一個書生既Player故事: 一八八

我一個禮拜返酒吧四日。日頭有堂我就會去上，落堂Hea陣就去打工。唔洗返工既日子就係屋企溫下書，準備考車筆試。

聽從屋企既建議，偶爾會睇下屋企人買既哲學書、投資書去增值自己。返工無野做既時候，我會亂諗好多無謂野，例如思考人生意義、思考上帝可否創造一塊佢舉唔起既石頭、思考道德係咪一個相對既觀念、思考點解香港禁毒但係又容許飲酒食煙，都幾忙碌。

我無暇去理會江柏琪過成點。偶爾係Ig會見到佢Upload同朋友一齊去玩既相，好像過得不錯。
呢一刻我係酒吧部返緊工，係Ig睇到，原來江柏琪同D同學仔北上去咗深圳玩，年輕就是好。

叫我去玩，我除咗食女、落老蘭飲下酒，我真係無乜特別既興趣，都係做野多。

有時覺得，林書生既生活都幾無聊。




有時我會好奇一個正常大學生既生活到底係點。

班上既港女同學，好有精力，成日都周圍去打卡影相。佢地為咗曬命會去唔屬於佢地級別既地方，例如酒店High tea，著下禮服扮晒Model上菜。我識得一個女仔，明明屋企好有錢，上大學俾咗十萬蚊佢做獎勵，一年飛十幾次都唔夠，用晒夠膽死問屋企攞錢，唔俾就發老脾。

無乜技能既佢，為咗賺快錢去旅行而做Ptgf。會知道係因為網上好多正義既巴打將相片公諸於世，到底地下世界既秩序不該去打擾，還是放出黎等男仔搵女友時小心提放更好，我無咩意見，最緊要係事實而唔係借刀。

著衫望落好光鮮，但其實係月光族。上堂專門收D毒撚做兵，俾D甜頭就要人地幫佢做功課、抄Note。呢種女仔我就最睇唔過眼。唔係果個級數既人硬又要扮自己係上流社會，連基本英文都文法不通，書都唔睇多幾本，歷史政治不會去講，淨係識追星，毫無內涵。幸好我身邊並無呢啲咁極端既朋友。



我係酒吧都見過一個女人，成日都會落黎飲野，每次身旁既男伴都唔同。個女人就經常撒嬌要男人買野俾佢，都係Iphone、名牌手袋、鞋等等既野。有時好想玩野同佢講：咦，又係你呀？乜你次次黎都帶住唔同既仔既？其實你係ptgf定係公廁呢？現實當然我唔會出聲。

一心諗住靠男人過世既女人毫無靈魂，只剩下依附別人既人生而活，我最討厭。偏偏更多男人願意去供養呢班女人，因為佢地有天使一樣既外表，有供有求，造成惡性循環。


反觀有D同學，Year 1已經目標明確，知道自己未來Career點樣去發展，積極參與唔同既活動去擴展人脈，甚至組隊參加創業比賽，屢獲殊榮。聽聞佢Sem A靠自己方法，已經賺到人生第一個十萬。佢地既人生係幾咁有目標同抱負。


都有啲同學，好似我咁，入咗大學又受過情傷，性情大變，終日以食女為樂，混混沌沌。有功課就做，有試就去考，過著不過不失，不知生命為何物，等待真愛既出現既生活。



但一樣有專心讀書，相信讀書就會有好既未來，忽略好多人際交往，或者係大學可以嘗試既活動。我希望佢地既人生可以好似想像中咁順利。不過我覺得，早啲見識世界既現實，點都好過遲。係搵到真愛前遇到仆街只係遲同早既事。

到底邊種方式先係最好？我唔知道。