一個書生既Player故事: 三十六

我地差唔多時間放學，就約左係中途既地鐵站等再一齊搭去旺角。

一見到對方，我地都有D怕醜係度傻笑。



經過琴日一事，我儲夠左足夠既勇氣主動拖住佢隻手。

林敏兒都好乖巧咁俾我拖住。



「琴日仲牙斬斬咁，今日做乜咁靜～」我話。

「咩呀。。無囉～～」

「明明就有～～」

「無呀～～」

「有呀～～」我搵手指輕輕篤住佢個鼻：「明明就有。」



「笑人既你。。。」林敏兒紅都臉晒咁，超好玩。

雖然斯文既林敏兒都好吸引，不過我最鐘意都係林敏兒表情多多，好大反應，俾我玩發脾氣串串貢既樣，活潑可愛！

戀愛既威力實在不容忽視。我地好煩好嗲咁講足全程BB話，呢幾個鐘都唔知講左D乜。智商瞬間趺到落50既水平，我終於明白電視劇D人一拍拖就會變左個低能既感覺。因為當你鐘意一個人，你既世界就只得佢；而大家鐘意對方，就係最幸運既事，其他野係點，根本睇唔到。啊，好幸福。

「你想要邊隻呀？彩色果隻？」我問林敏兒。

其實我真係睇唔出呢隻手仔咁大既旺角花有乜咁吸引，又唔靚，D料又普通，要成百幾蚊一舊。



「不如我地買個情侶花花。我要粉色紅果隻，你就要藍色果隻。少D人用又無咁易撞。」林敏兒指住個隻旺角花提議。

「好呀。」

我係銀包入面拎左三舊水出黎，好有型咁俾左錢。查實三舊水買呢兩舊野我真係有D肉赤。。。

不過林敏兒講到，無奶油唔買既。





「唔影呀。。。影貼紙相係女仔野。。。」我係貼紙相機入面垂死爭扎，隻手仲係拖住林敏兒唔放。

「嗚。。點解呀。。我喊嫁啦。。」



「你，應承做我女朋友，我就同你影啦。」我終於講到出口啦！

「我隻手都俾你拖咁耐。。。你話我應唔應承呀！！？？」林敏兒沒好氣咁話。

「咁今日就係我地既拍拖紀念日啦。」

「3、2、1。咔唰。」

我係背後攬住林敏兒，錫住佢面豬登影左呢張相。

10月15日，我應該呢世都唔會忘記呢個日子。

對我而言係幾咁有意義。