一個書生既Player故事: 二八四
不歡而散既對話、失眠既夜晚。
訓醒已經係十二個鐘頭後既晚上，感到頭痛痛的。
唔知點解返酒吧果陣就算飲咗酒，都唔會訓到第二朝既夜晚，頂多兩點就會醒。
相比之下住Hall夜晚都係hea hea下，無做啲體力勞動既野，但成日都會好攰，個人混混愕愕，可能身體真係差咗。（唔會咁快有性病呀嘛？）
夜晚七點，喺我仲賴緊床禁緊電話既時候，有人推門而入。
「林書生，你仲未起身？快D刷牙出黎食飯啦！」突然有把女聲嘈醒我。
我轉頭一望，原來係對面房既Carmen。
「食咩呀？」我問佢。
「我同Mandy煮緊野食，預埋你地啦。」
「Oh so good。」我即刻起身刷牙。訓咗咁耐，咩都夠皮啦。
我一出去，Carmen、Mandy、CK、Hailey、Felix都喺廚房好忙碌咁煮緊今晚既大餐。正確黎講，係得Carmen同Felix喺度煮野食，其他人就坐喺Sofa度等開飯。
土匪雞翼、煎釀三寶、芝士焗西蘭花，仲有蘿蔔蟲草花湯，估唔到都煮得有板有眼。
「嘩，乜今晚咁豐富呀。」我話。
「多得Carmen，我地先有咁多好野食！」Mandy話。
「睇唔出Carmen平時姐手姐腳，原來煮野食咁叻，第時一定係個好老婆。」我稱讚Carmen。
「邊。。邊係呢，咁誇張。」唔知Carmen係太專心舀飯定怕醜，佢都唔望住我既。睇黎平時無乜人讚佢，咁都會怕醜。
「女人識煮野食好緊要！」我話。
「我認同呀，唔識煮野食，娶返屋企做乜。」CK認同。
「你娶個老婆返黎當工人嫁咩？老婆緊係要黎錫。我請個工人返黎煮咪得！」Felix話。
「首先你要有錢。」Mandy話。
「無錢既話。。咁我咪個工人囉，喊出黎。」Felix話。
「我都好想有個Felix咁既男朋友。」我話。
突然間，我竟然見到Stephanie出現喺我地既Common。
佢依然係果個有氣質又無乜表情既樣子。
Stephanie無同我地打招呼，自己就走咗去廚櫃既位置搵野。
Cool到就算喺Hall撞多幾次，我唔會敢主動撩佢傾計，因為你係Feel到佢完全唔想同你有交流。
「你搵緊咩呀？」Felix坐喺食飯枱度主動問Stephanie。
「唔好意思，請問你地有無電飯煲？」Stephanie超級有禮貌。
「用緊。」Felix指住我地枱上面既飯煲。
「仲有無多一個？我地層果個有人用緊。」Hall Common既資源係好有限，通常都要搶；一係就會用私伙野，所以經常都有喺樓層之間借野（有時無回頭）既情況出現。
「你等等，我地舀晒D飯咪可以借俾你用。」Felix趕緊舀晒飯煲剩餘既飯落一個大碗度，好熱情阿，唔知仲以為你對Stephanie有意思。
「哎呀，唔洗咁麻煩，我上九樓再睇下啦。」
「唔麻煩。」Felix舀完就去洗手盤度洗煲，再俾Stephanie。
「我用完會盡快還返俾你嫁啦。」
「得啦，信你啦。借野唔洗寫借據嫁喎。」Felix邀請Stephanie：「我地仲煮咗糖水，晏D上黎一齊食啦。」
「今晚恐怕唔得啦，我同男朋友一齊～」
「叫埋你男朋友一齊上黎食囉，我都識佢。」我插嘴。
「佢唔鐘意我同其他男仔玩，哈哈～有機會再一齊玩啦。」
「我返落去先啦，拜拜～」唔講野以為Stephanie好Cool，可能只係怕生唔敢講野，佢都幾Nice呀。
「Felix你係咪冧Stephanie？係咁撩人地講野。」Mandy好奇問Felix。
「傻啦，係我Roomate成日都話Step好正好想識佢咋嘛～」Felix正氣地回答，我唔會質疑Felix，只要佢講既我都相信。
「唉，Wade知道佢錯過咗認識Stephanie既機會一定好心痛！」我話。
「下次見到再叫Stephanie一齊玩先得！」
「要啦！」我都好想呢一日會出現。不過乖乖女既Stephanie會痴埋我地呢班痴線佬玩咩。
「喂呀唔好掛住講Stephanie啦。我份功課要開始拍，不如你地幫下我手啦。」Mandy話，佢係讀Creative Media的。
「你想點幫？」Hailey問Mandy。
「我搵緊男女主角呀。！」
「唔好望住我。。我唔可以對鏡頭。。」Carmen立即耍手另頭拒絕。
「CK呢？」Felix問。
「我地同班，我自己都要拍。」CK話。
Hailey好爽快咁應承：「我幫你拍啦，不過你幫返我拍Hall既宣傳片。」
「好，就咁話啦。」
「Casting都唔洗！？」我問Mandy，通常D CM人會好認人搞試鏡去揀主角。
「信得過Hailey。其實唔洗做D咩，我條片係講下時下年輕人對愛情美好既幻想。」
「咁男主角？。。」Carmen問。
「Felix不如你幫我做Hall宣傳片男主角，咁書生你就同我一齊拍Mandy條功課片？」Hailey提議。
「Um...」我無拍過片，有D擔心自己既表現，不過即然係好玩既事，應該去嘗試下：「好呀。」
「哈哈，正呀！其實Hall條片過多幾個月O Camp前拍就得，唔洗咁早。」
「陣間睇下個劇本先！」突然間多咗個Project，好興奮呀。