一個書生既Player故事: 二十六

「各位同學，大家好。今日係一個好高興既日子，因為久經一個暑假，終於都重返校園，可以見到咁多熟悉同埋簇新既面孔，唔知道你地有無好好利用呢段時間黎增值自己呢？物競天擇，適者生存，隨著時間既流逝，各位都向成為社會棟樑既目標一步一步邁進，就好似我地好多傑出既校友一樣，你地絕對有能力成為其一。新學期，希望各位一定要持之以恆，勤奮學習、多讀書、批判思考、多元發展。多謝各位。」留意返，以上係用英文講既。。

操場早會，校長說著一堆令人眼訓既演講，我試圖認真聽下，不過真係無聊又廢話到我無意慾聽落去。

全級一共有5班，每班35人。根據上次分班試既結果，我被分到1C班。代表住係級上我係屬於中等既水平，有待進步。


房班同桌椅都比以前更大更新淨。純白同淺藍既既牆身令人感覺舒服。

班主任叫Mrs. Lee，係一個年約50幾歲既短髮女人，身型偏瘦削，聲音沙啞，著住套Polo加半截及膝黑裙，吸睛度說不置予評。



我地上到課室就隨便坐，然後就係老掉牙既跟高矮掉位，最後每個人都要企起身自我介紹。

我被調左係近門口既第二行。

「我係1號陳詩詩。」細粒可愛型既一號同學有D尷尬講完，全場靜咗幾秒。

Mrs. Lee一呆，問：「下？講完嫁啦？」

陳詩詩：「係呀。」佢好似唔諗住講多句。



場面既老尷又搞笑。

Mrs. Lee：「陳同學呀，我地想了解你多D，你試下講多D介紹自己？例如我地可以點叫你，你邊間小學升上黎咁樣？」

陳詩詩免為其難咁講多幾句：「我係XX小學升上黎。大家可以叫我阿詩。」

全班同學都係一個忍笑既狀態，氣氛唔錯。

跟住其他同學都開始講多幾句：「Hello，我係羅嘉樂，大家都叫我寶馬山羅嘉良，最鐘意聽歲月的童話。」呢個羅嘉樂幾搞笑，有一對眼仔碌碌既笑眼，外表少少MK，係云云毒撚髮型入面，佢竟然留住一Pet斜陰，走在潮流既尖端，夠晒厚面皮，應該幾好玩，我想認識下佢。



「我係25號林書生，係YY小學度升上黎。如果羅同學係寶馬山羅嘉良，咁我一定係北角林志穎。我平時鐘意係屋企玩下Online game，例如跑Online咁，如果有同好可以搵我一齊玩嫁。」我故意拉埋落羅嘉樂度，R下Frd子。大家聽完我句咁唔知醜既說話，都笑左。

「我地好注重閱讀。林同學適時放鬆係好，但切記沉迷玩樂，閒時要多D睇課外書，增進知識呀。」Mrs. Lee笑住都不忘勸喻我。

「大家好，我係30號溫梓柔，係ZZ小學度升上黎既。」

呢個叫溫梓柔既女仔係我既新鄰居，正常樣，人如其名，係斯文悶騷型，一睇就知係個讀書悶撚。

「鈴鈴鈴鈴鈴。。。。」十一點，學校打鐘了。

「今日就去到呢度。聽日大家八點前返到黎就係班房等，唔洗集會嫁啦，學校逢禮拜一先集會。」

Mrs. Lee話：「Good bye class.」



眾人：「Good bye Mrs. Lee.」

我無野執，轉身就準備走。

我同鄰居溫梓柔對望左一眼，我主動同佢講野：「我走先啦。聽日見啦。」

溫梓柔對我微笑一下：「拜拜。」