一個書生既Player故事: 二三二

我打電話俾Wade：「喂～你今日有無野搞？」

「緊～係無啦～」Wade用一個搞Gag既語氣去回答我。

「我啱啱落堂，過黎搵你Hea？」

「OK，等你。」

Wade Whatspp咗佢喺Rotterdam既地址俾我。



一Google先知原來要坐一個鐘頭九個字既地鐵先可以去到，仲遠過我坐大半個鐘巴士去漁村Volendam。

醒目都係帶多套衫去替換，晏既話留埋喺佢度訓埋。

我：【Will arrive in 20 min】
Wade：【OK. 】

「 我到啦，而家係HEMA。」我打電話俾Wade。

「得，你喺果度等我。」



其實我同Wade只係Exchange Talk度見過一次，之後都好少傾計。

但果次既見面我覺得佢都份人都幾On9，應該啱玩。

Wade今日著住「HEAT 3」既灰色衛衣，果然係一個不折不扣既D Wade Fans。

「屌，開咗學咁耐先黎搵我。」Wade一黎就話。

「屌，你黎搵我唔好。」



「唉，我地唔好講呢D。」

戇戇鳩鳩咁我同Wade好快就熟悉咗。

黎咗荷蘭咁耐，第一次去咁現代既地方。

一出地鐵站，有一排菱形係半空突咗出黎既建築物，係Rotterdam既地標叫方塊屋。

穿過方塊屋，經過小港灣既大橋散步，一路以黎見到既建築物都係咁奇怪，有三角形尖頂既樓、有似金字塔斜上既白色建築物，旁邊有幾條黃色大水管，原來係圖書館。仲有飛碟設計既Blaak車站。

Wade帶咗我去附近一個週末市集，周圍都係人，瞬間好似去咗銅鑼灣咁，可能因為地方較細，感覺仲多人過Amsterdam市中心得多。

賣花、日用品、古墓、藝術品、首飾、芝士、水果、海鮮等等無論乜野類型都有。



「買埋餸今晚返宿舍煮。」Wade話。

食下街邊既炸魚小食，我地買咗好多芝士、牛扒、小薯仔、小蕃茄、西蘭花、紅蘿蔔、法國面包、蘋果。

都算豐盛又健康。

「我以為荷蘭人上堂會好專心，原來唔係。」我同Wade講起呢兩個禮拜既所見所聞。

「係咩，我D同學上堂好撚專心喎，搞到我有D唔自在。」

「走堂囉。」

「咁又唔好，要體驗當地文化嘛。」Wade話：「我D同學上堂好專心唔講野，但搞笑既係，當我落堂同D同學傾計，佢地話對考試好唔重視，Present唔小心講粗口無問題，有D人甚至會因為溫唔切書而推遲考試，甚至缺席。」

「搞笑。」反觀我地香港，上堂唔專心，但好重視考試。咁樣叫係重視學習知識多過考試？



「你係讀咩科？」我問Wade。

「SEM（Engineering in Systems Engineering and Management）」

「哦。咁即係讀D咩嫁？」總之講完我都唔知係乜野既Engine科目：「我讀E&F。」

「TQE。。中文係全質量工程。。Research野多。。」

「算啦，我放棄。」

「BBA撚係唔會明我地N展野嫁啦。」

「好正常呀，你都唔識BBA野啦。」



「識，Econ同Finance囉。」

「妖，咁我夠識N展野啦。咪Engine同Engine囉。」

「唔係，係毒男同毒男。」

「真係得咁少女？」

「細科一班得果40幾人，女已經得果唔夠五個，仲要N展科D女都唔係女黎既。」

「慘。本人表示深表同情。」

未曾讀過男校既我完全想像唔到有幾Dry。

不過我唔會有呢個問題，想食女放學去識人都好易。



「如果我地班有個正囡囡仲唔搵碌鳩狠狠地Fit爆佢。」Wade瞬間變咗個大毒男。

「哦，好呀，記得大力D fit到佢塊面紅晒。」我笑話。我覺得Wade都係講就兇狠，做就碌撚既性格。

買齊晒野，都行得七七八八。

「呢度離我宿舍都要行半個鐘，我同你去租架單車過去啦。」

「好呀。」Wade講完就帶咗我去附近一兩條較冷清既街。