一個書生既Player故事: 三一一

返學無聊既日常過後，好快又到咗期待既夜晚。

SP：【行咗成日，對腳好酸】
我：【肯定係你平時太毒，行兩步就嗌攰。你返到Hall未呀？】
SP：【行到AC3，就返到啦】
我：【洗唔洗請橋夫揹你返Hall？】
SP：【好呀】
我：【$500蚊】
SP：【咁貴。。我無$500喺身】
我：【打個折，$100啦咁】



SP 傳來一張相片。

背景係AC3天橋，有隻纖纖玉手拎住張$100紙。

SP：【快D落黎啦，我等緊你】
我：【你坐陣先，我落緊黎，十分鐘後到】
SP：【。。。】
SP：【你講真嫁？】
SP：【其實我行到上Hall嫁啦，你唔洗落黎】


我：【你唔會以為我真係落黎阿嘛】
SP：【=_= Faked】
我：【你好蠢阿】
SP：【唉早知唔講】

最近為咗見Stephanie，我都會早D返Hall。

因為Stephanie好早訓，佢通常落黎逗留一陣間就會走，想見佢係需要爭取時間。




無幾耐，Stephanie就由Felix房度過黎。

可能只得我留意到呢件事。

Stephanie到而家都唔會（唔敢？）直接推門入我房搵我，佢會先入咗Felix間房，再入我房搵我。

「做緊咩呢？」Stephanie推門而入，問我。

「無阿，諗住開場打LOL。」我坐喺電腦前開咗LOL扮野。

「隔離房無晒人既？」

「唔知佢地，太早無人返到掛。」

「哦。。」Stephanie手中拎住一個白色迷你公文袋，遞俾我。



「咩黎嫁？」我問Stephanie。疑似係今日既長洲手信。

「我今日喺街，見到有個文青打扮既女仔擺地攤，幫襯佢買嫁。你估下係咩黎？」

「唔知阿。」我講完就拆咗個包裝細看：「萬花筒DIY套裝？做乜鬼？」

「好得意！原來用廁紙筒，加反射鋁箔紙，珠仔就可以整到一個萬花筒。」

「你買咗幾錢？」

「$50蚊，好抵。」

「曬晒D錢買廁紙筒。你想要我去廁所拎俾你咪得～」我話。



「不如一齊整。」

「我睇你整得啦。」我搖頭微笑。

Stephanie將電腦椅移動，坐喺我隔離，拎起剪刀，好似個小朋友做勞作咁剪貼Vintage風格既世界地圖花紙，痴喺廁紙筒既外圍做裝飾。

我照住教學，將鋁箔紙摺成五角柱體，放入廁紙筒內。

Stephanie將珠仔、衫鈕、乾花碎都放喺玻璃蓋裡面，再用膠紙固定。

唔洗十分鐘，DIY萬花筒就完成。

「嘩，原來真係咁容易整。」Stephanie拎住個萬花筒玩，好似個小朋友咁：「好靚呀！」

「又真係幾靚，俾個正評你啦。」



「送俾你啦！」

「唔洗啦，你鐘意咪拎上去，俾我做咩。」

「放喺你度先，陣間俾Felix佢地睇。」

「哦，咁你鐘意啦。」

「唔準整唔見嫁。」

「你知我間房無乜保安，我唔排除會俾人偷咗去。」

「你試過俾人偷野？」Stephanie問。



「無呀，我係偷人野果個。」

「你咁有錢，仲偷D咩？」

「偷心。」

Stephanie紅都面晒：「唔想理你。」

「我返房沖涼先。拜拜。」嚇到佢即刻走咗，Sosad。

等咗一日，就係為咗見佢呢幾個字。

我望住Stephanie遺留既萬花筒，彷彿佢個人仲喺度。

心靈覺得滿足了。