電腦無啦啦多左d唔知咩既檔案係度(上): 第二十九節

我係樹上面呆左，點解呢度走撚左隻豹出黎，呢度動物園呀大佬?
隻豹一野吼叫，露出尖而幼長既獠牙。
佢似乎好想爬上黎，但佢只係係樹下面望住我
「唔撚係掛，豹好似唔識爬樹喎…」我心裏面好似定左一定
「夠薑你就上黎同我隻揪丫，唔係唔識爬樹呀?」我用接近四十五度咁樣挨住一枝比較粗既樹枝，然後學呀力既笑容望住隻豹
殊不知隻豹對住我又一聲嚎叫，然後就沿住樹幹爬上黎
「嘩!你老母」我突然好淆底
原來豹係識爬樹嫁，情急慌忙之際我係褲袋拎左部電話出黎，對住隻豹丟過去
但隻豹好輕易就避開左，仆街喇!
隻豹望左我電話一望，佢對我果部電話好似好有興趣




於是佢調轉頭落番地下，走左埋去我部電話隔黎，嗅左幾下，又搵條脷奶左幾野
饒有趣味咁圍住部電話轉左幾轉之後，佢又望番住我…
仆街喇呢獲，真係神仙都難救，估唔到一生勞勞碌碌最後居然做左隻豹既午餐
不過，就係呢個時候，電話驀地響起…
「明明我已晝夜無間，踏著面前路，夢想中的彼岸為何還未到…」
就係我電話既鈴聲奏起我最鐘意既無間道主題曲
隻豹好似嚇左一嚇，即刻跑走左
睇住呢個場面，我當堂吁一口氣…我真係要感謝劉德華…
我慢慢咁爬番落地，去執番個電話
拎起電話一睇，咦?依家先係十二點




由於呢排放假關係，好多時我電話都係較左十二點先會響鬧鐘
我望望影子既方位，依家感覺就好似兩點幾三點…
時差…我心中隨即諗到答案
同一時間，我拎起個電話打算睇下呢度係邊度
「仆街!收得半格，仲要時有時無」我無理會咁多，照開個google map出黎等佢慢慢load
呢度有豹嫁屌那星丫，於是我決定盡快落山，係山上太唔安全喇，d豹仲識爬樹，真係仆街
時間過得好快，我落山落到差唔多筋竭力疲，但照估計仲要落多兩粒鐘先可以落到山下面
我係附近執左幾枝大既樹枝，同埋一d乾樹葉，呀力佢真係好撚貼心呀，我係頭先落山既時候勾爛左既幾大窿既長褸入面竟然搵到打火機，真係唔知偵探原來係要打火機…
同時我又諗起，係喎呀力要幫佢既煙斗點火，打火機係需要既…估唔到昔日我話呀力戇鳩既野，今時今日可以話救我一命
燒左幾輪樹葉，我終於將d乾柴燒著左，係呢個時候我又係附近執多堆樹枝或者拗斷一d矮樹既樹枝黎用…




因為用拗斷既樹枝係好難燒，所以我一開始無用黎生火，但依家已經有個火燒著左，所以我好快就收集到一堆”燃料”，然後用一個大圈既火堆圍住左我，只有咁樣先可以防止d狼襲擊，呢個我係小學生既時候好似睇唔知咩小知識定睇戲學番黎，希望呢招對豹都有用啦…
坐係一個尚算空曠既位置下面，天空既星星慢慢開始浮現出黎
昂起頭來，一片寂靜，墨黑既夜空只有繁星既閃爍，星空係無垠，一片星群銀河盡收眼底，大熊座、仙女座…逐一係我腦海中描繪，使天際連成一片…同時亦諗起一段以前中學物理老師教過我睇星既回憶
望到咁既夜空，個人都似乎平靜左唔少
呢個時候，我諗住拎出電話影低佢既時候
Google map出現左反應
因為我睇到我身處既地方係………西藏
「西藏?!唔撚係掛」連續爆左幾句粗之後，我開始冷靜去諗依家既處境
我到底del左d 咩file del到我去左西藏…時空轉移都有?
係呢個時候越黎越多問題係我腦中響起
如果我del既file係屬於不久之前，但同一時間我又係author既話?咁會造成咩既衝突呢?我都消失埋?但起碼我知依家我係存在，所謂我思故我在應該係咁解掛…
不過話時話，估唔到係西藏呢d咁偏僻既地方都上到網，中國移動真係好撚巴之閉
我替堆火添左添柴，然後繼續睇電話
但呢個時候，電話又完全收唔到…
我望下個日子…睇黎時間冇倒退丫，定還是我部電話冇跟隨歷史而變化?




我再打開電話聯絡人果度望左一望
Suki、肥康、miki仲係度，但係呀力個電話就唔見左…
「唔!睇黎我del既file，唔可以令呀力番番黎…」我低頭思索左一陣
我開番whatsapp出黎，sd左d msg比肥康佢地三個，希望等有訊號果陣佢地可以收到，話唔定佢地都飛左黎西藏呢度呢
諗下諗下，朝早既晨光令我打番開隻眼，身旁既柴火亦早已熄滅，
差唔多一日冇食過野同半日冇再飲過水，體力都有d下降…
但襯依家仲有體力，點都要盡快落到山下
經過一輪披荊斬棘，斬攀籐，批雜草之後，比預期遲左半個鐘，終於離開到呢座有豹既山