一個書生既Player故事: 二五一

呢十日我做咗真男人，挑戰自己既極限，都唔知點解做男人要做到隻狗咁。

由第一日食早餐果朝開始，我將手機個Touch ID改走，就再無提起過果件事。

我死忍爛忍，無論Michelle幾西，要我幫佢影幾多千張相、等佢化幾系耐妝、講啲幾港女幾黑人憎既說話，我都忍住講粗口既衝動，去搞笑、哄佢開心，最嬲果陣我不過無無視佢姐。我覺得打完Michelle依個大佬之後，唔會再有一個女仔可以難倒我。

好啦，呻完啦，講返啲開心野先。

我同Michelle去環島遊，雷克雅未克 、黑沙灘、冰河湖、鑽石冰沙灘、藍冰洞、黃金圈、Kerio、Skaftafell、Hofn。。



冰島既每一個地方都係大自然既鬼斧神工，集齊晒冰谷、冰川、峽灣、火山，喺咁宏偉壯麗既景色面前，更突顯我地既渺小，彷彿什麼煩惱都通通忘掉（Michelle唔講野煩到我果陣）。

可惜既係，咁多日我地都無成功睇到極光。

已經到咗旅程既尾聲，我地由米湖去高莎瀑布既旅遊巴車程途中。

「嘩～好多羊呀～」Michelle指住馬路上面既羊。

冰島馬路上經常見到羊仔同埋馬仔。



Michelle同導遊Request落去影相，導遊好好人又真係喺空無一人既馬路停底俾我地自由活動，總算有啲好既貢獻。

喺冰島既每一刻都令我好Surprise，因為你隨時唔知道下一秒會見到啲咩，發生啲咩事。

「睇咗天氣報告、雲層覆蓋同埋極光指數，今晚應該都睇唔到極光了。」做足資料搜集既我同Michelle講。

「啋過你把死人口，得返一晚，我地一定會睇到！」

「哦。」我心諗，呢啲係好客觀既指數。



「睇唔到，你請我去多次囉～」Michelle已經原形畢露，講野毫不客氣地老馮。

「好，實請你嫁。」我話。

「準備暴風雨啦！快啲上車啦！」導遊走黎提醒我地。

「天氣報告明明話天氣好好，睇多陣先啦。。」Michelle扭晒計唔肯上車。

「Never trust forecast! Come!」導遊話。

每一個導遊都同我地咁講。

啱既，前幾日天氣報告夠話睇到極光既機會極高，我地咪一樣睇唔到。

冰島既天氣實在太千變萬化，一陣間就落大雨，又一陣間好似打風咁吹到成個人都郁，前幾日我已經領教過兵島，唔係，冰島既天氣。



所以當地人都咁講，我一定會相信快快上車。

說時遲，那時快，暴風雨係幾秒之間出現，我整個人都被吹濕。

「屌！我都知中伏嫁啦！又唔上車！係咪呢，而家淋到濕晒！」淋濕晒既我終於忍唔住爆啦。

「你估我叫個天落雨嫁？舊雲係咁遠！點知佢咁快飄到過黎姐！」

「仲諗住今日可以全身乾爽咁走嫁嘛！」我話。

「咁你下次咪自己上車先囉！」

「我自己上車你咪又發晒老脾。」Sorry，唔會再有下次。



「唔會囉！唔好老屈我！」

「我都係擔心你淋病姐！有錯咩！」我拋出一句絕殺，今次仲唔係我贏？

「咁都唔洗咁惡嫁！總之就係你唔啱！」

總之就係你唔啱。。

總之就係你唔啱。。

總之就係你唔啱。。

有回音的。。

屌，做男人真係好慘，佢差在未講我出世已經係一個令地球滅亡既錯誤。



到底我前世做錯咗啲咩先要俾Michelle咁樣糟質。

「。。。」

「嘩！你睇下！係北極光！」導遊喺旅遊巴度指住個天大叫：「你地今日真係好彩！」

「wow～～好靚呀～～」

「Finally！！」我開始聽到遊客們既感嘆。

說時遲，那時快，我望出窗外，望咗好多秒先睇到果道北極光。

肉眼睇並無好似睇相中咁明顯，頂多只有四分一既綠度。



北極光好似打機放完催淚彈有一陣顏色既空氣層咁，好迷幻。

所以冰島係極光帶既好處，就係唔洗特登去邊，就算你喺首都雷克雅未克，行行下街都有可能見到極光。

原來北極光係咁既樣。

成功睇到北極光，呢個冰島之旅總算完滿。

 「知唔知，睇到極光既人會一世幸福？」Michelle突然話：「要許個願。」

我真係要許願啦！脫離Michelle一世幸福，保平安！

「許許許許許。。」我發癲了。

就係咁，我將北極光拍底。

返酒店執野，又搭返十幾個鐘既飛機返香港。

Let bygones be bygones.

歐洲既回憶，無論是好是壞，都留返喺果度。

返到香港，又係全新既林書生。

Hong Kong I am back!