一個書生既Player故事: 一三六

經歷過公開試既人對呢段「生活」一定好有共鳴。
 
倒數公開試既日子辛苦又漫長。
 
雖然係我地學校原校升讀既學生，留得底基本上有九成都入到大學，不過對於未來依然係好恐懼，無人敢寫包單係咪真係入到大學嫁嘛！
 
我地班房有Count down日子寫咗係黑板度。
 
由356日、到300日、200日、100日、50日。。。
 


每日都希望令人厭惡既考試快D完結，同時你又唔想呢一日咁快到，因為，頂，點解D書 topic得咁多，但永遠都有野錯，永遠都溫唔完。
 
每日既生活，由朝溫書或者操卷到黑，熱血得黎又大壓力，真係好辛苦。
 
到後來上堂，有D同學仲會太大壓力好敏感，無啦啦失控喊，原因係驚入唔到大學。
 
我地就香港學制底下既學生，被灌輸「入唔到大學，人生就Game Over」既觀念。
 
只係識得讀書，但唔會諗其實一年只有約Top 15%既學生入到大學，咁剩底既85%學生去晒邊，唔通真係咁多人人生已完咩？
 


我唔知道佢地既生活點過，唔夠膽相信真係行行出狀員，唔相信自己既能力。
 
唔明點解要咁樣，但我只知道我地一定要入到大學。
 
唔明點解做人要咁辛苦讀書，唔明白咁樣既人生有乜野意義。
 
係香港做學生真係慘。
 
如果第時生仔，我一定唔會係香港生，唔想佢經歷咁無聊既野。
 


讀書應該係去玩，去學思考、社交、為未來工作做準備，而唔係學操卷。
 
但叫我真係走，我又未必可以咁瀟洒做到。
 
香港始終於係我既屋企。
 
 
「加油！」
 
「Yoo too. Good Luck.」
 
踏入考場前，我Whatsapp俾我d好朋友們同佢地打氣。
 
未知道結果如何，但我已竭盡所能，無悔。