一個書生既Player故事: 一五七

開咗學兩個禮拜之後既某一晚，江柏琪用認真既語氣同我講咗一件事，就係：「我有Hall住啦。」

又話Hall要抽籤好難住，點解江柏琪咁好彩第一個Sem就抽得中！（可能因為佢間屋細又住得遠啦）

點解個天要咁忍心捧打鴛鴦？

個天會話俾你聽：之前俾機會你地同居已經你賺咗，你應該感恩，唔好咁不知好歹。

當你真心想安定落黎，總係會出現重重考驗。



雖然之前佢講Reg Hall，同埋知道屋企人年尾會返黎我都有心理準備，但當依件事真真正正發生，都係令我好激動，但現實既我無能力，都無任何理由去說服佢為咗我唔住hall留底，無錯，總有一個期限，唔通我要限制住佢係大學既發展咩？我未至於專制到連Hall都唔俾自己鐘意既女仔去住吧，更何況，你有咩權力咁做？

我努力控制臉上既表情，但我知好勉強，阻擋唔到失落既眼神。

「哦。」我只輕輕說了這一句。

反正從頭到尾我都不曾有過選擇既權利。

「我交咗錢啦，聽日再始執野返屋企同返Hall。」



一切都係佢既計劃之內。

「哦。」

「你。。無野講啦？」江柏琪問。

「有咩好講。。你有野想講？」

「無阿。。我以為你會好唔捨得我，叫我唔好走。」



「咁都Firm咗改變唔到，唔通我叫你唔好住咩？我又唔係你邊個。」

「我想講，林書生，多謝你。我會好好記住呢兩年幾一齊住既日子。我地經歷咗好多生活上既大小事，每日一齊食飯、Hea、同朋友玩、學結他、溫書、考CE、AL，連病咗都係你睇住我。同你一齊住之後改變咗我太多，由每日都因為屋企好唔開心，搞到個人負能量唔識同人相處俾人排擠，變到個人開心咗好多，識得感恩同享受生活，分享自己真正既感受，認識到朋友。而且我知道無論咩時候都有你支持我，呢種感覺只有你俾到我，我真係好幸運，好衷心多謝你，將來有朝一日，我會報答你，無論你有咩事，唔開心，搵我一定會即刻出現支持你，直到永遠！」

我從不知道江柏琪因為我而改變咗咁多。

事實上自從認識佢，我都改變咗好多。

我再無想周圍玩同食女，我每日只想早D返屋企可以見到江柏琪。

我學識咗點樣去照顧一個女仔，點樣對一個人好而唔係消耗佢。

我更加努力上進，讀書、學音樂，希望提升自己配得起佢，可以做一個男人教佢野。

或許人與人之間既Chemistry總係微妙而難以發現的。



你控制唔到，改變既時候都唔會發現，但這是事實。

「我都多謝你，陪咗我咁耐，等我唔洗一個人獨居抑鬱，又每日有好野食。」

仲要多謝你，令到我而家咁傷心。。

我真係好想喊。。

你唔好走得唔得。。

兩年以來既感情就係換來一句「多謝」。

多謝。



多謝。

多謝。

我可唔可以拒絕你既多謝？