一個書生既Player故事: 二二九

送完Michelle機，我就坐車返宿舍。
 
拍拖後先交換Fb同Ig呢個做法，都幾易中伏。感受佢喺你面前既片面，一定唔及瞭解埋佢既朋友圈來得有用。
 
雖然話細個同而家可以好唔同，或多或少都表現到佢係一個點既人，由其是佢係經常Upload野既女仔，有好多Cue，我決定要做福爾摩斯好好去瞭解一下 Michelle。
 
我喺地鐵度打開Michelle既Instagram。

「Love is not about how many days, weeks or months you’ve been together, it’s all about how much you love each other every day.」
 


仲係偷拍同我既拖手照。

WTF？我差D口水都噴埋出黎。

呢個女仔真係好病態，Po相Po到上咗腦？叫做一齊幾日都要Po？

好彩無Tag到我，我真係唔想承認呢個人係我女朋友，仲要由我親自講出口。

Michelle既Ig以黑白灰色為主調，同一般IG女神一樣，主要係貼D炫富既日常，Chill chill既酒吧飲野、去酒店High tea、去Shopping買名牌袋係指定動作，再配返唔知喺邊度抄出黎既名句。



藝術角度黎睇係幾靚既。

只係感覺好虛偽。

成一千張相，我都無咁好精力慢慢睇到底。


Facebook既話，Michelle已經近乎棄用，好耐都唔更新一次，大概佢都係想睇下我Profile先至話Add埋我Fb。

我善用Fb既起底功能，一野睇返五六年前開始既Feed。



中三既Michelle仲係好青澀，著住灰色校裙，眼睛腫腫，齊陰曲髮，用害羞既笑容喺運動會度同一個高佢一個頭既男仔合照。下面係一堆留言：「Wow~~~Sweet~~~~」

打扮MK，神情卻清純得可以。

比起女神樣戰鬥格要扮到好有錢好有內涵既形象，我覺得依個先係真正既Michelle。

無可否認，香港男仔都對MK妹有情意結，總有MK妹既回憶喺你個腦入面。

MK妹就是奇怪打扮，口裡說拜金愛名牌卻對愛不顧一切既傻女仔。

我認識既人最MK果個，一定係丁丁啦。

第時00後長大，可能又會對富家女、韓風、偽文青打扮有情意結。




好快News Feed跳到去半年後，果個男仔同Michelle喺班房Back hug，一班同學喺課室買晒禮物，慶祝生日既相。睇黎Michelle中學既時候，已經略有人氣。

又過咗幾個月，Michelle Fb上面，全部都Share d感性文章，什麼單身也能過得好好的，不愛你的男人，就像不合穿的鞋子一樣，必須丟。

分手係Michelle人生重要既轉捩點，佢改變咗自己好多，大執打扮，化濃妝，染髮，打扮開始性感，眼神都變得不再清澈， 藏著一點心事。

Michelle都曾經不顧一切去愛過一個人吧。

盲目付出了愛，卻總是得不到想要的回應。

兩年後佢再次拍拖，今次都係一個高既男仔，到升咗大學就分手。

入大學後再拍過兩次，以一兩張帶點曖昧同埋肉麻既插旗留言、再以傷心失戀既句子同歌曲來區分。



或者佢已經拍拖到麻木，不過是一個稱謂而已，到最後都會分手。

其他都係Ig入面搵到既資訊，無咩特別。

喺Fb上面，連我在內既話，大約睇到佢既戀愛史係最少O5。

到底Michelle真係乜都擺上網，定有更加多無人知道既秘密呢？SP呢？

唔知道Michelle心入面，仲有無呢幾個男仔既存在呢？

佢會覺得係一生最痛苦既回憶，唔想記起，寧願一切無發生過；定係心存感恩，內心永遠都留一個位置俾佢既前度呢？

這是我對Michelle最好奇的地方，疑問也愈來愈多。

從Fb認識了Michelle，突然覺我唔再覺得Michelle係一個黑人憎既港女，佢只係一個受過傷既普通女仔。