...無喎，D人太Fresh唔岩我。」我話。一來D人太Fresh，我覺得自己就黎做到佢地阿哥。二來，林敏兒全日都係我視線中出現，我好難有心情再去睇Freshman。

「出自你把口好冇說服力囉。」Stephanie話。

「Felix成日話你係USB，係咪真架？」林敏兒問我。

「講呢D。」我話。

「其實你幾時開始做player架？」Stephanie來了一發雷助攻，我知道你好想知，但可唔可以唔好喺依一刻問我。

「天生player格點睇？我都唔信真愛既。拍拖專一簡直係違反我既生理構造。」我只有亂答。唔通答你，因為眼前既林敏兒同我分手，我先開始變Player咩。

「我明。。」Stephanie話。

「你明咩姐？你食過好多仔咩？」我將個波拋返俾Stephanie。

「Er...無喎。。」Stephanie轉換話題：「Felix好仔黎架，擔屎都唔偷食～Janice你真係有福氣啦～」

「嗯～我都覺Felix真係一個好好既男朋友，所以我都好珍惜佢。」

「記住唔好痴書生呢Ｄ仆街咁多～哈哈！！」Stephanie話。



食完杯面，我地去其他House搵埋組仔女一齊玩，都係老掉牙既O camp遊戲，無乜野特別。但係Stephanie第一次玩呢D房Game，每一刻都表現出好開心，好努力表現自己唔想輸既樣子，非常可愛。

玩到凌晨5點，就到咗休息訓覺既時間。只得一至兩個鐘既睡眠時間，真係好珍貴。



林敏兒訓喺牆邊。

而我唔想同林敏兒一齊訓覺，所以我叫Stephanie同我訓喺中間。

我趁林敏兒訓著既時候，好似平時喺Hall訓覺咁樣攬實Stephanie，又會錫下佢。

攬住隻可愛既大公仔，進入夢鄉。

我希望可以無事發生咁樣完結呢三日兩夜既O Camp，唔好出什麼差錯。