一個書生既Player故事: 二

落堂返到屋企左諗右諗，腦海入面正係浮現林敏兒既樣，至於其他同學係點，我好似失左憶咁，真係一個名都唔記得。
我覺得林敏兒好特別。點特別法呀？我都唔識講，咪又係有眼耳口鼻，對比起同級D美極，林敏兒都算係個靚女既，總之就係吸引到我。
第二日鬧鐘一響我就即刻起到身返學。
年少氣盛既我好心急，諗住佢又無得見既時候，好似每等多一秒都係煎熬。
呢種感覺好奇怪，係我人生中都未試過出現。我姑且界定佢為電視劇口中既「一見鍾情」。

我一返到課室就偷左老師本點名簿。
我打開電話簿果一頁，入面寫晒全班同學既屋企號碼。
我極速抄左林敏兒既屋企電話落手冊度。
『咁我放左學掛住佢既時候就可以打俾佢啦。』我同自己講。



當我將點名簿放返係老師枱既時候，林敏兒就返左黎。
「早晨。」我忍唔住發晒姣笑住同佢打招呼。
「早晨。做咩笑笑口既？有咩開心事呀？」會主動同我傾計，睇黎林敏兒都算係一個健談既人，唔似得其他女仔咁高竇怕醜。
我回答：「無呀。」開心係因為我偷偷地抄左你牌，咁放學諗起你就可以打電話搵你，聽到你把聲。
其實對於見過一次既女仔就咁上心，我係咪有少少變態？
「傻傻地既。」林敏兒話。
「你至係。」咩都唔知，好蠢呀你。

好快，咁就過左一個月。講就把炮，做就碌Jer咁，我始終都係唔夠膽打俾佢，因為唔知搵咩做藉口。


經過呢個月既觀察，我發現林敏兒係一個真乖女。
林敏兒把聲幾溫柔，講野既Tone係帶點天真嬌傻更更咁。
林敏兒成日笑，份人樂觀開朗又健談，係偶爾有D公主脾氣，鐘意點人做野，會串下你講下笑咁，女仔之家都算好玩。
林敏兒上堂會好專心咁抄Note。老師問問題Dead air果陣，坐前排既佢通常會好善良咁答老師既問題。
林敏兒屬於唔聰明但勤力既學生，通常計數佢都唔撚識，我呢個數學撚呢一年應該可以大顯神威教幫佢study下數學。
林敏兒左手手背度有一粒墨，我上網查左判定佢係一粒桃花墨！呢個女仔原來骨子裡已經係一個水性陽花！
林敏兒好鐘意飲冰紅茶（Ice果隻），日日第一個小息都見佢買黎飲。
林敏兒有個死黨叫王家欣，正常女仔樣，發育得算早，高我半個頭，成日串我地D矮過佢既男仔。佢係班上少數有胸部既女同學，透住個白色Bra露晒底，女仔之家咁樣成何體統。有胸既女仔真係好核突，同埋令到人好尷尬，都唔知望佢邊度好。

班上都有幾個男仔成日借D意搵佢撩林敏兒傾計，佢都會有禮貌咁理佢地，我一眼睇得出佢地對林敏兒同我一樣係有意思。


起初我地大家傾計都小心奕奕，好有禮貌，講野都有D見外。慢慢大家既真性情都表現晒出黎，我按捺不住成日撩佢傾計、煩住佢，佢都會港女發作燥我底。
「林敏兒，我冇帶筆袋呀，你可唔可以借枝筆俾我呀？」起初既對話係咁。
「好呀，你拿去用啦。」林敏兒會笑笑口好有禮貌咁答我。
「唔該晒你呀！下次你唔記得帶野我一定會借返俾你嫁。」嗚呀，好假既肥仔，我覺得自己十足十小紅帽入面果隻狼咁邪惡。

一個月後既對話係咁：
「喂，借枝筆黎用下得唔得？」我用手指篤佢膊頭話。
「唔得。」扁咀呀你，好得意呀。扁咀乃林敏兒開始燥底既徵狀之一。
「點解呀？」點解唔俾我借！
「因為你好無禮貌，用手指篤到我好痛，借野仲要喂我。」喂，用手指篤下都叫無禮貌？你手臂用豆腐做架？
「問你借D野都咁串，咁見外嫁你。我問第二個借啦。」
「借囉，唔好問我。」

。。。我又估唔到你對我真係咁狠心，借枝筆都唔俾。
我既自尊心即時趺到落谷底。


唔知點落台既我唯有同坐後面既女同學「借」。
「喂林書生！做乜拿我枝筆。」女同學話。
「好快，寫兩隻字咋。借黎用一用喇。」我話。頂，乜家陣借枝筆都咁麻煩。你地D女仔就係咁嫁啦。試下係我地班最靚仔果個何諾軒（其中一個會搵林敏兒既男仔）黎借呀，你地班女仔仲唔對住佢汪汪咁叫，排隊借俾佢。
「你好黑人憎呀。敏敏，你唔好理佢啦！」點解D女人咁鐘意懶cute咁叫自己做疊字，家陣你係狗仔咩？改埋晒D狗名。
「同意！」呢兩個女仔對我同仇敵概。
做咩姐，借枝筆都要咁話人。話我黑人憎，不如話係你地小氣。都傻傻地既。
跟住佢地真係唔睬我。
『女仔係世上最小氣既生物。』－－林書生（小六）。