一個書生既Player故事: 二十九

我好唔開心咁渡過左呢個晚上，偷偷地匿埋黎床度喊。

但日子都係要過。第二日就開始我忙碌既中學生涯。

我比上堂時間早左十五分鐘返到去，班上已經坐滿一大半既同學。

「早晨。」返到位，我同旁邊既溫梓柔講。

「早晨。」佢微笑住咁回應我。



然後我倆既空氣陷入冰冷之中。。。

我討厭呢種尷尬既氣氛，所以我主動搵野同佢講：「溫梓柔，你本手冊包得咁靚既。仲包得靚過我呀媽。」

「係呀。琴日Mrs. Lee話叫我地包嫁嘛。」

「又好似係喎。我都唔記得左。」琴日先派既手冊，我都未得閒搵包書膠包返。

「我有帶到捲包書膠返黎。不如我幫你包啦？」溫梓柔好好人，講完就係書包度攞左卷磨沙包書膠出黎。



我呢D粗男人，手工野真係唔岩我，仲幫我包埋，我緊係求之不得：「好呀。唔該你。」

溫柔既女仔照顧人的確係幾吸引。當下覺得佢正咗，加分加分。



上堂果陣，我望住本教科書係度發呆。

其實溫柔既女仔都有好多，唔一定係得林敏兒姐，你睇下格離個溫梓柔都係斯文溫柔type，咪同林敏兒差唔多。



更何況有時林敏兒都唔溫柔，脾氣差又惡死倫敦，轉個頭又同何諾軒係度打情罵俏，兩個姦夫淫婦！

一諗起就火都黎，無晒心情，林敏兒到底有咩好喎，唔好理佢啦。。



咪住，等陣間放學去唔去接林敏兒放學好呢？愈諗愈專心唔到。



溫梓柔：「欵。。」

我無留意到佢。

溫梓柔輕輕係我眼前揮手：「林書生。。」



我如夢初醒回答：「做咩？」

溫梓柔蚊子咁細聲咁話：「講到下一頁啦。」

「咦，係喎。唔該你。」我揭返去下一頁，準備發呆。

「你成日發呆嫁？見你個人成日都無乜反應咁。」溫梓柔問。

「我成日打機打到好夜訓，個人唔夠精神姐。」

「咁你要早啲訓啦，上堂成日發呆點得嫁。」又黎啦。唔知點解，啲乖女仔總係好鐘意同人講耶穌，去到邊都一樣～

「嗯。我會聽你話嫁啦。」突然間見到溫梓柔紅都面晒。竟然講句野咁都會怕醜。怕醜既位係邊度？明明我係叫緊你收皮唔好再講野，我睇唔透。