一個書生既Player故事: 五十四

「唉。」肥傑打打下波係度唉。

「唉。」我打打下波都係度唉。

「唉，你兩條友係度唉乜鳩。」羅嘉樂開始頂我地唔順。

「林書生，你唔係好事近咩？做乜係度唉。」

「唔講我啦。講下肥傑啦，做乜唉呀，有新Target？」我一個乾坤挪移瀉咗落肥傑度。



「我最近追緊一個女仔。」

「下？我地識嫁？」我問。原來係我同溫梓柔發展緊既同事，肥傑都開始咗佢既故事。

「唔識喎。」肥傑校外都識唔少人，係都唔奇既。

「發展成點先？拖到手未呀？」羅嘉樂問。

「我會同佢傾電話，日日SMS，有時放學會去街一齊食野，我覺得佢都鐘意我嫁。」



「咁都無乜野姐。」一年前對感情事毫不熱衷，仲係白紙要搵無拍過拖既肥傑做愛情顧問既我，竟然開始俾意見佢。

「我feel到佢最近唔開心，又突然冷淡晒唔係好理我。」其實可能無熱情過，係你自己太多幻想姐。你鐘意佢果陣，就會有個錯覺，人地做少少正常野會覺得人地都鐘意你。

「點解會咁？」羅嘉樂問。

「我都唔知，無啦啦就咁。佢話過我減咗肥一定係靚仔。我為咗佢先咁努力嫁咋！」 事出必有因，原來因爲佢講先咁努力，愛情既威力真係大。

「如果要你減咗肥先鐘意你，咁佢都唔係真係鐘意你姐！」我王家欣上身咁話。



邊會因為唔開心而唔理你丫，係理你既，幾時都會理你啦。唔洗聽佢講D乜，我覺得肥傑失敗既機率好大。

「咁又唔係，Things come in a package. 如果林敏兒係個好樣衰既肥婆，你根本唔會主動去識佢，仲要同佢拍拖喎！外表係好重要嫁。」羅嘉樂貫切佢既理論。

「我信佢鐘意我嫁！係呢排唔開心姐。我要諗下計哄佢開心。」

「我上次送過自己摺既玫瑰花俾佢，佢好開心咁收咗話多謝。」肥傑繼續。

「佢話想食果樣零食，我即刻衝去tuck shop去買俾佢。」

「我知你做左好多野啦，咁佢呢？」好似王家欣當日問我咁。

我又為溫梓柔做過啲咩？

「好似無。。但見到佢開心，我已經好開心。」當你鐘意一個人，只要可以為佢付出，已經係一種福氣，仲邊會講要求佢啲咩。



「我唔講野啦，你加油啦。」見佢發晒姣咁既樣，我都廢時出聲。

「你唔熟佢份人係點姐！」佢見我唔睇好，即刻反駁。

「你話係就係啦。追到再同我講。」我話。

你自己知嫁，自己都講咗個問題出黎。

人類總愛自欺欺人。