電腦無啦啦多左d唔知咩既檔案係度(上): 第三十六節

所以當我地落左山之後，我同suki就先坐車番番去旅館先
途中我係附近買左張電話卡，之前一直都用緊香港果張，漫遊肯定貴到痴線，話唔定成幾千蚊…聽到我講呢番肺腑之言，suki就一直係到恥笑我
番到去旅館已經係晚上既九點幾
肥康打左比suki，話佢已經影低左果幅圖，轉頭番黎會比我地睇
休息左陣，肥康都番左黎
佢一黎就比部手機我睇幅圖
「咦，好熟口面喎幅圖」我諗緊係邊見過
幅圖裏面係一幅風景畫，畫裏面有一尊大佛像，而我覺得熟口面係背後既風景…
「丫，我記得喇，係果條唔知咩江定河，同埋果座山!」
我好記得，打死我化左灰都一定認得，果座有豹既山…




「唔通同你出現係果座山既有關係?」肥康眉頭一緊
「有冇必要再去一趟果度?」我問肥康
「呢個可以容後再探討，但目前最緊急係搵bernando，如果我地可以搵到方法番番去未來，到時再慢慢研究都未遲…」
「咁我地依家就係咁樣等過去既我地黎西藏?」
「我地仲可以準備好多野既，例如買過d衫褲，你睇你丫，街市仔你件樓穿左好幾個窿喇，換過佢啦」
跟住呢一日我地主要都係休息，整頓同埋再仔細研究張圖有咩特別

直到8月11日…
終於黎到過去既我地踏入西藏一刻
我、肥康同suki三個人一早，而suki記憶無失去過，所以由佢帶路




按照過去我地出發既時間，由格爾木出發去到拉薩需要一日一夜既時間，suki好記得我地到左第二日既下畫兩點鐘黎到拉薩，亦係同外國人bernando分別既時候
黎到拉薩站，一見就見到一個好有特色既建築，但不免有幾浸大陸味，又係依山而建，車站裏面分三層，旅客就絡繹不絕人潮擁擁咁，仲加埋枝偉大既中國國旗係車站面前，當行入裏面，一黎就見到個電子牌寫住拉薩歡迎你，真係夠哂中國風味，周圍好容易見到有藍衫藍帽既工作人員，當中有幾個係睇落又幾pure幾true既姐姐仔
我地三個好快咁搵左個位坐低左，靜靜等候過去既我地出現
時間一點一滴流逝，肥康又不停對錶，我地三個都處於一個好緊張既狀態
大約兩點鐘，一個好假既肥仔、一個小毒男同一個女神級既人物出現左，冇錯，佢地就係過去既我地…
咪住?! 過去唔係四個人一齊黎既咩?呀樂去左邊到….
「大獲喇，會唔會歷史又改變左呀?」我驚恐的問
「冇理由嫁…我地睇定d先」肥康簡單回答
「我記憶裏面，我地四個就係係呢度同bernando分道揚鑣，但係…」suki好似唔敢相信自己雙眼
「一定有d野改變左…」肥康說道




係呢度，唔好講話見唔見到bernando，就連呀樂都唔見埋，到底發生咩事呢?
「唔好講咁多野住，我地依家拿拿林跟住佢地先，睇下發生左咩事啦」肥康招手叫我地跟蹤自己…
呢個情境其實都幾趣緻，竟然要自己跟蹤自己
我仲發現左自己睇自己既側面有幾分似吳彥祖，當我講左呢句說話既時候，肥康用一個好不屑既眼神望住我，suki就唔知點解冇啦啦搣左我一野…
其實我地一早已經有改變裝束同喬裝既打算，我同肥康戴左副超，仲gel左個瞬雷頭，而suki就戴左頂冷帽同埋戴左個口罩，所以我地乜都唔驚咁一直跟自己跟到去左一間飯店…
我地揀左一個卡位，就係”我地自己”既後面…
我地三個同樣豎起隻耳，留心咁聽佢地講咩
「都唔知呀樂做乜鬼，出發之前無端端發癲，一聽到我個電話，喂左聲就cut我線，係咪我地做左d咩對唔住呀樂呀?我地咁樣留低佢會唔會唔係幾好呀?」後生街市仔好串咁講緊野
「我地三個應該冇野得罪佢丫，前果晚仲約實好哂，諗定帶d咩野去好，佢仲搞笑咁話要帶定一箱蜜瓜奶慢慢飲喎，驚死黎到西藏冇得飲…」suki笑住咁講
「真係唔知呢個呀樂搞乜鬼」聽到肥康鼻孔噴哂氣咁
…
跟住落黎佢地都係傾d好濕碎既野，我地是但叫左碟風干肉黎食，賣單之後好快就離開左間飯店
「聽佢地口中咁講，呀樂似乎留左係香港，點解會咁既呢?」
我一面無知咁問肥康
「我都唔知歷史點解會改變，會唔會未來既呀樂改變左d乜野?」肥康眼露一絲懼意




「咁未來黎既呀樂依家會唔係香港?」
「有機會今次del file之後，屬於我地file係好隨機咁亂放都唔定，當然有可能呀樂都係西藏，而且係你del file暈低之後，呀樂亦都有可能改過file都唔定，因為有十五分鐘既時限…」肥康不斷搖頭
「咁依家呀樂又唔係度，bernando 又搵唔到，咁點算好?」suki既聲音中帶點不安
「睇黎唯一線索得番果幅圖…」肥康又拎出手機黎睇